Yohaana 19 - NEAJEEDA EESH BEA BUUNEESSEAN

¹ Hit ghoadayda Bilato Yeesu eabwara mughowooda.

² Gageanu Shirikkara ak gwasin shiipka halaghweenga, amahit ghwayiin uhuudaannyi, ak geshshuup hang'da oomu;

³ hean geweay madeadaannyi ak geyeeshsha, “Seayu, Sugoochcheanda Yahuudi!” Ng'atta geabwar aba baneaguukka.

⁴ Gabiikta Bilatto jarooda ak gwayeeshsha saawa, “Adaaha gearuudu siisi jarooda aba gideaba aniini mwadaahi gidiinyeandaannyi.”

⁵ Gwaritta Yeesu jarooda nea gwanda uhuuda shiipka halaghweenga nea gookkwa hang'doom. Gwayeeshsha Bilatto saawa, “Ang'ulla siida!”

⁶ Daa ashoohoodiga hees sea furiischoodiga gojuur nea gwayi, “Angoora niny, Angoora niny!” Gwayeeshsha Bilatto saawa, “Ageanda agooga nea goabwageat amang'atta gongoorji, aba gideaba aniini mwadaahi gidinyeandeaba siisi.”

⁷ Ghwasha Fuga Yahuudi nea gwayeeshsha, “Aseasa gendeawi deaweeda amaduw aba deaweedeeni ea gideaba gammiisa miyeeda gil, aba gideaba niny gwahinda geaw Balleanda Aseetta.”

⁸ Iiy Bilatto ng'asheesu, hean ghabeal muuchchi;

⁹ gabiikta jeeda gheeda sugoochcheandumeeda ak ghoanyaash Yeesu nea gwayeeshsha, “Ang'iing'i gileabu yeenu?” Amwasha Yeesu ng'asheanji.

¹⁰ Hean gwayeeshsha Bilatto niny, “Mayrukunean eara gili? Minali gideaba geandeawi uurda jea deattinaneey ea dea jea deangooraneey?”

¹¹ Ghwasha Yeesu nea gwayeeshsha, “Gwachchi miimmuusi mideawana uurda appadaydeanyu imegoonnyi aba humng'eeda; amaduw siitta iinan gattingaguun gwandeawa ring'eeda haw muuchchi.”

¹² Ghang'eada damandida gagasa Bilatto gheatta gichchea gwasiksiinda niny, gojuur Fuga Yahuudi nea gwayeeshsha, “Iisiksi siisi eamuwosi siida duupchi Gaysaari, aba gideaba siida wassean gasa ghoaw sugoochcheanda gwanda washta Gaysaari.”

¹³ Hean iiy Bilatto ng'asheesu goruutta Yeesu jarooda amahit goopteada aba uhuuda hoorgeeda silachcha girgweaguutka mida heesuguura Lagheaneeda bwarak, nea aba iitta Ebraniya geguura Gabatta.

¹⁴ Abeeda damandida gaba aseetta lah nea eaweechcheanji getting'ding'da aba Basakka; gwayeeshsha fuga Yahuudi, “Ang'ulla sugoochcheandeang'wa!”

¹⁵ Gojuur Saawa muuchchi nea gwayeeshsha, “Ang'aamwana hiji, Ang'aamwana hiji, Angoora!” Gwayeeshsha Bilatto saawa, “Gaydeangoor sugoochcheandeang'wa?” Ghwasha ashoohoodiga hees nea gwayeeshsha, “Aseasa mendeawani sugoochcheanda geaghus Gaysaari.”

¹⁶ Ng'atta gageanu Bilato ak ghwayiin geattinga nyaawa ak gengoor.

Yeesu gengoor

¹⁷ Gegeanu Yeesu eruutta jarooda nea ghwasar behiidaannyi ea gwahitta heessuguura geapkeeda huuda nea aba iitta Ebraniya geguura Golgotta.

¹⁸ Gengoorsa uhuuda behiida sea fii suuk iyyeenya dea manda meakweeda geattinda dugwa niirja gwanda meatkweeda geattinda ghaadaam, nea Yeesu gwanda dageascheeda nyaawa.

¹⁹ Gang'oorsa Bilatto uhuuda behiida; ng'asheega siyi, “Yeesuuyda Nasareetti Sugoochcheanda Yahuudi.”

²⁰ Hean iissa ghoassoamwa Fuga saang'a bea Yahuudi ng'asheekka sung'oorsa uhuuda behiidean, aba gideaba hoowa singoorsa Yeesuun ea neekkeewa mujiini; nea geang'waara iitta Ebraniya ea iitta Lattiini ea iitta Yunaani.

²¹ Ng'atta gwayeeshsha ashoohoodiga hees Bilatto, “Adung'waari ‘Sugoochcheanda Yahuudi,’ Ng'waara gideaba, ‘Siisi gwayi, Aniini geawoschi Sugoochcheanda Yahuudi.’”

²² Ghwasha Bilatto nea gwayeeshsha, “Ginnang'waarji ning'atta ng'oorda.”

²³ Ing'atta gingoorda Yeesu gageanu Shirikkara hang'weakkaaschi ak geesin gharmuchcheew ang'wan, ak gaba siisi sittaw gharmuchchandaannyi; ghabwada gageanda eara hang'da geaw gul ng'eanyi. Nea abeeda hang'dida geanap nea agi ghang'eada uhuuda ea gagul ng'eanyi;

²⁴ hean gabaloola saawa gideaba, “Adeabwaashchi ghang'wana geng'alealleesi ak geadaayi siichchea gageanda.” Ng'asheanji geesin ak gwasa gida ghayi nyah Ng'oruutka bea gideaba, “Ghoadabwaarda hang'weakkeasu aba jeannyaawa, Ak gang'alealleesa hang'deanyu.”

²⁵ Hean gwasindunu shirikkara. Abeeda murdeeda behiida Yeesu ghamiinaada Ghaamwat ea huda ghamaghaamwat, ea Mariyaayda was gatmooda Gleoppa, ea Mariya Magdaleena.

²⁶ Daa Yeesu nea ghamiinaada ghaamwat nea gwanda murdeeda ginealaneetta bwariiyiin, gwayeeshsha Yeesu ghaamwat, “Iyya, ng'ulla balleadaang'u!”

²⁷ Hit gwayeeshsha ginealaneetta, “Ng'ulla geamadu!” Ghang'eada damandida ghwaat ginealaneetta gwandeawa aba gheannyi.

Miyeeda Yeesu

²⁸ Iing'atta nea ninal Yeesu gideaba niisha ng'asheega sean, gwayi, (ijeagwasa ng'oruutka), “Ghwaagan muwoash.”

²⁹ Nea abeeda gwanda hoowa gweriida nyiit beega ng'weani bea haghweega geetta. Hean gegeanu gidawas ghabuschcheanda ak geappuutta jeeda beega ng'weani ak geahaaktaawa digheechcheanda ak geayiin ghuuttaannyi.

³⁰ Ng'atta nea ninukghuta Yeesu beekka ng'weaniin gwayi, “Niisha;” ak ghwahiing'u uhuuda ak ghoabitta gurorooda.

Yeesu geang'ut gisheajeega

³¹ Abeeda eaweeda giding'ding'deayda, ea mammiissina gideaba gaygobiida muscheekka iheenga behajeega eaweeda Sabatto (aba gideaba eaweeda Sabatto eaweeda haw gil), gaweay gamus Fuga Yahuudi Bilatto ehirjeaweada geeshanga ak gegeanda.

³² Gaweay Shirikkara ak gwahirja geeshanga siida madeeda, ea geaba siitta bea iyyeenya; ghwanyawa singooruudayi sea ninyiin;

³³ iiduw nea ghwahitta heeda Yeesu ghwadaa gideaba nigeawiit ghami, ak ea mudugwahirjeaweada geeshangaaschi.

³⁴ Hean gageanu Siyagi ak ghang'ut gisheajeega Yeesu aba ng'utta, deagheatta gwardu foojeanda ea beega.

³⁵ Nea siitta daa nga'sheesuun gamuuwwu aba gideaba ng'asheega rugu gaba huumwa. Nea ghwanal gideaba gwarukku huumeanda ak abeeda ghoamwaschi.

³⁶ Ng'asheesu geesin gwasa ng'ooruutka, “Manda eara geapkeadaannyi jea eehirja.”

³⁷ Gabiikta gwayi ng'ooruutka suuk, “Gaygang'ula Fukka heetta ng'udiin.”

Bunyitta Yeesu

³⁸ Iig'atta ng'asheesu gawa Yoseefooda ng'eanyiida Arimattaya was ginealaneeda Yeesu aba makcheameeda, aba gheawalmeeda fuga Yahuudi, gamus Bilatto musta Yeesu ghwaat, ak ghoadaw Bilatto gheatta. Hean ghwaan ak gageanda mustaannyi.

³⁹ Deagheatta ghwahidu Nikkodeemooda ghayi weah heedaannyi eawa, ghwaan nea gweadu gharmuchcheanda sikkuuyi weapkeanda ea hideeda ng'andit nea ghwannyiit debajeanda ea dea agween iyyeenya.

⁴⁰ Gegeanda musta Yeesu ak gekkwealsa hang'weakka bumbuni sea haleanjeetta ng'andidiin aba seareetta bea fuga Yahuudi bea eaweetta bunyischodean.

⁴¹ Hoowa singoorsean abeeda gwanda madamnyeanji mwanang' nea jeedeaba madamnyeanji gwanda bung'eeni ris eaghurghur miyeebung'sa siida jeeda.

⁴² Iiduw aba ng'asheega Yahuudi bea eaweetta giding'ding'deayda, ea gideaba eaneekki bung'eeda muuchchi geyiin Yeesu jeedida.