१ कोरिन्थी 10 - डोटेली नयाँ करार

इस्राएलको इतिहास बठेइ चेताउनी

¹ बिश्वासि भाइन हो, भौत समय पइल्ली मरुभूमिमी हामरा पुर्खालाइ भया कुरणी म तमनलाइ याद दिलाउन चाहानौ। परमेश्वरले बादल पठाइबर तिनन सबलाइ अगुवाइ अर्यो जो तमरा अगाडी-अगाडी हिट्टन्थ्यो, रे तिनन सबलाइ लाल समुद्र बठेइ सुक्‍का जमिनमी जसेरि सुरक्षित लेया।

² हमरा सब पुर्खाले मरुभूमिमी बादलका खामा बठेइ सुरक्षा पाया अनुभव अर्यो रे खुट्टा कतिलगइ नभिजिबर लाल समुद्र तर्या। यो बप्तिस्मा भया, रे मोशाका शिष्या भया जसोइथ्यो।

³ रे तिनन सबले परमेश्वरले स्वर्ग बठेइ दिया रोटा खायो।

⁴ तिनन सबले परमेश्वरले पखान बठेइ दिया पानी लगइ पियो। क्याकि तिननले पखान बठेइ आया पानी पियो, रे तइ पखानलाइ ख्रीष्टसित तुलना अद्द सकिन्छ, जो तिननसित थ्या, रे जइले तिननलाइ जीवन दियो।

⁵ पइलगइ तिनन मध्ये भौत जसासित परमेश्वर खुशी भएइन रे तिनन उजाड ठाउँमि मर्या।

⁶ भौत पइल्ली हामरा पुर्खासित भया यिन सब कुरणी हामरि निउति चेतावनी हो। यदि हामले तिनरा जसोइ दुष्ट काम अद्द्या इच्छा भयो भण्या हामलाइ लगइ तसोइ हुन्या हो।

⁷ तिननमि हइ कसइले मुर्तिपुजा अर्यो, जसेरि पबित्र सास्त्रमि लेखिया छ, “भोजमि मान्स खानाइ रे पिनाइ बस्या, रे तिनन अनैतिक काम अद्द लाग्या।” तबइकिलाइ तमनले मुर्तिपुजा जन अर।

⁸ हामले व्यभिचार अददु पड्डइन, जसेरि तिनन मध्ये कति जनाले अर्यो, रे एकइ दिनमि तेइस हजार मान्सन मर्याथ्या।

⁹ हामले ख्रीष्टको परिक्षा अद्दु पड्डइन, जसेरि तिननमि हइ कतिले अर्यो, रे स्याप बठेइ मर्या।

¹⁰ हामले गनगन अद्दु पड्डइन जसेरि तिनन मध्ये कतिले अर्यो, रे परमेश्वरले पठाया स्वर्गदुतले तिननलाइ मार्यो।

¹¹ यिन कुरणी तिननलाइ चेतावनिको रुपमि भयाथ्यो रे हामरो चेतावनिका निउति लेखियेका हुन, जो यइ संसारका अन्तिम समयमि रइरइछन।

¹² तबइकिलाइ कसइ बिश्वासि जइले आफ्नो बिश्वासमि आफ सुरक्षित छु भणन्या, सोचन्छ भण्या उ होशियार हुनु पणन्छ, ताकि उ तसइ पापमि जन पडउ।

¹³ तमन लगइ तसाइ परीक्षामि पड्याछौ जसेरि, और सब मान्सन परीक्षामि पड्या छन। तर परमेश्वर बिश्वासयोग्य छन, क्याकि उन तमनले सहन नसक्द्या परीक्षामि पड्ड दिन्या आथिन, बरु उनले तमनलाइ चाइन्या सक्ति दिन्या हुन, ताकि तमन पाप अद्द बठेइ बाच्च सक।

मुर्तिपुजा नअददु

¹⁴ तबइकिलाइ मेरा प्रिय भाइन हो, मुर्तिपुजा बठेइ अलग बस।

¹⁵ म तमन समजदार मान्सनलाइ भण्नाछु, मइले भण्या कुरणी ठीक छ कि आथिन तमन आफइ बिचार अर।

¹⁶ जब हामले प्रभु भोजमि प्रयोग अद्द्या कटौरा बठेइ अंगुरको रस पिउनाउ, जइकी निउति हाम परमेश्वरलाइ धन्यबाद दिनाउ, तब साँच्चि हाम ख्रीष्टको रगतमि सहभागी भया हुनाउ। रे जब हाम प्रभु भोजमि रोटो तोड्डाउ रे तइ खानाउ, तब साँच्चि हाम ख्रीष्टको सरीरमि सहभागी भया हुनाउ।

¹⁷ क्याकि रोटो एकइ हुन्छ, जो ख्रीष्ट हुन। हाम भौत भया लगइ, हाम एकइ शरीर हुनाउ, क्याकि हाम तइ एकइ रोटा बठेइ खानाउ।

¹⁸ इस्राएल देशका मान्सनका बारेमि बिचार अर। जब सब मान्सनले परमेश्वरलाइ चडाया खाना खानाहान, तब तिनन परमेश्वरको आराधनामी सहभागी हुनाहान। तसेरि जसले मुर्तिलाइ चडाया खाना खानाहान, तब तिनन लगइ तिन मुर्तिपुजामि सहभागी हुनाहान।

¹⁹ म यो भण्नारइन कि मुर्तिलाइ चडाइया बलिको भौत मुल्य छ, रे तइ मुर्तिको भौत महत्त्व छ।

²⁰ बरु मइले यो भण्ना छु कि मुर्तिपुजकले जो बलि चडाउनाहान, त्यो परमेश्वरलाइ होइन, तर भूतप्रेतलाइ चडाउनाहान, रे तमन भुतप्रेतसित सहभागी हो भणन्या म चाहानइन।

²¹ तमन भूतप्रेतलाइ चडाया खाना रे पिउनामि सहभागी हुनु, रे प्रभुको मृत्युको सम्जना अराउने प्रभु भोजको खाना रे पिउना दुएइमि तमन सहभागी हुनु सक्दानु।

²² यदि तमनले तसो अर्या भण्ना, पक्‍कालगइ तमनले प्रभुलाइ भौत रिस उठाउन्या हो। याद अर, तमन उन भण्ना सक्तिशाली आथिनु।

बिश्वासीको स्वतन्त्रता

²³ तमन भणन्छौ कि हाम सब कुरणी अद्दाइ स्वतन्त्र छौ, तर सब कुरणी हामरि निउति असल होइन। हाम सब कुरणी अद्दाइ स्वतन्त्र छौ, तर सब कुरणीले परमेश्वरमि हामरो बिश्वास बलियो बनाउनइन।

²⁴ कसइले लगइ आफनोइ भलाइ जन खोजउ, तर औरको भलाइ खोजउ।

²⁵ तमनले यिसो अददु पणन्छ। तमनले दोकानमि बेचिन्या कसइ मासु लगइ खान सकन्छौ। यो मुर्तिलाइ चडाया हो कि होनइ भणबर जन सोध, तब तमरो बिबेकले यइका बारेमि तमनलाइ केइ दोस दिनइन।

²⁶ तमनले यो खान सकन्छौ क्याकि पबित्र सास्त्रमि इसो लेखिया छ, “पृथ्बी रे तइमि भया सब थोक परमप्रभुइका हुन।”

²⁷ यदि कसइ अबिश्वासीले तमनलाइ भोजमि निम्तो दियो रे तमनलाइ जान्या इच्छा भयो भण्या तमरा अगाडी जी राखिया हुन्छ, तइ खा, रे त्यो मुर्तिलाइ चडाया हो कि होइन भणबर जन सोध, ताकि त्यो मुर्तिमि चडाया भया लगइ तमन दोषि महसुस अद्द्या होनु।

^28-29 तर यदि कसइले तमलाइ त्यो खाना मुर्तिलाइ चडायाथ्यो भण्यो भण्या, आफ्ना बिबेकका खातिर होइन, तर तइ भणन्या मान्सका बिबेकका खातिर त्यो जन खा। क्याकि मेरो खान्या स्वतन्त्रताकि निउति और मान्सको बिबेकले मलाइ दोषि जनबनाओस।

³⁰ यदि धन्यबाद दिइबर म खाना खान्नाछु भण्या, धन्यबाद दिबर खाया भोजकि निउति क्याकि मेरो निन्दा हुन्या?

³¹ निचोडमि, म तमनलाइ भणनउ कि तमन खा अथवा पिय, अथवा तमन जी लगइ अर, सब परमेश्वरका महिमाका निउति अर।

^32-33 मइले अद्द्या सब काममी सब मान्सनलाइ भौत खुशी बनाउन्या कोशिस अददाछु। म आफ्नो भलाइकी निउति होइन तर सबको भलाइ खोज्जउ, ताकि तिननले उद्दार पाउन सकुन। तसेरि तमनले लगइ इसो जीवन जिउनु पणन्छ जइले यहुदि मान्सन अथवा गैर-यहुदि मान्सन अथवा परमेश्वरकि मण्डलिलाइ कसइ किसिमको समस्या ल्याउनइन।