Yohaana 21 - NEAJEEDA EESH BEA BUUNEESSEAN

Yeesu gabussa ginealan ispwa

¹ Iing'atta hiji gabiikta Yeesu gohiimsa geaw ginealangaaschi aba ghuutta basooda Diberiya, ak gohiimsiindunu geaw.

² Simon Betro, ea Domasoyda suguura Saleaygweanda ea Nattanaeliyda ng'eanyiida Ganeeda Galilaaya, balloojiga Sebedaayo, sea ginealangaaschi suuk iyyeenya, nea abeeda gwandeayi sean.

³ Gwayeeshsha Simon Betro saawa, “Gaydawa daleallu ghweayeega.” Gwayeeshsha saawa niny, “Earaseasa gajetteayeena sea ang'iing'i.” Ng'atta godeayi ak gwading'da maleambooda; ak eaweedida amwanyasa eara gil.

⁴ Muuchchu nea gorearu aseetta ghaminaada Yeesu aba ghuutta basooda; nea ginealanga amwanala gideaba Yeesu gil.

⁵ Hean gwayeeshsha Yeesu saawa, “Diibiga, gondeawi ghweayeega?” Ghwasha saawa nea gwayeeshsha, “Manda.”

⁶ Gwayeeshsha saawa, “Ajaksiina gheareedanga murdeeda maleambooda bea geattinda dugwa, ak gajanyasa. Ng'atta gwajakta gheareedanga ak ghwaraay gongiiru aba seang'ayda ghweayeega.”

⁷ Iiduw gwayeeshsha ginealaneedida bwariiy Yeesuun Betro, “Nii Ng'uttamiida!” Iiy Simon Betro gideaba nii Ng'uttamiida gil, gageanu hang'daannyi ak gwaradischeewa aba gideaba gwachchi adawiish, amang'atta gwadeambiirsa jeeda beega.

⁸ Hean ghapka Ginealanga suurja ea ghwahidu ghuutta basooda nea gongiiru gheareedanga nea ghwanyiit ghweayeega, nea abeeda eamisheageewa ng'eanyiida ghajaam aba iisidasaada geeshanga gayghwahitta geeshan bughala hitteayda ghuutta beega.

⁹ Hitta ng'eanyiida ghajaam ghwadaa beasta ghuurga nea sughwar nea gwanda beasta ghweayeega ea mukkatte.

¹⁰ Gwayeeshsha Yeesu saaw, “Ayeanni hiji ghweayeega mwaatkwa olealu ghamneawa.”

¹¹ Hean gwading'da Simon Betro jeeda maleambooda ak gaksu gheareedanga ea ghoahiidu ng'eanyiida ghajaam nea ghwanyiit ghweayeega hees nyiit bughala ea haradam ea damassanmwagu; earappeadi saang'a ea gwadeenuun, ea mii gang'achcheaweada gheareedanga.

¹² Gwayeeshsha Yeesu saawa, “Apkaani ajaada ghuussi.” Nea abeeda ghanyea manda aba jeeda ginealanga dea badaksa ak ghoanyaash gideaba, “Ang'iing'i ng'eaha?” Aba gideaba ghwanal Ng'uttamiida gil.

¹³ Ghwaan Yeesu ak gageanda mukkatte ak ghoadaw saawa ak gwasindunu earaba ghweayeegiga.

¹⁴ Nii deaba samwagu gil aba gihiimsinda ahiimsa geaw Yeesu ginealangaaschi aba iing'atta dunnooda duunna miyeeda.

Yeesu ea Betro

¹⁵ Iing'atta nea nijaat ghuusiga ghoanyaash Yeesu Simon Betro nea gwayeeshsha, “Simon, balleanda Yohaana, gibwarinyaan ea laabwana hoowa orjoosu?” Gwayeeshsha niny, “Eah, Ng'uttamiida; ginali gideaba aniini ghaabwariinyeay.” Gwayeeshsha, “Ahaaghwana gisilgeasu.”

¹⁶ Gabiikta gwayeeshsha niny deabiyyeenya, “Simon, balleanda Yohaana, gibwarinyaani?” Gwayeeshsha Betro niny, “Eah, Ng'uttamiida; ginali gideaba ghabwarinyeay.” Gwayeeshsha, “Ahaaghwana gisilgeasu.”

¹⁷ Gabiikta ghoanyaash deaba samwagu, “Simon, balleanda Yohaana, gibwarinyaani?” Gagiisan Betro aba gideaba geannyaash deaba samwagu gideaba “Gibwariinyaani” Gwayeeshsha niny, “Eah, Ng'uttamiida; ang'iing'i ginali haleanjeessean, ang'iing'i ginali gideaba aniini ghabwarinyeay.” Gwayeeshsha Yeesu, “Ahaaghwana gisilgeasu.

¹⁸ Aba huumwa, aba huumwa, geayeeshshineey, ghayi nea guduwosa gheareemaneeda iissa gimmuusi rada manandaang'u ak guwi heeda wassean igasayi; amaduw nea nihuwi gweargweeda, gajadoabiiwa geattingaagu, ak ghwarannyi siinuut ak ghwaannyi heeda ghwanyawa migassi una.”

¹⁹ (Aba inyas ghwanyaashtunuun gohiimsa Betro gichchea ghameawda ak ghoaghambiit Aseetta). Ng'atta ng'asheesu gwayeeshsha, “Eanni geeshteanyu.”

Yeesu ea ginealaneeda nuut

²⁰ Iiduw ghwayamgeaw Betro ak ghwadaa ginealaneetta bwariiy Yeesuun, nea ghwaat geeshta, nea diitta ghayi diiw geaw aba daghattannyiin gil shing'ada damanda agiischooda nea ghoanyaash gideaba, “Ng'uttamiida siida jea ghwalaapnyi bwadaw ng'eaha?”

²¹ Daa Betro niny gwayeeshsha Yeesu, “Ng'uttamiida ama oorjeani?”

²² Gwayeeshsha Yeesu niny, “Iyeagasayi gobiida badayda ng'eanyiida ea dabiigu gwasawannyi naaha? Ang'iing'i eanni geeshteanyu!”

²³ Hean ghaghayda iittida aba jeedeaba oorjookka gideaba ginealaneetta mayghami; nea Yeesu niny ea mii gwayeeshsha, ginealaneani mayghami geaghus gideaba gwayeeshsha, “Iyeagasayi gobiida badayda ng'eanyiida ea dabiigu, gwasawannyiini?”

²⁴ Ginealaneani nii dea muuwwu ng'asheesuun gil, ak ghang'waar; ak geanalli gideaba muuwwunoadaannyi huumwa gil.

Huydeanda

²⁵ Gwanda ng'asheega saang'a sin Yeesu; nea inyeetta ghwanyawa geang'waar sean, ghaaghanyi eara ng'eanyida gwachchi mayghoammu godiiw gittabwajeega jea eang'waar.