Yohaana 15 - NEAJEEDA EESH BEA BUUNEESSEAN

Yeesu sabiibuuyda huumwa

¹ “Aniini geawoschi sabibuuyda huumwa, nea Bwaabwa ea siida bea madamnyeanda.

² Gilinyoo ea damealleanda gil mida jeedeanyu iimaji haghweega, iissa ghwalach, nea gilinyoo ea damealleanda jihi iissa gwasissin, ak abeeda gwaji muuchchi.

³ Agooga simminneagwa aba ng'asheanda earukuneegwa.

⁴ Oppiidana jeedeanyu, nea geabiidi jeesingeagwa. Gawuurji gidamoammuusta damealleanda gwaji haghweega nea gaba geaw, nea mwanoasa sabiibu, gwasnu earagooga, moammuusi ajiila haghweega imoppiidani jeedeanyu.

⁵ Aniini geawoschi sabiibu, gowoschi agooga damealga. Siida abiida jeedeanyu, nea geabiidi aniini jeadaannyi, siisi gaygwaji haghweega saang'a, aba gideaba imeandani aniini ea moammuusi asna eara gil.

⁶ Siida wassean meabiidana jeedeanyu, gajeelach ak ghaghajamiit; iissa gageanu damealga ak ghoamughuush, ak gwajaksa jeeda beasta ak goosha.

⁷ Iyoppiidi jeedeanyu, nea gobiida ng'asheegeasu jeesingeagwa, abeeda amsa gidawassean oogasayi ak gajeesinneagwa.

⁸ Aba nii geakghambiit Bwaabwa, iissa iyojiilli haghweega saang'a, nea ghoahuuyi ginealangeasu.

⁹ Aba gidabwariiydanaan Bwaabwa, earaniini ghabwariiyduneegwa; asi oppiidana jeeda bariinyegeasu.

¹⁰ Iyoang'ng'waanyi digheannyekkeasu, gajoppiidana jeeda bariinyegeasu, ak gawuurji gidang'ng'waaydi digheannyeekka Bwaabwa nea geabiidi jeeda bariinyeegaaschi.

¹¹ Asi nearukuneegwa ng'asheesu ak abeeda gobiida hoseaneegeasu jeesingeagwa, ak abeeda ghwahit hooseaneegeagwa.

¹² “Nii digheandeanyu gil, ak gobariinnyiidi geat gidabwariiydaneagwa aniini.

¹³ Manda siida mideawa bariinyeega huumwa ea ghalaabwa hoowa nii, bea gideaba ghoaghaashta siida eaweagaaschi appadahuukka fuga duupchiin gil.

¹⁴ Agooga gowoschi fuga eaduupcheewi iyoosinnyi ng'asheega earukuneegwa.

¹⁵ Mayguttabiikta dagurewaneegwa soomjooga aba gideaba soomjeanda iissa amwanala gissin siidaannyi haw, ak ghamneawa aniini ea neagureewaneegwa fuga eaduupcheewi aba gideaba nearukuneegwa ng'asheega sean eayiing'si heeda Bwaabwa.

¹⁶ Aniini moaloadaan agooga, ghaloachcheagwa aniini ak ghaanung' aweayeena ak gojiilli haghweega jea ghwashng'u; ak abeeda gagoneegwa Bwaabwa gidawassean iyoomuschi aba gheawungeasu.

¹⁷ Asi geagonnyeegwa digheanji, abariinnya geat.

Sichcheeda ng'eanyiida

¹⁸ “Agooga isideagwa ng'eanyiida, ghoapkaachchi gideaba ghayi nibay ghwastan heeda mii ghwastaneagwa agooga.

¹⁹ Inyeetta ghwanyawa gobeayi ng'eanyiida, gwachchi gayghabwariiy ng'eanyiida fugaaschi; asi aba gideaba moabeahi ng'eanyiida, geaghus gideaba ghaloachcheagwa aba jeeda ng'eanyiida, aba sareani ghwasteagwa ng'eanyiida.

²⁰ Oapkaada ng'asheanda ghayi earukuneegwa, bea gideaba, ‘Soomjeanda mihaweawa siida haw.’ Iinukwa nisawanan aniini, earagooga gaygwasawaneegwa; inyeeda gwachchi ghoang'ng'waay ng'asheandeanyu, gayghoang'ng'waay eara ng'asheegeagwa.

²¹ Amaduw gaygwasinneegwa ng'asheesu seaniin appadaydeanyu, aba gideaba saawa mwanala dea ajeaknean.

²² Inyeetta amwaawuni ak gearukusi saawa ghwanyawa ea maygwandeawa ring'eanda; ak ghamneawa ea manda gichchea ghwashaang'da aba ring'eeda nyaawa.

²³ Siida sidan aniini abeeda ghwasit eara Bwaabwa.

²⁴ Inyeetta ea measissiini gadiyeeda dageascheeda nyaawa gadiyoojiga manda siida nisin, gwachchi ea maygwandeawa ring'eeda; ak ghamneawa anidaa ak ghwastan aniini ea Bwaabwa.

²⁵ Ak gwasa gidasung'waar aba jeeda deaweeda gideaba, ‘Ghwastan mwadaagha.’

²⁶ Eaweeda hinna Weedaneeda jea deajeagu ghwaan heedeang'wa nea gwaleabu heeda Bwaabwa, nea Gurorooda huumeanda, jea gwaleabu heeda Ghweanda, gaygamuuwwunean;

²⁷ eara Agooga gowoschi muushoodiga, aba gideaba gendeayi ghang'eada mwadi.”