१ कोरिन्थी 12 - डोटेली नयाँ करारपबित्र आत्माका बरदान 1 बिश्वासि भाइन हो, पबित्र आत्माले हामलाइ दिया बरदानको बारेमि रे तमनले अर्या प्रश्नका बारेमि तमनले निक्केरि बुज्या म चाहानउ। 2 तमनलाइ थाइछ कि तमन बिश्वासमि आउना हइ पइल्ली कसेरी जीवन बिताउन्थ्या, तमन भौत कुरणी बठेइ मुर्तिपुजा अददाइ प्रभाबित भया, जइमि जीवन आथिन। 3 तबइकिलाइ तमनले यो कुरणी बुज्या म चाहानौ, कि परमेश्वरका आत्मा बठेइ बोल्या कसइले “येशू श्रापित होस” भण्नाइन। रे पबित्र आत्माले मान्तर कसइलाइ “येशूइ प्रभु हुन” भण्न सक्द्या बनाउनाहान। 4 बरदान फरक फरक किसिमका छन, तर तिन सब बरदान पबित्र आत्माले दिनाहान। 5 मान्सनले फरक फरक किसमले सेवा अद्द सक्न्छ, तर सब मान्सनले एकइ प्रभुलाइ सेवा अददाहान। 6 सेवा फरक फरक किसिमका हुनाहान, तर एकइ परमेश्वरले हरेक मान्सलाइ त्यो बिसेस किसिमको सेवा अद्द्या बरदान दिनाहान। 7 हाम सबलाइ एक बिसेस किसिमको बरदान मिल्या छ, जइले पबित्र आत्माको उपस्थिति धेकाउन्छ, ताकि हाम आफ्ना बिश्वासि भाइको सहयोग अद्द सकु। 8 पबित्र आत्माले एक मान्सलाइ बुद्दिले भरिया सन्देश बोल्लया बरदान दिनाहान भण्या उनइ पबित्र आत्माले अर्खा मान्सलाइ ज्ञानले भरिया सन्देश बोल्लया बरदान दिनाहान। 9 उनले एक मान्सलाइ ख्रीष्टमी बलियो बिश्वास अद्द्या बरदान दिनाहान भण्या, अर्खा मान्सलाइ उनइ पबित्र आत्माले मान्सनलाइ निको बनाउन्या बरदान दिनाहान। 10 पबित्र आत्माले एक मान्सलाइ अचम्मका काम अद्द्या सक्ति दिनाहान भण्या, अर्खा मान्सलाइ परमेश्वरको सन्देश बोल्लया बरदान दिनाहान, रे अर्खा मान्सलाइ परमेश्वर बठेइको बरदान हो कि सैतान बठेइको हो भणबर छुट्टयाउन्या बरदान दिनाहान। उनले एक मान्सलाइ फरक फरक भासा बोल्लया बरदान दिनाहान भण्या, उनइले अर्खा मान्सलाइ तिन फरक फरक भासाका अर्थ खोलदिन्या बरदान दिनाहान। 11 सब बरदान एकइ पबित्र आत्माका काम हुन। उनले आफ्ना इच्छा अन्सार हरेक बिश्वासिलाइ फरक फरक बरदान दिनाहान। एक शरीर: भौत अंग 12 क्याकि जसेरि शरीर एक छ तइका भौत अंग छन रे शरीरका जम्माइ अंग भौत भएलगइ शरीर त एकइ हुन्छ, हाम ख्रीष्टका शरीर हु जइका भौत अंग छन। 13 क्याकि एकइ पबित्र आत्मा बठेइ हाम सबले एकइ सरीरमि बप्तिस्मा पायाछौ। हाम यहुदि मान्स अथवा, गैर-यहुदि मान्स, दास अथवा स्वतंत्र मान्स जो भया लगइ हाम सबइले एकइ आत्मा पायाछौ। 14 क्याकि शरीर एकइ अंग बठेइ मान्तर होइन तर भौत अंग बठेइ बन्या हुन्छ। 15 यदि खुट्टाले “म हात होइन, तबइकिलाइ म सरिरको अंग होइन” भण्यो भण्या, कि त्यो सरिरको अंग हुनइन? 16 रे कानले “म आँखा होइन, तबइकिलाइ म सरिरको अंग होइन” भण्यो भण्या, कि त्यो सरिरको अंग हुनइन? 17 यदि पुराइ शरीर आँखा भया भएले तमले कसेरी सुण्न्या? यदि पुराइ शरीर कान भया भएले तमले कसेरी सुङद्या? 18 तर परमेश्वरले आफ्नो इच्छा अन्सार हामरो सरिरको हरेक अंग मिलाइबर ठीक ठाउँ राखिदिराइछ। 19 यदि एकइ अंग हुन्थ्यो भण्या, शरीर हुनेइ थेइन। 20 तबइकिलाइ सरीरमि भौत अंग भया लगइ, शरीर एकइ हुन्छ। 21 आँखाले हातलाइ “मलाइ तेरो जरुरत आथिन” भण्न सक्दइन, रे मुन्टाले लगइ खुट्टालाइ “मलाइ तमरो जरुरत आथिन” भण्न सक्दइन। 22 बरु शरीरका दुर्बल जसा धेकिन्या अंग नभइ नहुन्या हुनाहान। 23-24 रे जइ अंगलाइ हाम कम सम्मानको माण्नाउ, तिनइ अंगलाइ भौत ख्याल राखिबर हाम लत्ता लाउनाउ। तबइकिलाइ हाम तिन अंगलाइ नधेकिन्या किसिमले हेरचाह अददाउ, जबकि और बड्ता सम्मानको अंगलाइ बिसेस हेरचाहको जरुरत पड्डइन। तबइकिलाइ परमेश्वरले शरीरका कम महत्त्व भया अंगलाइ बड्ता महत्त्व रे हेरचाह दिनाइ संङइ राख्या छ। 25 ताकि शरीरका अंगमी बेमेल जन हौ, तर शरीरका सब अंगले एक अर्खाको हेरचाह अरुन। 26 रे यदि हामरा सरिरको एक अंगलाइ कष्ट भयो भण्या, पुराइ शरीरलाइ कष्ट हुन्छ। तसेरि यदि हामरा सरिरको एक अंगलाइ आदर भयो भण्या, पुराइ शरिरले आनन्द मनाउनाहान। 27 तसेरि तमन ख्रीष्टका शरीर हौ, रे उनरा शरीर अंगका रुपमि तमन हरेक ख्रीष्टका हौ। 28 ख्रीष्टको यो मण्डलिमि, परमेश्वरले हामलाइ फरक फरक किसिमका काम अददाइ दिया छ: पइलो, उनले केइ मान्सनलाइ येशू ख्रीष्टका छान्या शिष्या हुनाइ, दोसरो अगमबक्तान, जइले उनरो बचन बोलन्छ, तेसरो शिक्षक। तइ पछा उनले केइ मान्सनलाइ अचम्मका काम अद्द्या अधिकार दियो। तइ पछा उनले केइ मान्सनलाइ निको पाड्डया अधिकार दियो, केइ मान्सनलाइ उनले औरलाइ सहयोग अद्द्या बरदान दियो, कसइलाइ अगुवान हुन्या, रे कसइलाइ पबित्र आत्मा बठेइ फरक फरक भासा बोल्लया बरदान दिया छ। 29 तिनन सब छान्या शिष्या, अथवा अगमबक्ता, अथवा शिक्षक होइन। रे अचम्मका काम अद्द्या सक्ति सबसित आथिन। 30 सबलाइ रोग निको पड्डया, अथवा नसिक्या फरक फरक भासा बोल्लया, अथवा नसिक्या फरक फरक भासाको अर्थ खोल्लया बरदान मिल्या आथिन। 31 तबइकिलाइ तमनले लगनशीलतासित उच्च बरदानको उत्कट इच्छा अददु पणन्छ। तर आब म तमनलाइ सबहइ उत्तम बरदान कि हो तइ भणन्या हु। |
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation