Yuuda 1 - NEAJEEDA EESH BEA BUUNEESSEAN

¹ Yuuda, soomjeanda Yeesu Gristo was oorjeeda geennyea Yakkobo, Heeda fuga suguursa, abwariinyi aba jeeda Aseetta was Bwaabwa ak geettiiwsa Yeesu Gristo:

² Gagasa elakkuneegwa baydeayda, ea hoyyoo, nea gegooneegwa bariinyeega.

Ginealshoodiga ng'uyyeega

³ Fuga abwariinyi, geagasayi muuchchi dang'oorneegwa iitta lealeanoodeanya bea geallaan, ak ghadaayi ghwahit gideaba geang'oorneegwa nea geamuscheegwa ak geeng'allealleesi masaweega ghayi sugu nibwagi ak ea majeebiikta siittaw fuga ghaydidi.

⁴ Aba gideaba gheatta ninyas fuga mwaatkwa gaseadayyi aba makcheameeda ghang'eada garayi ak geegwalu aba girgweaksiinda, fuga maba aseetta hutteawi dagheerjeandumeeda Aseetteanya ak ghoabuutta jeeda hiseadayeandumeeda nea ghwashaang' Siideanya haw assakkalealla was Ng'uttamiida, Yeesu Gristo.

⁵ Asi ghamneawa geegaasayi deapkeaneegwa, earappeadi siirukuneegwa muuchchi nibwagi ak ea maygudeebiikta, gideaba dea ghayi lealna buuneeda jeeda ng'eanyiida Misri, imuchchu ghwalas uhuudeaba fukka mwamwasaan.

⁶ Nea malaykajeega mang'ulla muuchchi hoorgajeega nyaawa ak ghang'amwa heeda eajusu abiitta ea nirattiisa niny jeeda munyaloalajeega maygammuudean aba jeeda misaneeda ea ghwahitta eaweetta haw bea girgweaksiindean;

⁷ gawuurji Sodooma ea Gomoora ea mujiinajeega neekkeewa, fukka abeeda gwasna ng'asheega munyas gawuurji gidaghayi sin fukka nea geayaat geeshta ng'asheega saseeda nea geegala ak ghwanyas girgweaksiinda beasta manda muudeanooda.

⁸ Ak eara fiisu aba jeeda girgweatka nyaawa ghang'uda saseenuuka nyaawa ririnyeanda, ak ghaheawa gheambalmeeda ak geeng'ng'eawi haleanjeeda gheambiideadi.

⁹ Nea Mikkaeleeda was malaykajeanda haw, gang'alealii sea meang'nyeandeenda, nea gwasheang'nyeesa saseeda Muusa, mii gabadaksa rukunooda ging'weakka appadayda girgweageeda mida badaydaannyi, geaghus gideaba gwayeeshsha, “Gagasa goowoowseey Ng'uttamiida.”

¹⁰ Nea fiisu goong'eawi haleanjeeda mwanala, nea aba haleanjeetta nal amwadiin iissa gwasin gawuurji diyeanga manda fughareenga, gajeelas uhuuda.

¹¹ Dashageeda saawa! Aba gideaba ghwaat geeshta naweeda Gaini, ak ghwanung'waada geat ghwanyas ng'asheega munyas bea Balaamu, ak goosha aba gidaghayi heawatta Goora.

¹² Suu geeyeatta ghuussi aba ghweelmajeegeagwa, aba damanda leeshoodeang'wa iyoabwachchi geat, nea iissa goong'ulayi geat; shamooghuutka manda beega, nea iissa ghwaat jeammeeda; geediga manda haghweega doomeelda shing'da, nimeewa deabiyyeenya, ak gealoatta;

¹³ laweajajeega hees bea basooda, jakkiisa humng'eeda furghooda aba baspaseega nyaawa; miinga neayi nea heeda hiing'aada gwanda misaneeda haw sittiiw ea ghwahitta damanda manda muudeanooda.

¹⁴ Appadaydeaba suu Enokki aba seaygeedeaba ispwa ng'eada Adamu gayghwaramoaran, nea gwayi, “Ng'ulla, Ng'uttamiida ghwaan nea goodeana malaykajeagaaschi meammu eyiida, gwanuuseada aba girgweaksiinda,

¹⁵ ak goorgweaksa buuneessean, ak ghoadaw gidinyeanda buuneessean meawalla Aseetta, aba searoojiga nyaawa sean maba Aseetta ghayi nisin aba gitta magassiida Aseettean, ea aba haleanjeeda ng'weani rukku siida ring'eeda meawalla Aseetta appadaydaannyi”.

¹⁶ Fiisu inyeessa ghoaniikgh, fuga mideawa sichcheeda, inyeessa ghwaat geeshta ng'asheega nyaawa gasa, fuga hees ghuussi gwara geat, reengani buuneeda ak ghwanyas gheatta gidagasa.

Miinda gheang'da ea gichchea eabeada

¹⁷ Asi agooga fugeasu abwariinyi, oapkaada, ng'asheega ghayi bay gwargu giijasoodiga Ng'uttamiideanya was Yeesu Gristo;

¹⁸ nea gwayeeshshiineegwa, “Eaweeda huydean gaygwanda fuga inyeessa jea gwajuuga buuneeda, nea ghwaat geeshta gassooda ng'asheega nyaawa meawwalleawana Aseetta”.

¹⁹ Suu fuga inyeessa ghwanung' ghwaan dardeayda gil, fuga ng'eanyiida, mandeawana Guroorooda.

²⁰ Nea agooga, fuga abwariinyi, amajeegiitta appadayda masaweegeagwa ghaydidi muuchchi; nea ghoamwaashchi Aseetta aba Gurorooda Ghaydit;

²¹ afrageat aba jeeda bariinyeega Aseetta; nea ghoammughu baydeayda Ng'uttamiideanya was Yeesu Gristo, ea ghwahitta eaweega manda muudeanooda.

²² Anung' ghamwas mwaatkwa, gea mideawa machmajeega;

²³ alealni mwaatkwa, nea ghoassealdaawi jeeda beasta, nea mwaatkwa goobayyiidi aba muuwda, nea ghoasichchi eara hang'da sung'uda ririnyeanda saseeda.

Moashta ghawooda ea duumsheesiinda

²⁴ Asi ghamneawa aba heeda ninnyeeda ammu ghwanung' eamooppeadani ak ghwaadeagwa nea meeyeatteweegwa ghuussi aba madeeda gigheambiittaannyi aba hooseaneega,

²⁵ heeda Aseetta bwageaw, lealnoochcheandeanya aba naweeda Yeesu Gristoyda was Ng'uttamiideanya, daba gigheambiitta niny, ea hawunda, ea sugoochcheandumeeda, ea gheambalmeeda, dea ghayi ng'eada garayi, ea ghoaw ghamneawa, ea ghoaw damanda manda muudeanooda. Amin.