Luke 19 - Dannau1 နွို့ခေါင်း ကိုယ်တော်ယေရှုနောင်း တပည့်တော်ဘို့ဘက်နအနုဲင်နုဲင် မြိုဂျေရိခေါနွို့ ဖြတ်ကု့တွို့ထာ ကြွကု့ကူးဟောက်နွို့နဲ့။ 2 သမြိုနီးနား ဗေ့ဘာ့ဟဲ့မတ်ဇက္ခဲ လို့အာ့်ကွက်မန်းမနနွို့နဲ့။ အမ်နောင်း ကလုဲင်လို့တန်ကောင့်တာဝန်ခံအာ်ကွက်နား လို့ချမ်းထာလွန်းလန်းအာ့်ကွက်လဲကပ်ဟောက်နဲ့။ 3 အမ်နောင်း ကိုယ်တော်ယေရှုနား ကလုဲင်ကွားနို့နား အာ့ရင်နိုင်းနွို့အောင် ကြိုးစားကြဘို့နွို့နဲ့။ စနွို့လဲ လို့ပုနွို့နား လို့ဘိုဘက်နောင်းလဲဉ်း တာ့စာ့ကိုယ်တော်နွို့ ဝန်းပွို့ကြဘို့နွို့နား လို့ဖုန်ကုန်းဘို့ဘက်နား ကော်တွို့ထာ ကိုယ်တော်နား ရင်နိုင်းကောနား ဟိုမဲ့စနွို့ကိုးနဲ့။ 4 စနွို့နား အမ်နောင်း အာလဗင်ယင်ထွီးနိုင်းကိုယ်တော်နွို့အောင် ပေါင်းကံ့ကြိုတွိုငွမ်းထာ တာကိုယ်တော်ဘာ့ပွို့ပိုမဲ့ တာ့ကညွမ်း ကွေဆုပ်ပ္လေ့ ဒုနွို့ ဒတ်မနနဲ့။ 5 ကိုယ်တော်ယေရှုနောင်း ဆောင်လောက်တလွက်နွို့နား မော်ရေ့တွို့ တကွေဆုပ်ပ္လေ့ ဒုနွို့ထာ “ဇက္ခဲ၊ လာဂို့နီးနွို့ အို့နောင်း တာ့ညာ့မို့နွို့ မောင်းမန်းဟောက်နွို့ခေါင်း စွမ်းပို့ကုဲင်ကုဲင်” နွို့ဟောဖြိုမနနဲ့။ 6 စနွို့နား ဇက္ခဲနားလဲဉ်း စွမ်းပွို့တွို ကွေဆုပ်ပ္လေ့ ဒုနွို့ကုဲင်ကုဲင်ထာ ကိုယ်တော်ယေရှုနား ညာ့အမ်နွို့ဟက်တွို့ထာ နွက်တူးတူးန ကြိုဆိုမနနွို့နဲ့။ 7 စနွို့လဲ တာ့လွက်နွို့ ဘာ့ဟိုကြမဲ့ပွို့နွို့နား ကိုယ်တော်ယေရှုနောင်း ညာ့ဇက္ခဲနွို့ ဘာ့ကြွပွို့နွို့နု့ ဆောင်ရင်နွို့နောင်း “ကိုယ်တော်နောင်း မောင်းမန်နွို့ ကုကူးဟောက်” နွို့ကာရကြဘိုနွို့နဲ့။ 8 နွို့ခေါင်း ဇက္ခဲနောင်း အောက်အိုတွိုထာ ကိုယ်တော်နား “ကမ်းအာစမ်း ကိုယ်တော်၊ အို့ပိုင်ဆိုင်ပစ္စည်းဥစ္စာထာဝက်နွို့ လို့ဘာ့ဆန်းရဲဇာ့နွို့နား ခွီအာလောက်ဟောက်နွို့နဲ့။ စနွို့လဲ တာလို့အများနွို့ မတရားဘာသန်ကွေပွို့မဲ့ ပဆံအခွန်နွို့လဲဉ်း တာ့လို့နွို့ အို့ဘာ့အွေပွို့မဲ့ အာလိုလ့်လောက်ဟောက် ပမာဏပွဉ်ဆ” နွို့ လျှောက်တံကြဘို့နဲ့။ 9 နွို့ခေါင်း ကိုယ်တော်ယေရှုနား အမ်နွို့ “မို့နောင်း ကလုဲင်ကမာ့မျိုးဆက် အာဗြဟံ နွို့ခေါင်း စတွို့လုရှိနီးထာ မို့နမိသားစုမို့မေ့မေ့နွို့ ဖြားကယ်တင်အာတော်မူတွို။ 10 ဘာ့ကလုဲင်ကွန်ဖြားအို့နားလဲဉ်း လို့ဘာ့ဗာပွန်နွို့ ရက်တွို့ထာ အမ်းပွို့ကယ်တင်အာနွို့ခမ်း လောကနီးနား ကြွပို့ဟောက်ကိုး” နွို့ဟောဖြိုကိုးနဲ့။ 11 လို့ဖုန်ကုန်းဘို့ဘက်နွို့နောင်း ကိုယ်တော်ယေရှု ဇာ့ဘာ့ဟောဖြိုနွို့နု့ နား နားအွေမဲ့ကြဘို့နွို့နဲ့။ ကိုယ်တော်နောင်း မြိုဂျေရုဆလင်နွို့ မောင်းလောက်မောင်းလောက်နွို့ခေါင်း လို့နား ထာထနာတော်ဖြားနောင်း အတိတွိုန်း ပေါ်လေးပိုနွို့ ထုန်ကြမဲ့ပွို့နွို့ခေါင်း ကိုယ်တော်နောင်း ပုံဥပမာအာ့်မာ့န ဟောပလောက် အခွပ်နွို့နဲ့။ 12 “အရေးဘာ့တန် မိသားစုနွို့မှ မင်းသားအာ့်ပါးနောင်း ဘာ့ပွီးပွိုလို့အာ့်ကွက်နောင်း အ့်ကလုဲင်ရင်နွို့ဘာ့တံမြှောက်ပွို့မဲ့ မောင်းခံအွေနွို့ တာဧကရာဇ်ဘာ့ဟို ဘာ့ငါလွန်းမဲ့ နိုင်ငံအာ့်နိုင်ငံနွို့” မောင်းကု့နွို့ဖျောင်မနနဲ့။ 13 နာ့နွို့ခါလေးကောခရီးနွို့ ဟက်တွို့အစေခံမာကျင်ကွက်ထာ ပဆံအာ့်မီနာ့a စီအာတွို့ထာ “အို့ဘာ့ရန်းဘက်ပွိုနွို့အောင် ပိုက်ဆံဘို့ဘက်နီးနား ရက်ကြဘို့စီးပွားရေးနေ” နွို့ ဖြိုပွို့နွို့နဲ့။ 14 စနွိုလဲ တိုင်သူပြည်သားအမ်နွို့နောင်း ရှိအိကြဘို့အန်နွို့ခေါင်း အမ်ဆောင့်လေးပွန်ယော့နောင်း တာမန်းဧကရာဇ်နွို့ လို့အာကတမ်းတောင်ခိုင့်နွို့ ပလွှတ်တွို့ထာ “အေ့နီးနောင်း အမ်ဘာ့အုပ်ချုပ်နွို့ လာ့လိုလ့်ကော” နွို့ကု့အာဖြိုမနနွို့နဲ့။ 15 စနွိုလဲ မန်းဧကရာဇ်နွို့နောင်း အ့်ကလုဲင်ဖရင်နွို့တင်မြှောက်တွို့ထာ အမ်နောင်းလဲဉ်း ရန်းပွိုဖြိုင်အမ်နွို့နဲ့။ နွို့ခေါင်း အမ်ဘာ့အာပို့မဲ့ပဆံ အစေခံနွို့ဇာ့နွို့နောင်း ရက်တွို့စီးပွားထာ ဗင်အမြတ်ရီးမားနွို့နောင်း ဆောင်ငန်းဟောက်နွို့ခေါင်း လို့ဇာ့နွို့နု့ မောင်းဟက်နွို့ ဟောဖြိုမနနဲ့။ 16 အစေခံငွမ်းထပ်ဘေ့နွို့နား ပွို့တွို့တာအမ်ထာ အရှင်မန်းကုန်း ဘာ့အာပွို့မဲ့ ပဆံအာ့်မီနာ့နား အို့ မာကျင်ဆပွားကု့အောင် ဆောင်ရွက်ပွို့ကိုး နွို့လျှောက်တံမနနဲ့။ 17 ဖရင်လဲဉ်း အစေခံနွို့နား “ကြလွန်းဟောက်။ မို့နောင်း အစေခံ ဘာ့ကလို့အာ့်ကွက်နွို့ခေါင်း အမှု့ကိစ္စဘာ့ဘေ့နွို့ ဆုပ်မဲ့သစ္စာနွို့နား ပလေဟောက်နွို့ခေါင်း မို့နား မြိုမာ့ကျင်မြို့နွို့နား အာအုပ်ချူပ်ဟောက်” နွို့ဖြိုမနနဲ့။ 18 ဒုတိယအစေခံနောင်းလဲဉ်း “အရှင်မန်းကုန်း ပဆံအာ့်မီနာ့နား အို့ ထွန်ဆပွားကု့အောင် ဆောင်ရွက်ပွို့ကိုး” နွို့ဆောင့်လျှောက်တံနောင်း 19 ဖရင်နောင်းလဲဉ်း အစေခံနွို့နား “ကြလွန်းဟောက်။ မြိုထွန်မြို့နွို့နား အာအုပ်ချူပ်ဟောက်” နွို့ဖြိုမနနဲ့။ 20 နွို့ခေါင်း အစေခံတခြားနား ပွို့ပိုတွိုထာ “အရှင်မန်းကုန်း ဘာ့ပွို့မဲ့ ပဆံအာ့်မီနာနွို့နား ထို့ပွို့တွို့ ကောင်ပဝါထာ ထန်းပွို့ကိုး။ နီးနေ ရေစ်စေး။ 21 အရှင်မန်းကုန်းနောင်း စည်းကမ်းကုန်းဟောက်ခေါင်း လို့တိကျစယ်မကာ့ကော အမ်ဘာ့ပိုင်ကောထင်အမ်ဘို့ဘက်နွို့ ဘာ့ထန်းအွေတွို့ထာ အမ်ဘာ့စံပွို့ကောဇာ့နွို့လဲဉ်း ဘာ့ဝိုက်အွေဟောက်နွို့ခေါင်း အို့နောင်း ရမာန့်ဟောက်နွို့နဲ့။ စနွို့နား အို့နောင်း မင်ယို့ဇာ့နီးကိုး” နွို့ဖြိုမနနဲ့။ 22 ချန်နွို့နု့ ဖရင်နား အစေခံနွို့နု့ ဘာ့နာခံအွေကောအစေခံ၊ ပနောင်မို့နွို့အတွိုန်း မို့နား အို့စီရင်လောက်ဟောက်အပြစ်။ အို့နောင်း စည်းကမ်းကုန်းတွို့ထာ ကလုဲင်လို့တိနွို့လဲဉ်း အို့နဘာ့သက်ဆိုင်ကောပစ္စည်းဥစ္စာဘို့ဘက်နွို့ ဘာ့ထန်အွေတွို့ထာ အို့ဘာ့စံပွို့ကော ပ္လေ့ထေ့ပ္လေ့ ရို့နွို့လဲ ဘာ့ဝိုက်အွေဟောက်နွို့ မို့တာ့ငန်းအမှန်နွို့နု့ 23 ရွားနွို့ပဒေကား ပဆံအို့နွို့နောင်း ရွားမို့အပ်ပွို့ကော တာဘဏ်နွို့နား။ တာယို့ဇာ့နွို့နို့နု့ အို့တာပွို့နွို့နား အတိုးနအနုဲင်နုဲင် အိုဗင်လောက်ဟောက်နွို့ ဖြိုမနနဲ့။ 24 နွို့ခေါင်း ဖရင်နောင်း တာအ့်တာမေ့နွို့ ဘာ့မုဲင်ကြမဲ့ဘို့နွို့နား “ပဆံတာလို့နွို့အွေတွို့ထာ ပဆံဘို့ဘက်နွို့ ပွားမာကျင်ဆအောင် ဘာ့ဆောင်ရွက်ပို့မဲ့ အစေခံနွို့နား အာဝဲ့နေ” နွို့အာမဲ့အမိန်နဲ့။ 25 စနွို့လဲ အစေခံအမ်နွို့နား အရှင်မန်းကုန်း အစေခံနွို့နား ပဆံဟိုယော့တွို့မာကျင်မီနာ့ နွို့ဖြိုမနနဲ့။ 26 “ဖရင်နွို့နောင်းလဲဉ်း ‘ပွို့နွို့နား အိုတာဖြိုနွို့နု့ တာမို့နွို့ဘာ့ဟိုမဲ့ဇာ့နွို့ဘို့ဘက်နား ထုံးတွို့ကလို့လို့ထာ ပွားကု့အောင် လို့ဘာယို့နိုင်းနွို့နောင်း မင်အပ်အာလိုလ်ဟောက်နွို့လဲဉ်း တာပွို့နွို့ဘာ့ဟိုမဲ့ဇာ့နွို့နု့ တာထုံးကောကလို့လို့နွို့နု့ ပွားကု့အောင်ဘာ့ယို့နိုင်းကောဇာ့နွို့နောင်း တခွို့နွို့နု့ ဘာဟိုမဲ့ဇာ့နွို့နု့ မင်တန်းအွေခံဟောက်နွို့နဲ့။ 27 စနွို့ဖုန် အို့ဘာ့အုပ်ချုပ်နွို့ ဘာ့လိုလ့်ကောရန်သူဘို့ဘက်နွို့နု့ တာလွက်နီးဟက်ပွိုတွို့ထာ ငွမ်းအို့နီး ဗီဝဲ့နွို့နု့’ အာဝဲ့အမိန်နွို့နဲ့။” 28 အကြောင်းအရာဘို့ဘက်နွို့ ဆောင်ဟောဖြိုယောနွို့ ကိုယ်တော်နောင်း ငွမ်းတပည့်တော်ဘို့ဘက်နွို့ကြွကု့တွို့ထာ မြိုဂျေရုဆလင်နွို့ ဆက်ကု့ကူးခရီးနွို့နဲ့။ 29 ဘာ့ဟိုတာ့မေ့ဗွေသံလွင်နွို့ တဘိုဗက်ဖာဂေန တဘိုဗေသနိနွို့ ဆောင့်လောက်နွို့နု့ ကိုယ်တော်ယေရှုနောင်း တပည့်တော်အဲဉ်ကွက်နွို့ အ့်ကြိုကု့ငွမ်းနွို့ထာ ပလွတ်ကု့ကူးဟောက်ကိုးနဲ့။ 30 ခွို့နွို့နား ခါပလွတ်ကု့ကောနွို့ ကိုယ်တော်နား “ငွမ်းပွို့နွို့ဘာ့ဟိုမဲ့တဘိုနွို့နု့ ကု့စေးကြဘို့နေ။ တာ့လွက်နွို့နု့ ဆောင်ကွေမှ ခါသံဖူးကော မြည်းပေ့bအာ့်ကွက်နား ထွိလောက်ဟောက်။ မြည်းနွို့နောင်း ပဖြေတွို့ကညေထာ ဟက်ပွိုတာအို့နီးနေ။ 31 အာ့်ကွက်ကွက်နား ‘ရွား မြည်းနွို့ မင်ဖြေအာကညေနား’ နွို့ တာမားပွို့နွို့နု့ ‘ကိုယ်တော်နား မြည်းနွို့နု့ မောင်ထုံးနွို့ လိုလ့်ဟောက်’ နွို့ ဖြေဘက်ကြဘို့နေ” နွို့ဟောဖြိုမနနဲ့။ 32 နွို့ခေါင်း တပည့်တော်အဲဉ်ကံက်နွို့နောင်းလဲဉ်း လေးပွန်ကု့တာ့တဘိုနွို့ထာ ကိုယ်တော်ဘာ့ဟောဖြိုပွို့နွို့အတွိုန်း မြည်းပေ့နွို့ ထွိကြဘို့နွို့နဲ့။ 33 ခွိုနွို့နောင်း မြည်းပေ့နွို့ တန်းဖြေအာကညေနွို့ ကစာမြည်းပေ့နွို့နား “ရွား မြည်းပေနွို့ ဖြေကြဘို့ကညေနား” နွို့မားမနနွို့နဲ့။ 34 ခွိုနွို့နောင်းလဲဉ်း “ကိုယ်တော်နား မြည်းပေ့နီး မောင်ထုံးနွို့ လိုလ့်ဟောက်” နွို့ ဖြိုဘက်မနနဲ့။ 35 နွို့ခေါင်း ခွို့နွို့နောင်း မြည်းပေ့နွို့ တတာ့ကိုယ်တော်ယေရှုနွို့ အွေပွိုတွို့ကြဘို့ထာ တကွေကကျင်းမြည်းနွို့ ခရိုန်းခွို့ဘို့ဘက်နွို့ ဆောင်ခံအာယော့နောင်း အာထုစ်ကြဘို့ကိုယ်တော်နွို့နဲ့။ 36 သွမ်တိုမြည်းပဲ့နိုထာသကညွမ်းကူးဂျေရုဆလင်နို လိုးပရိတ်သတ်ဗောက်ကို့နိုနား ဖပ်ငွမ်းကိုယ်တော်နို ဝိုင်းခံပွို့အာကြဗို့ ဝတ်ရုံခွိုအမ်နဲ့။ 37 ကိုယ်တော်ယေရှုနောင်း တမေ့မြိုဂျေရုဆလင်နွို့ စကွေဗွေသံလွင် အစွမ်းနွို့ ဆောင့်လောက်ကွေကညွမ်းနွို့နောင်း တပည့်တော်ကိုယ်တော်မေ့မေ့နွို့နောင်း ကိုယ်တော်ယေရှုဘာ့ယိုပွို့မဲ့ အံ့ဖွယ်အမှုမေ့မေ့နွို့နောင်း ကရက်အထန်ထောတုန်န နွက်တူးတူးနကြွတွို့ထာ ဂုဏ်ကျေးဇူးတော်ဖြားနား ချီးမွမ်းကြဘို့နွို့နဲ့။ 38 “မာတ်နာမဖြားန ဘာ့ကြွပိုမဲ့ ဖရင်နွို့နား ကိုယ်တော်နောင်း တာမင်လဲဉ်း ကောင်းကြီးနွို့နဲ့။ ဘာ့ဟိုရွှေမြို့တော်နွို့ ဖြားနအနုဲင်နုဲင် ဘာ့ငြိမ်းချမ်းတဟိုလဲ။ ဗဟိုရွေမြိုတော်နွို့ ဖြားနောင်းလဲဉ်း ဖုန်းတန်ခိုးတော် တာထွန်းလန်းလဲ” နွို့ကြွမနနဲ့။ 39 ချန်နွို့နု့ ကောင်လို့ဖုန်ကုန်းဘို့ဘက်နွို့ ဖာရိရှဲတောင်ခိုင့်နား ကိုယ်တော်နွို့ “ကိုယ်တော်၊ တပည့်တော်ကိုယ်တော်ဘို့ဘက် နား နာ့နွို့ ကလေစ်ဆုံးမအာစေး” နွို့လျှောက်တံမနနဲ့။ 40 ကိုယ်တော်ယေရှုနား ခွို့နွို့နား “ပွိုနွို့နု့ အို့တာဟောဖြိုနွို့နု့ တပည့်တော်အို့နွို့နား အို့နွို့ တာ့ချီးမွမ်းကြွားကောပွို့နွို့နု့ သန်းမှုဘို့ဘက်နား ချီးမွမ်းကြွာကု့လောက်ဟောက်” နွို့ဟောဖြိုမနနဲ့။ 41 နွို့ခေါင်း ကိုယ်တော်ယေရှုနောင်း တာမေ့မြိုဂျေရုဆလင်နွို့ လောက်ပိုတွို့ထာ မြိုနွို့နား ရေစ်တွို့ထာ တာမြိုနွို့ လို့ဘာ့မန်းမဲ့ဘို့ဘက်နွို့နား နွက်ပေ့ညှင်းလေမနနွို့နဲ့။ 42 ကိုယ်တော်နား “အိုး မြိုဂျေရုဆလင်နွို့ ဘာ့မန်းမယ့်လို့မေ့မေ့နွို့နောင်း ဖြားနအနုဲင်နုဲင် ဘာ့ငြိမ်းချမ်း ဘာ့ဗင်မဲ့ နည်းလမ်းနွို့နား ပွိုငါးလည်သဘောပေါက်နွို့အောင် အိုနောင်း ဆန္ဒဟိုလွန်းလန်းဟောက်နွို့လဲဉ်း အခွပ်ကား ပွို့လာ့မင်ရင်ကော။ 43 ရွားနွို့ပဒေကား ဘာ့မင်ခံစွေမဲ့ ဘေးဒုက္ခအချန်ကာလနွို့နား တာပွို့နွို့ မောင်းလောက်ပိုတွို့နွို့ခေါင်းကိုးနွို့နဲ့။ ချန်နွို့နု့ ရန်သူပွို့နွို့နား တာ့စာပတ်လည်ပွို့နွို့ ဆုပ်တွို့ခြံမြိုအမာ့ထာ ပွို့နွို့နား ဝန်းလောက်ဟောက်ပွို့နွို့နဲ့။ နွို့ခေါင်း ပွို့နွို့နား အ့်ဖက်ဖက်မှ ဗက်ဒုလောက်ဟောက်ကြဘို့နွို့နဲ့။ 44 မြိုပွို့မင်မြိုမြိုနွို့နောင်း ကသေ့နအညီလောက်ကလုဲင်ကု့အောင် ညာ့ပွို့ဘို့ဘက်န နံရံဘို့ဘက်နွို့ မေ့ကု့အောင် ခွို့နွို့နောင်း ဘာ့ယို့ဖျောက်လောက်ဟောက်နွို့နား ဘာ့ဟိုတမြိုပွို့ လို့မေ့မေ့နွို့လဲဉ်း ဗီကြလောက်ဟောက်ပွို့နွို့နဲ့။ ရွားနွို့ပဒေကား ပွို့နွို့နား မောင်းကယ်တင်ပွို့နွို့ ဖြားနား အချန်ဘာ့လွတ်တော်မူမဲ့မေရိယနွို့ ပွို့ပို့မာန့်ကော သတိနွို့ခေါင်း” ကိုးနဲ့။ 45 နွို့ခေါင်း ကိုယ်တော်ယေရှုနောင်း မြိုဂျေရုဆလင်နွို့ ကွက်တွို့ထာ ကောင်ဗိမာန်တော်နွို့နု့ ကွက်ထို့ယော့ကြဘို့ ခွို့ဘာ့စာမဲ့ဘို့ဆေနွို့နု့ ဒေါက်လေးမနနွို့နဲ့။ 46 ကိုယ်တော်ယေရှုနား လို့ဇာ့နွို့နု့ “ကောင်ကျမ်းစာနွို့နား ‘ညာ့ဖြားနွို့နောင်း ကလုဲင်လောက်ဟောက် ဗိမာန်တော်’ နွို့ ဘာတဲင်းပွို့ကြမဲ့ဘို့နွို့လဲဉ်း ပွို့နွို့နား ကလုဲင်မဲ့နာ့ခမ်းအွံဉ် မာရက်တောင်မြကိုး” နွို့ဟောဖြိုမနနဲ့။ 47 နွို့ခေါင်း ကိုယ်တော်ယေရှုနောင်း ကောင်ဗိမာန်တော်နွို့ လို့စေ့ကွက်နား ကရီအာမနနွို့နဲ့။ စနွို့လဲ ပုရောဟိတ်အကုန်းအပေ့ဘို့ဘက်၊ ဆာယာပါလိတ်ကျမ်းဘို့ဘက်န လို့မျိုးဂျူးအကုန်အပေ့ဘို့ဘက်နောင်း ကိုယ်တော်နွို့ မောင်းဗီနွို့ ကြိုးစားကြဘို့နွို့လဲဉ်း 48 လို့မေ့မေ့နွို့နောင်း ကိုယ်တော်ဘာ့ဟောဘာ့ကရီမဲ့ဘို့ဘက်နွို့ အာရုံစိုက်တွို့ထာ ကမ်းကြဘို့နွို့ခေါင်း တာယို့နာ့ဇာ့နွို့နား ထွိကောကညွမ်းနည်းလမ်းနွို့နဲ့။ နည်းလမ်းနွို့ ကြံစည်တွေးတောနိုင်နွို့လဲ လာ့ဟိုကောနွို့နဲ့။ |
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.