Yohaana 14 - NEAJEEDA EESH BEA BUUNEESSEAN

Yeesu naweeda wea heeda Bwaabwa

¹ “Adiiduw gwahirbaban jeesingeagwa, amwasa Aseetta, ak ghoamwaschaan earaniini.

² Gheeda Bwaabeedeanyu gwanda giibinda haw, gwachchi inyeeda ea masnu gajeaneabay darukuneegwa asi ghamneawa geawi dasinneegwa hoorgeedeang'wa jea oppiidana.

³ Nea iyeawi ak geasinneegwa hoorgeedeang'wa, gaydabiigu gichcha ak ghayachcheagwa heedeandi, abeeda heedeandi aniini eara agooga gajandana.

⁴ Ak ghoanalii naweeda gal heeda eagalli.”

⁵ Ghoanyaash Domaso niny, “Ng'uttamiida, aseasa meanali heeda igali; abeeda gajeanaldaan naweeda?”

⁶ Gwayeeshsha Yeesu niny, “Aniini geawoschi naweeda, ea humeanda, ea eaweega; siida moammu gawa heeda Bwaabwa, geaghus gwasku heedeanyu.

⁷ Inyeeda ghwanyawa ghoanallaan, gajanala eara Bwaabwa, ghang'eada ghamneawa ghoanalli ak ea noadaayi niny.”

⁸ Gwayeeshsha Filippo niny, “Ng'uttamiida, ahiimneasa Bwaabwa ghoahideasa.”

⁹ Gwayeeshsha Yeesu niny, “Gendeaydoschi sea agooga ea goyang'u ak ea minalaani Filippo? Siida nidaahan aniini nidaah Bwaabwa; abeeda gimmustiin gideaba giyeeni, ‘Ahiimneasa Bwaabwa?’

¹⁰ Ammumwasi gideaba aniini geandi jeeda Bwaabwa nea Bwaabwa gwanda jeedeanyu? Ng'asheega earukuneegwean mearukunani gheambalmeedeanyu aniini, gwasin Bwaabwa mida jeedeanyu gadiyoojigaaschi.

¹¹ Amwasa gideaba aniini geandi jeeda Bwaabwa, nea gwanda Bwaabwa jeedeanyu; ghoamwaschaan aba gadiyoojiga easinnyi.

¹² Aba huumwa, aba huumwa, geayeeshshineegwa, siida mwasan gaygwasin gadiyoojusu easinnyi aniiniin; asi gaygwasin eara gadiyoojiga hees muuchchi, aba gideaba aniini geawi heeda Bwaabwa.

¹³ Nea gidawassean oamuschi aba gheawungeasu gaydasin, ak abeeda geakghambiit Bwaabwa appadayda Balleanda;

¹⁴ iyoomuschi gidawassean aba gheawungeasu gaydasinneegwa.”

Heelleesiinda Gurorooda Ghaydit

¹⁵ Iyoabwarinyaan gajoang'ng'waanya digheannyekkeasu.

¹⁶ Ak gaydamwash Bwaabwa ak gaygagoneegwa Weedaneeda nuut, jea andeayeewana damanda manda mudeanooda,

¹⁷ niny Gurorootta bea huumwaani nea fuga ng'eanyiida ea mwoammu ghwadeapta aba gideaba moammu ghwadaa ghana ghwanal; agooga ghoanalli niny aba gideaba gajandeawana nea gwanda jeedeang'wa.

¹⁸ “Maydanung'useegwa heeda bananga; gaydahidu heedeang'wa.

¹⁹ Sunung' gilimwanang' ak ea maygudu ghwadaahan ng'eanyiida, duukku agooga gajadaahaan; aba gideaba aniini geawoschi majeek, abeeda earagooga gajawosa majeekcheewi.

²⁰ Eaweettida gajanala gideaba aniini geandi jeeda Bwaabwa, nea goondi agooga jeedeanyu, nea geandi aniini jeedeagwa.

²¹ Siida mideawa digheannyekkeasu nea ghoang'ng'waay, nii dea bwariinyan gil, nea dea bwariinyan gayghabwariiy Bwaabwa, gaydabwariiy ak gaydeahiimsa geaw niny.”

²² Hean gwayeeshsha Yuudayda (mawosa dea Iskariyotte,) “Ng'uttamiida, gayghoawattaan gideaba gajahiimneasa geaw nea mihimsiini geaw ng'eanyiida?”

²³ Ghwasha Yeesu nea gwayeeshsha, “Siida ibwariinyan gayghoang'ng'waay ng'asheandeanyu, nea abeeda Bwaabwa gayghabwariiy siisi, ak gajeapkaana aseasa headaannyi ak geppiidi headaannyi.

²⁴ Siida mwabwariinyan mayghoang'ng'waay ng'asheegeasu; nea ng'asheanda oayiinyi ea mii deanyu gil gaba Bwaabwa ajeaknean.

²⁵ Ng'asheesu gearukuneegwa, nea abeeda ea gudendeayeena.

²⁶ Nea Weedaneeni, was Gurorooda Ghaydit jea gojeagu Bwaabwa aba gheawungeasuun, gayghoanaleagwa haleanjeassean, nea gopkeanneegwa ng'asheega sean earukuneegwa.

²⁷ Gaydanung'uneegwa hoyyoo, geagonnyeegwa hoyyooydeanyu; maydagoondaneegwa gidagonniida ng'eanyiida. Asi adagwasawana guroruunatkeagwa, nea adaghang'udeagwa muuwda.

²⁸ Ghayi noayiinyi nea geayeeshshineegwa, ‘Neawi heechchea dawa, ammuchchu gaydabiigu gichcha heedeang'wa.’ Inyeeda ghoabwariinyaan, gwachchi gajahoosana aba gideaba geawi heeda Bwaabwa; aba gideaba niny ahaweawanaan.

²⁹ Ng'asheesu geabay darukuneegwa ghamneawa heeda mii ghwahinna, ama eaweetta hinna abeeda ghoamwaschi.

³⁰ Maygutteabaloolaneegwa gichcha ng'asheega saang'a aba gideaba siida ahaaghwa ng'eanyiin gayghwaan. Aba heedeanyu niny moammu gil;

³¹ ak geasindi gidagoondanean Bwaabwa, ak abeeda ghwanal ng'eanyiida gideaba ghaabwariinyi Bwaabwa. Ang'eada eweaya heechchea eweaya.”