Yohaana 9 - NEAJEEDA EESH BEA BUUNEESSEAN

Yeesu ghoahaap siida siji nea ng'oaw

¹ Eaweechcha ghang'atta ak ghwadaa siisi ghayi siji nea ng'oaw.

² Iiduw ghoanyaash ginealangaaschi niny nea gwayeeshsha, “Rabi, gwasin ng'eaha ring'eeda, gwasin siisi ghana sin ghwaan ea ghaamwat inyas geeji nea ng'oawiini?”

³ Ghwasha Yeesu nea gwayeeshsha, “Mii gideaba nisin siisi ring'eeda gil, ghana ghwaan ea ghaamwat, geebaysiina ghwadaajiit gadiyoojiga Aseetta aba niny.

⁴ Gammiissa eesna gadiyoojiga siida ajeaknean, iiduw ea askweari; ghwahidu eaweeda, ak ea mayghoammu siida gagadiiy.

⁵ Hiji duu dandeewa jeeda ng'eanyiidean, aniini geawoschi weeshinda ng'eanyiida.”

⁶ Ahiit baloaldaannyi gwasin sheang'ng'weeda aba ng'usheega ak ghwayeashsha gheanyangeaba siitta ng'oawiin,

⁷ ak gwayeeshsha niny, “Una ak gihuuni gheanyangaagu aba jeeda dabascheanda Siloamu” (nea gideaba dea sichcheakta). Ng'atta gawa Siitta gihuushshi ama ng'atta gabiigu nea ning'wearda.

⁸ Gwayi fuga ascheayi sea fuga eajusu nidaaha siitta ammwadi nea gamusisachchiin, gwayi, “Neada siisi ea mii siitta apteadayyi nea gamusiisachchinii?”

⁹ Gwayi mwaatkwa, “Ninyi;” nea mwaatkwaa gwayi, “Manda, geaghus gideaba gawurji sea niny.” Gwayeeshsha, “Siida aniini gil.”

¹⁰ Geyeeshsha, “Ghwajaadattaan gheanyangaagu?”

¹¹ Ghwasha Niny nea gwayeeshsha, “Gwasin siitta suguura Yeesuhiin sheang'ng'weada ak ghwayeashsha gheanyangeasu amahit gwayeeshshinean, ‘Una akkihuushshi aba Siloamu;’ ng'atta geawi ak geahuunnyi gheanyangeasu amahit ghangweardi.”

¹² Geyeeshsha, “Niny ghamneawa gwanda yeenu?” Hean gwayeeshsha siidida, “Aniini mwaanali.”

Farisayajeega gwasikteawa gissihaapta siida

¹³ Ng'atta geayaat siitta ghayi ng'oawiin heeda Farisayajeega.

¹⁴ Nea abeeda eaweechcheandida sina Yeesu sheang'ng'weada ak ghwayeasha gheanyanga siida ak ghwajadaan ea eaweeda Sabattohi.

¹⁵ Hean ghoanyaash Farisayajeega gichcha siitta ginnyasta ging'weerdeayda? Ghwalamda niny ak gwayeeshsha saawa, “Ghwayeasha gheanyangeasu sheang'ng'weada amanga'atta geahuunnyi ak ghang'weardi.”

¹⁶ Gwayi Farisayajeega mwaatkwa, “Siisi maleapna heeda Aseetta aba gideaba moang'ng'waanya Sabatto.” Nea mwaatkwa gwayi, “Gayghoammuustaan siida ring'eeda gwasin gwadeagooda sunu? Hean ghwadarda buuneeda.”

¹⁷ Gebiikta gichcha eennyaash siitta ng'oawiin, “Asi ghamneawa siisi inijaat gheanyangaagu giyeaniin ang'iing'i appadaydeaba siisi?” Gwayeeshsha, “Siisi sibaneeda gil.”

¹⁸ Amwamwasa Fuga Yahuudi gideaba siitta ghayi ang'oaw ak ghamneawa aning'wearda, ea eeyibwak ea gaguursa ghwaan ea ghaamwat.

¹⁹ Hean geannyaash ghwaan nea geyeeshsha, “Nii balleandeang'wa oyeennyi ghayi geeji nea ng'oawi? Ak ghamneawa ghwanyastaan ging'weerdeayda?”

²⁰ Ghwasha Ghwaan ea ghaamwat ak gwayeeshsha, “Aseasa geanalli gideaba nii balleandeanya gil, ea gideaba geeji nea ng'oaw;

²¹ ak ginnyasta ging'weerdeayda aseasa ameanali, ak geabwadi nii eara siitta jaat gheanyangaaschiin ameanali. Oannyaasha niny aba gideaba siinniheedu gil ghoammu gwargu niny.”

²² Gwarukuteaydunu ghwaan ea ghaamwat aba gheawalmeeda fuga Yahuudi aba gideaba fuga Yahuudi nihelleesa gideaba siida wassean jea gwargu aba ghuuttaannyi gideaba Yeesu niny Gristohi gajerrutteawa jeeda ghoriida sinnealshachcheewa.

²³ Ak ghoaw gidarukuteawa ghwaan ea ghaamwat gideaba, “Niny siinniheedu gil oannyaasha.”

²⁴ Gabiikta deaba iyyeenya gaguursa siitta ghayi ng'oawiin ak gwayeeshsha, “Duumshesiina Aseetta; aseasa geanalli gideaba siisi gaba riing'a.”

²⁵ Ghwasha nea gwayeeshsha, “Siisi ibea riing'a aniini amwaanali, ak ghanalli aniini ng'ashaanjagi nea gideaba ghayi geawoschi ng'oaw ak ghamneawa anang'weardi.”

²⁶ Geyeeshsha niny, “Gwahindaneayiin? Ghwajaattaan gheanyangaagu?”

²⁷ Ghwasha nea gwayeeshsha saawa, “Nigeawiit darukuneegwa ak ea molleysiini iit, ghwasaan anda googasayi ayiinya gichcha? Eara agooga googasayi ahuuwa ginealangaaschi?”

²⁸ Geng'ng'eawi nea geyeeshsha, “Ang'iing'i guwosi ginealaneadaannyi ak aseasa gewoschi ginealanga Muusa.

²⁹ Aseasa geanalli gideaba Aseetta ghayi gobalool Muusa amaduukku siisi ghanyea meanali eara helleabu.”

³⁰ Ghwasha Siidida, “Ng'asheanji ghwanung' ghaham fii ng'eanyi! Agooga mwoanali helleabu ak anijaat gheanyangeasu.

³¹ Geanalli gideaba Aseetta mooleysiina iit fuga ring'eega, nea siida iidea gadoowani Aseetta nea gwasin gitta bwariiy ninyiin, gagoleeysiit Aseetta.

³² Ghang'eada dea subwada ng'eanyiida miyeanyiinya siida jaat gheanyanga siida ghayi siji nea ng'oaw.

³³ Siisi imaleapna heeda Aseetta ea mayghoammu gwasin eara gil.”

³⁴ Ghwasha Saawa ak gwayeeshsha, “Ang'iing'i gejiilseey jeerring'eeda haw ak gajanaleasa?” Hean gerrutta jarooda.

Ng'oowuunnda gurorooda

³⁵ Ghwayiiy Yeesu gideaba sirruutta jarooda niny, hean iiduw nea ghwadaa gwayeeshsha, “Ang'iing'i gumwasi Balleanda Siida?”

³⁶ Ghwasha ak gwayeeshsha, “Siida Mureeda, ng'eaha gil, ak abeeda gaydamwas niny?”

³⁷ Gwayeeshsha Yeesu niny, “Nidaahi niny, ak ea siisi abaloolnyiini.”

³⁸ Hean gwayeeshsha, “Ng'uttamiida, Namwaschi;” ak ghaghadoawan niny.

³⁹ Gwayeeshsha Yeesu, “Aniini ghaawunnyi badayda ng'eanyiida aba girgweaksiinda ak abeeda fuga mwoang'wearda gayghoang'wearda nea gang'oowwiidi fuga ghamneawa ang'wearda.”

⁴⁰ Gwayiing'shi fuga mwaatkwa bea Farisayajeega ghwanyawa neekki ng'asheekka ak ghoanyaash gideaba, “Earaseasa gewoschi ng'oowwi?”

⁴¹ Gwayeeshsha Yeesu saawa, “Ghwanyawa iyowoschi ng'oowwi ea majandeawana gidinyeanda, ak ghamneawa goyeennyi agooga, ‘Aseasa geang'ng'weardi,’ abeeda gidinyeannyeekkeagwa gudugwanda heeda.”