१ कोरिन्थी 13 - डोटेली नयाँ करार

प्रेम

¹ यदि मइले मान्स रे स्वर्गदुतका भासामि बोल्या तर मइले औरलाइ प्रेम अरेइन भण्या, मेरी बोलिको केइ अर्थ हुनइन, यो हल्ला मचाउन्या घाँट रे झ्याँइ-झ्याँइ अद्द्या झ्यालि जसो मान्तर हुन्छ।

² मसित अगमबाणी बोल्ल्या सक्ति होलो, रे सब रहस्य रे सब ज्ञान बुज्ज सक्लो, रे या सम्मकि पहाडलाइ हटाउन सक्द्या सम्मको परमेश्वरमि बलियो बिश्वास मसित होलो, तर ममि प्रेम आथिन भण्या मेरो केइ मुल्य आथिन।

³ यदि मइले सारा सम्पति गरिबलाइ बाडी दिया, रे या सम्मकि मेरो शरीर जलाउनाइलाइ दिया, तर ममि प्रेम आथिन भण्या, मलाइ केइलगइ फाइदा आथिन।

⁴ जइ मान्सनले औरलाइ प्रेम अरन्छ, त्यो सहनशील रे दयालु हुन्छ। तिननले डाहा अद्दाइनन, न त गौरब अददाहान।

⁵ तिननले और मान्सनलाइ अनादर अद्दाइनन, तिनन स्वार्थि आथिन। तिनन छिट्टाइ रिसाउनाइन, झर्को माण्नाइन, रे खराबिको हिसाब राख्दाइन।

⁶ तिनन मान्सन खराबी अर्यामी खुशी हुनाइन, तर मान्सनले अर्या सत्य रे ठीक कुरणीमि खुशी हुनाहान।

⁷ तिनन प्रेममि सबइ कुरणी सहनाहान, तिनन कभइ बिश्वास अद्द छाड्डाइन, तिनन सदाइ आसा अद्दाहान सबइ कुरणी सनाहान, तिनन असजि रे कष्टमी धैर्य रनाहान।

⁸ अगमबाणी, फरक फरक भासामि बोल्लया बरदान रे बिसेस ज्ञान बितेर जान्या हुन। तर प्रेम सदाइ रइरन्या हो!

^9-10 हामरो ज्ञानको बरदान रे अगमबाणी बोल्लया बरदान अपूरो छ, तर जब त्यो पूर्ण रे सिद्द्ता आउन्छ, तब त्यो अपूरो बितिजान्या हो।

¹¹ त्यो एक मान्स बडया जसो हो। जब म बालक थ्या, मइले बालकइ जसेरि बोलन्थ्या, सोचन्थ्या रे तर्क अरन्थ्या। तर जब हाम बडया, तब हामले बालककी जसेरि अद्द छाड्या।

¹² हाम, बिश्वास अद्द्याले लगइ इसोइ अददाउ, क्याकि हाम निक्केरि नधेकिन्या ऐनामि आफ्नो अनार हेद्द्या एक मान्स जसाइ हौ। भविष्यमी मान्तर, हाम साच्ची सब कुरणी बुज्जया हु, क्याकि हाम परमेश्वरलाइ आमने-सामने धेक्द्या हु। भविष्यमी मान्तर, मइले साच्ची उनलाइ बुज्ज्या हु, जसेरि उनले मलाइ चिन्नाहान।

¹³ तबइकिलाइ परमेश्वरमि हामरो बिश्वास, आसा, परमेश्वरलाइ रे बिश्वासि भाइलाइ हामरो प्रेम, यिन तीन कुरणी सदाइ रनाहान। तर यिन तीनमि सबहइ निको भण्या प्रेम हो।