Yohaana 12 - NEAJEEDA EESH BEA BUUNEESSEAN

Yeesu geayeasha nagheeda aba Bettaniya

¹ Iimuchchu nea ghwashoada eawooji lah aba hitteayda ghwelmeeda Basakka, ghwahitta Yeesu Bettaniya heeda ghayi abiitta Lasaarooyda aduuna Yeesu miyeedean.

² Hean gesissa hamitteaba shing'ada; hean gagadiyeesa Marta nea Lasaaro abeeda gaba jeeda fuga ambuuchchi sea niny.

³ Ng'atta gageanu Mariya nagheeda ng'andit suguura nardo mida gideeshteayda sikkuuyi bureetta bissa gaba sheayeeda haw, ak ghwayeasha geeshanga Yeesu ak gobuusa budeegaaschi; gang'andiit gheassean aba shearooda nagheeda.

⁴ Gwayeeshsha Yuudayda Iskariyotte bea jeeda ginealangaaschi (was dea jaghwalabwadaw niny),

⁵ “Ghwasaan anda ghwanyawa nagheani meashaydawana dinaaraji bughalaji samwagu ak gelakkisa fuga barbari?”

⁶ Mwanyashtunu appeadi samsa fuga barbari, gweagu gideaba niny mareanghweanda, eawoojusu iissa godiiwi sandakkooda lappiya nea iissa eawoojusu gwajagwadi lappiyeeda mida jeeda.

⁷ Ghwasha Yeesu ak gwayeeshsha, “Anung'waada gwandeawa, ghoamuughu eaweeda jea epnyanean.

⁸ Aba gideaba fuga barbari gajandeawana galeagasean, dukku aniini ea majeendeayeena galeagasean.”

Geamwaal gichchea enuusta Lasaaro

⁹ Nal emeetuw bea Yahuudi gideaba gwanda hoowa, ghapka nea mwaada gideaba gagasa ghwadaa Yeesu, gagasa ghwadaa eara Lasaaroyda heetta sittuunna miyeeda.

¹⁰ Hean ghamwaal Ashohoodiga hees gichchea enuusta eara Lasaaro.

¹¹ Nea gweagu gideaba appadaydaannyi goheelli geat fuga saang'a bea Yahuudi ak ghamwas Yeesu.

Hoseaneega aba hitteayda Yerusaleemu

¹² Muchchu ghwayiiy emeetuw buwa ghwelmeeda gideaba Yeesu gwanda naweeda ghwaan Yerusaleemu.

¹³ Hean gwahirjeawu damealga miilayga ak gaweay ronnyeeda nea gojuur muuchchi nea gwayi, “Hosaana! Sing'usha siisi wuna gheawunga Ng'uttamiidean, eara sugoochcheanda Israeeli!”

¹⁴ Ghwanyas Yeesu gureenda ak gwading'da badayda gawurji gissung'waarda.

¹⁵ “Adibeali hudeaba Sayuuni; ang'wearda sugoochchandaang'u ghwaan, nea gwading'da gureenda digeeda!”

¹⁶ Abeeda ginealangaaschi ea miigwajeeng'u ng'asheesu ammwadi; iiduw nea sikghambiit Yeesu, hean ghoapkaat gideaba ng'asheesu geang'waar appadaydaannyi ea gideaba sisissa buuneeda ng'asheesu.

¹⁷ Hean gamuuwwu emeeda heetta mideay sea niny eaweetta gursiina Lasaaro gwarinna jeeda bung'eeda ak goduudu.

¹⁸ Iiduw ghoaw gitteaptaawa emeeda aba gideaba nisin gwadeagoani.

¹⁹ Ng'atta gaba Farisayajeanji eeshsha niirja, moadaahi gideaba moammuusi asna gil; oang'ng'wearda, ghwaat geeshta ng'eanyiida.

Fuga mwaatkwa bea Yunaani gaseadayyi Yeesu

²⁰ Nea aba jeeda fuga weay ghadooweeda eaweeda ghweelmeeda gwanda fuga mwaatkwa bea Yunaani.

²¹ Gaweay Fiisu heeda Filippoyda leabu Betsaydeeda Galilaaya ak gwayeeshsha niny, “Siida mureeda, geegasayi eadaaha Yeesu.”

²² Gawa Filippo ak gwarukusa Andereya; ak godeayi Andereya sea Filippo ak gwarukusa Yeesu.

²³ Ghwasha Yeesu nea gwayeeshsha, “Niiitta damanda jea ekghambiida Balleanda Siida.

²⁴ Aba huumwa, aba huumwa, geayeeshshineegwa, gheang'nyeanda ngano iissa gobiida damwanagi ea eaghus gobissa jeessigeeda ak ghami. Iing'atta miyeeda gwaji haghweega saang'a.

²⁵ Siida bwariiy eaweagaaschi gaygwalakku, nea siida sit eaweagaaschi appadaydeaba ng'eanyiin gayghoaghu ea gagul eaweega manda mudeanooda.

²⁶ Siida jea gwasinnean gadiyeeda geaghus gweadu geeshtteanyu; ak abeeda heeda eandi aniini eara soomjeadeanyu gaygwanda eara niny; siida jea gwasinnean gadiyeeda abeeda gaygwasissa Bwaabwa mureeda.

Yeesu gabaloola iitta miyeadaannyi

²⁷ “Ghamneawa guroroodeanyu nung'ut muuwda. Ak gaydayiin? ‘Bwaabwa, lealnean aba damani?’ Manda, appadaydeaba ng'asheanji naahidu damani.

²⁸ Bwaabwa aghambiida ghawungaagu.” Deagheatta ghwanya ghuutta nyaasha humng'eeda nea gwayi, “Naghambiichchi, ak gaydabiikta daghambiit.”

²⁹ Ghwayiiy emeeda ghwanyawa minaada aba hoowa ghuuttida ak gwayi mwaatkwa, ghoaghweandan humng'eeda. Nea gwayi mwaatkwa, “Gobalool malaykajeanda.”

³⁰ Ghwasha Yeesu nea gwayeeshsha, “Ghuudi oayinyiin mwanya appadaydeanyu aniini, ghwanya appadahukkeagwa.

³¹ Damani nihitta heeda jea ergweaksiina ng'eanyiini, nihitta damanda jea ejakteawa siida ahaaghwa ng'eanyiini.

³² Nea aniini isitting'danean humng'eeda daheelli ng'eanyiida, gaydaksu buneeessean ghapka heedeanyu.”

³³ Aba rukunoodeaba ng'asheanji ghoahiimu miyeechchaghami gidurji.

³⁴ Hean ghwash Emeeda ak gwayeeshsha, “Aseasa gwarukuneasa deaweeda gideaba Gristo gayghwashng'u eaweega manda mudeanooda. Abeeda ghoammustiin gideaba gajayeena Balleanda siida gajeettiing'da humng'eeda? Balleanji bea siidean ng'eaha?”

³⁵ Gwayeeshsha Yeesu saawa, “Gudandeawana weeshinda gheadi nuwaas. Aneayeena hijiduandeawana weeshindean amwajooreagwa misaneeda; siida neayeewa jeeda misaneeda mwanala eara heeda gal.

³⁶ Asi hijiduandeawana weeshindean amwasa weeshinda, ak ghoahuuyi diibiga weeshinda.” Ing'atta rukunoodeaba ng'asheesu ghang'eat Yeesu goheelli geaw ak gawa ghafnya geaw saawa.

Fuga mandeawana masaweega

³⁷ Earappeadi nisin gwadeagwajeega saang'a aba madeanyaawan, saawa ghanyea meamwasa niny;

³⁸ ak gwasa ng'asheega rugu sibaneeda suguura Isaaya nea gwayi, “Ng'uttamiida siida mwas ng'asheagaasa ng'eaha? Ak ea sihhiimsa ng'eaha geattinda Ng'uttamiida?”

³⁹ Aba sareani ea mudughoammu ghamwas. Aba gideaba Isaaya gabiikta gichcha gwayi;

⁴⁰ “Ninung' gang'owiidi gheanyanga nyaawa, nea gahang'onyiidi jeesinga nyaawa, adaghwadaa aba gheanyanga nyaawa, nea gwajeeng'u aba jeesinga nyaawa, ak gwayamu geat ak ghahaapchi.”

⁴¹ Isaaya gwargu ng'asheesu aba gideaba nidaa gigheambiittaannyi, ak ghoaw girrukuna iittaannyi.

⁴² Gwanda fuga saang'a earaba jeeda gea ambaliischi mwas niny, iiduw aba gheawalmeeda Farisayajeega ea marukunana ghuusiga nyaawa aba gideaba gajiiduw geerrutteawa jeeda ghooriida sinnealshachcheewa.

⁴³ Aba gideaba ghabwariiy dumshesiinda Buuneeda moasaamwa gideaba gaygwadumsheesa Aseetta.

Ng'asheega Yeesu gorgweaksa buuneeda

⁴⁴ Ng'atta gabalool Yeesu aba ghuutta haw nea gwayi, “Siida mwasan aniini mwamwasan nea gabwageaw, ghamwas dea ajeaknean.

⁴⁵ Siida nidaahan aniini abeeda nidaah dea ajeaknean.

⁴⁶ Aniini ghaawunnyi nea geawoschi weeshinda ng'eanyiida, ak abeeda siida mwasan ea meabiidana jeeda misaneeda.

⁴⁷ Siida iiy ng'asheegeasu ak ea mwoang'ng'waanya, aniini maydeargweaksa; aba gideaba mwaawuni deargweaksa ng'eanyiida ghawunnyi dalealu ng'eanyiida.

⁴⁸ Siida jaktanean nea mwoang'ng'waanya ng'asheegeasu gwandeawa dea jea gorgweaksa; ng'asheandida earuguun deajea gorgweaksa gil eaweeda huydean.

⁴⁹ Aniini meabalooli aba gheambalmeedeanyu; aniini geaghus gearugu Bwaabwa ajeaknean dea goonan digheanda gil ea gichchea dabaloola.

⁵⁰ Ak ghaanalli gideaba digheandannyi eaweega manda mudeanooda. Asi aniini geargu ng'asheega eshshean Bwaabwa rukuta.”