Yohaana 17 - NEAJEEDA EESH BEA BUUNEESSEAN

Yeesu ghamwaash ghawooda appadayda ginealangaaschi

¹ Iiduw nea niihiit Yeesu rukunoodeaba ng'asheesu, gong'weersa humng'eeda ak gwayi, “Bwaabwa, nugul damanda; aghambiida Balleandaang'u, ak abeeda eara Balleanda ghoaghambiinnyi ang'iing'i,

² aba gideaba ghayi giidawi niny uurda appadahuukka buneassean ak abeeda ghoadaw eaweega manda mudeanooda fukka sean ghayi idawiin.

³ Nea eaweega manda mudeanooda ea nii gil, gideaba ghwanalnyi ang'iing'eeda was Aseetta huumwa ea Yeesu Gristoyda ghayi ijeagu.

⁴ Aniini naghambichcheay appadayda ng'eanyiida, ak anahiichchi gadiyeeda ghayi igonnyean dasin;

⁵ asi ghamneawa, aghambiidaan Bwaabwa, aba madeadaang'u aba gheambalmeeda ghayi eandeawi sea ang'iing'i nea miyeesin ng'eanyiida.

⁶ “Naanung' ghwanalnyi fukghayi igonnyean aba jeeda ngeanyiida; ghayi fugaagu gil amaduw gugonnyean aniini ghoaw fugeasu, ak ghamneawa saawa ea ning'ng'waay ng'ashandaang'u.

⁷ Ak ghamneawa saawa aninal gideaba haleanjeessean igonnyean gwaleabu headaang'u;

⁸ aniini naadawji ng'asheega ghayi igonnyean, ak saawa aning'ng'waay ak ghwanal humeanda gideaba aniini gealeabu headaang'u; ak anumwas gideaba ang'iing'i gijeaknean.

⁹ Ghamwaashchi Aseetta aba saawa; mwamwaashi Aseetta aba ng'eanyiida ghamwaashchi appadahuukka fuga igonnyean, aba gideaba gaagu;

¹⁰ geasu sean gaagu gil, nea gaagu ea geasu, ak geakghambiidan aba jeannyaawa.

¹¹ Ak ghamneawa aniini ea muttanda jeeda ng'eanyiida, amaduukku saawa gwanda jeeda ng'eanyiida nea ghaawunnyi headaang'u. Bwaabeeda Ghaydit, ahaaghwana saawa aba gheawungaagu ghayi igonnyean, ahaaghwana ea ghoaw agi nea gawuurji gissuwosti aseasa gilagi.

¹² Ghayi nea guttandeawa saawa iissa ghahaaghwi aba gheawungaagu ghayi igooni; aniini nahaaghwi saawa ak ghanyeamanda nii nuroat eara akkalealla geaghus balleanda ghayi was roodaneeda, gwasa ng'asheega rugu ng'oruutka.

¹³ Asi ghamneawa ghawunnyi headaang'u; ak ea nearukuti ng'asheesu aba jeeda ng'eanyiida, ak abeeda ghwanyas hooseaneegeasu muuchchi aba jeesinga nyaawa.

¹⁴ Aniini naadawuji ng'ashandaang'u; amahit ghwasit ng'eanyiida aba gideaba saawa maba ng'eanyiida, gawuurji gidameabeaheattani aniini ng'eanyiida.

¹⁵ Aniini mwamwaashi gideaba geandeawana jeeda ng'eanyiida, geagasayi gideaba gayfura aba gitta muyiin.

¹⁶ Saawa maba ng'eanyiida gawuurji gidameabeaheattani aniini ng'eanyiida.

¹⁷ Ammiinni, saawa aba huumeanda aba gideaba ng'asheandaang'u huumwa gil.

¹⁸ Gawuurji gidaghayi ijeakteaydanean jeeda ng'eanyiida, gwasnu earaniini neajeakti saawa gaweay jeeda ng'eanyiida.

¹⁹ Amaduw anammiidu geaw aniini appadahuukka nyaawa, ak abeeda eara saawa geammiidu aba humeanda.

²⁰ “Mwamwaashi Aseetta aba suu akghwahit, ghamwaashi earaba giikka jea ghamwasan aba ng'asheanda nyaawaan;

²¹ ak abeeda ghwoaw fiisu gilagi; gawuurji gidindeatti jeedeanyu ang'iing'i Bwaabwa, nea geandi aniini jeadaang'u, eara saawa gobiida jeedeanya, ak abeeda ghamwas ng'eanyiida gideaba guwosi siida ghayi ajeaknean.

²² Aniini naadawji saawa gigheambiitta ghayi igoonnyeaniin ak abeeda ghoaw gilagi gawuurji gisuwostti aseasa gilagi,

²³ aniini gaydeabiida jeannyaawa nea gibiidi ang'iing'i jeedeanyu; gideaballi gemmajeek ak ghoaw gilagi ak abeeda ghwanal ng'eanyiida gideaba ghayi giijeaknean ea gideaba gibwariinyi saawa gawuurji gidubwariiydanaan aniini.

²⁴ Bwaabwa, suu ghayi igonnyeaniin geagasayi dandeawa galeagasean aba hiji eandi sean, ak abeeda ghwadaa gigheambiitteanyu ghayi igonnyean, aba bwariinyeegaagu nea miyeabwat sindeetta ng'eanyiida.

²⁵ Ea Bwaabeeda doabiiwaat, ng'eanyiida mwanalnyi, duukku aniini ghanalleay; eara suu ghwanal gideaba ghayi gijeaknean ang'iing'i.

²⁶ Ak ea naanung' ghwanal ghawungaagu, ak gaydanung' ghwanal, abeeda bariinyeekka ghayi ibwariinyaan aniiniin goobiida jeesinga nyaawa, ak geabiidi aniini jeannyaawa.”