Yohaana 20 - NEAJEEDA EESH BEA BUUNEESSEAN

Bung'eeda manda jeeda siida

¹ Hean eaweeda madeeda bea wikkajeanda, gawa Mariya Magdaleena heeda bung'eeda gheatta beashatta nea gudeamisana ak ghwadaa lagheaneeda nea sigeanda aba ghuutta bung'eeda.

² Ng'atta ghafwach ea ghwahitta heeda Simon Betro ea ginealaneeda niirja ghayi bwariiy Yeesuun ak gwayeeshsha, “Sigeanda Ng'uttamiida aba jeeda bung'eeda ak ameanali heeda siyiin.”

³ Gaweay Betro sea ginealaneeda niirja ea ghwahitta heeda bung'eeda.

⁴ Gwasalda duwaawi, amaduw ghafwach Ginealaneeda niirja muuchchi ea ghoadaraam Betro, ak gosheeda ghwahitta heeda bung'eeda;

⁵ ghwahiiy geaw ak gong'wearsa jeeda shoomanda ak ghwadaa hang'weakka bumbuni mida hoowa, ak ea moabitta jeeda.

⁶ Ghwahidu Simon Betro, gweadu geeshta amahidu gawa jeeda bung'eeda; ak ghwadaa hang'weakka aba ng'eanyi,

⁷ nea weastida, heetta sirada uhuudaanyiin ea meanung' ng'wandeayi sea hang'dida, nea abeeda asimughut ak geayiin hichpa geaw.

⁸ Iiduw eara Ginealaneeda ghwanyawa asheeda ghwahitta heeda bung'eedean, earada ghoabitta jeeda bung'eeda, ak ghwadaa ak ghamwas;

⁹ abeeda mii ghwanal ng'oruutka ginnyaashta, bea gideaba gabean ea gaygwaduunna miyeeda.

¹⁰ Hean gabiikta Ginealangiga gaweay ghoah.

Yeesu gabussa Mariya Magdalena

¹¹ Abeeda Mariya ghaminaada aba murdeeda bung'eeda nea goyyeawda, damani duu goyyeawdewean ghwahiiy geaw gong'wearsa jeeda shoomanda bung'eeda;

¹² ghwadaa malaykaji iyyeenya akkwa hang'weakka eashish nea gobiitpiit aba heeda heetta siyiin musta Yeesu, nea deamanda deascheeda uhuuda niirja gwanda deascheeda geeshanga.

¹³ Gwayeeshsha niny, “Iyya, ghwasaan anda giyyeawdi?” Gwayeeshsha gheamatta saawa, “Sigeanda Ng'uttamiideanyu ak amwaanali heessiyiin.”

¹⁴ Ing'atta rukunoodeaba ng'asheesu ghwasachsaghaat bwadaw ak ghwadaa Yeesu nea ghaminaada ak amwanala gideaba Yeesu gil.

¹⁵ Gwayeeshsha Yeesu niny, “Iyya ghwasaan anda giyyeawdi? Gigaseadayyi ng'eaha?” Duugwayeena Mariya gwadeeppea siida fur madamnyeanda gil gwayeeshsha, “Siida mureeda ideeppa eanigeandi ang'iing'i girukunean heeda iyiin, ak gaydawa aniini dageanda.”

¹⁶ Gwayeeshsha Yeesu, “Mariya.” Ghwayam geaw ak gwayeeshsha aba iitta Ebraniya, “Rabooni!” (nea gideaba Ginealshoochcheanda gil).

¹⁷ Gwayeeshsha Yeesu niny, “Ading'ng'wanyaan, aba gideaba mii dawa heeda Bwaabwa; asi ng'eada una heeda oorjooga iyya ak giyeeshshi saawa, aniini nascheang'di dawa heeda Bwaabwa nea Ghweandeang'wa gil, heeda Aseetteanyu nea Aseetteang'wa.”

¹⁸ Ghang'eat Mariya Magdaleena gawa ak gwayeeshsha ginealanga, “Naadaayi Ng'uttamiida;” ak gwayeeshsha saawa gideaba nirukusa ng'asheesu.

Yeesu gabussa ginealangaaschi

¹⁹ Iiduw nea niiw shing'adeeda eaweettida bea madeeda bea wikkajeandean abeeda ea nibassa geat Ginealanga jeemba ghaaw, nea abeeda asirat gidaghuut aba gheawalmeeda fuga Yahuudi, deagheatta ghwaan Yeesu ak ghamiinaada appugusta nyaawa ak gwayeeshsha, “Abeaha Hoyyoo.”

²⁰ Iing'atta rukunoodeaba ng'asheanji gohiimsa geattingaaschi ea gisheajeagaaschi. Hean gahoosan Ginealangiga muuchchi iidaa Ng'uttamiida.

²¹ Gabiikta Yeesu ak gwayeeshsha gichcha, “Abeaha Hoyyooh. Gawuurji gidaghayi ajeakteaydanean Bwaabwa, asi earaniini geajeaktaneegwa agooga.”

²² Ahiit rukunoodeaba ng'asheesu gaguussa jeameada nea gwayeeshsha, “Ong'ng'waanya Guroorooda Ghaydit.

²³ Nea iyosammiisi ring'eega buuneeda, gajeesamsa, ammosamsiini, ea majeesamsa.”

Yeesu sea Domaso

²⁴ Damani Domasodida bea jeedeaba oorjookka attamaniyyeenya suguura Saleaygweandean, abeeda ghwanyawa ea mandeawana oorjooga suurja damandida hinna Yeesuun.

²⁵ Hean gwayeeshsha Ginealanga suurja niny, “Sidaayi Ng'uttamiida.” Gwayeshsha niny saawa, “Imeadeaksiini geattingaaschi ghuusiga musumwaarajeega ak ghang'ng'waanyi monneedeanyu heeda haabwa deanneaduutka musumwaarajeega nea ghayiinnyi monneedeanyu gisheajeegaaschi ea maydamwas.”

²⁶ Muchchu nea ning'atta eawoji sis gabiikta gichcha gabassa geat ginealanga jeeda ghooriida nea abeeda eara Domaso gwanda hiji. Abeeda gidaghuudajeega sirat, deagheatta ghwahidu Yeesu ak ghaminaada aba jeannyaawa ak gwayeeshsha, “Abeaha hoyyoo.”

²⁷ Ng'atta gwayeeshsha Domaso, “Goona monneadaang'u iina hiji, ak gung'ulayi geattingeasu; ak gugooni gattindaang'u ak ging'ng'waanyi gisheajeegeasu; ak ea aduwosi siida mwamwasa, huwa siida mwas.”

²⁸ Ghwasha Domaso nea gwayeeshsha, “Ng'uttamiideanyu ea Aseetteanyu!”

²⁹ Gwayeeshsha Yeesu niny, “Gumwasi aba gideaba gidayaani? Ghang'wana fukka mwadahan amaduw ghamwasiin.”

Gissibaysiina gittaaboani

³⁰ Yeesu gwasin aba madeeda ginealangaaschi gwadeagwajeega suuk duguuga saang'a miyeang'waar aba jeedeaba gitaaboani;

³¹ suu geang'waar aba gideaba abeeda ghoamwaschi gideaba Yeesu Gristo gil, Balleanda Aseetta, amabeeda oamwaschi ghoanyaschi eaweega aba gheawungaaschi.