Yohaana 1 - NEAJEEDA EESH BEA BUUNEESSEAN

Ng'asheanda eaweega

¹ Ghayi aba garayi gwanda Ng'asheanda, nea Ng'asheanda gwandeayi sea Aseetta, nea Ng'asheanda ea Aseetta.

² Aba garayi niny gwandeayi sea Aseetta;

³ haleanjeessean geesin aba niny, nea iimanda niny ghanyea maygwanda gil aba haleanjeeda sisin.

⁴ Jeadaannyi gwanda eaweega, nea eaweesu ea weeshinda buuneeda.

⁵ Nea weeshini ghoabwaay jeeda misaneeda, nea misaneeda ea miighoammu ghwajoar.

⁶ Abeeda gwanda siisi sichcheagu leabu heeda Aseetta; suguura gheawungaaschi Yohaana.

⁷ Niny ghwaan ak gamuuwwu iitta weeshinda, ak abeeda ghamwas buuneessean aba niny.

⁸ Nea niny ea mii weeshinda gil, niny ghwaan gamuuwwuu iitta weeshinda.

⁹ Nii weeshinda huumwa gil hidu jeeda ng'eanyiida ak ghoabwaay giliwas sihi.

¹⁰ Niny ghayi abeeda gwanda jeeda ng'eanyiida, nea ng'eanyiida geesin appadaydaannyi ak amwanala ng'eanyiida.

¹¹ Niny ghwahidu gheannyi, ak ea mwadeapta fugaaschi.

¹² Nea fukka sean deapta ninyiin, ak ghamwas aba gheawungaaschiin, ghoadaw uurda jea ghoaweawa diibiga Aseetta;

¹³ Fuga meejiilana naweeda geallaan, ghana gidabwariiyda saseeda, ghana gidabwariiyda siida, geaghus Aseetta.

¹⁴ Ak iiduw ghoaw Ng'asheandida saseeda ak goobiida jeedeanya, niny ghwannyiit dagheerjeandumeeda ea humeanda ak ea sidaayi, gigheambiittaannyi, gigheambiitta uurji dea Balleanda was haghasheeda leabu heeda Bwaabwa.

¹⁵ (Yohaana gamuuwwu iittaannyi, ak goojur, “Nii dea ghayi earukku nea geayi, ‘Nii dea ghayi eayeennyi gay gweadu geeshteanyu ak ahaweawaneani aba gideaba gwanda madeedeanyu.’”)

¹⁶ Aba hidoadaannyi aseasa sinyaschi dagheerjeanduumeeda nea gettaguurji.

¹⁷ Aba gideaba deaweeda geegu aba naweeda Muusa; nea dagheerjeandumeeda ea huumeanda ghapkaana naweeda Yeesu Gristo.

¹⁸ Manda siida nidaah Aseetta; Balleanda was haghasheeda, mideayi sea Bwaabwa, niny siida adaajiidi.

Giijasta Johaaneeda Abattiisachchi

¹⁹ Nii gidamuwwu Yohaana, gojeakta Fuga Yahuudi mida Yerusaleemu ashoohoodiga ea fuga Laawi ghoanyaash gideaba, “Guwosi ngeaha?”

²⁰ Ghamwas ak ea mwashaanga ghamwas, nea gwayi. “Aniini meawosi Gristo.”

²¹ Gennyaash niny, “Ak guwosi ngeaha? Guwosi Eliyahi?” Gwayeeshsha, “Meawosi,” Geyeeshsha, “Abeeda guwosi sibaneeda?” Gwayeeshsha, “Manda.”

²² Geyeeshsha niny, “Asi ang'iing'i guwosi ngeaha? Rukuneasa ak geyeassi iitta fuga ajeakneeasa. Giyeaniin appadaydaang'u?”

²³ Gwayeeshsha, “Geawoschi ghuutta siida nyearra jeeda dareapcheenda. ‘Olleappa naweeda Ng'uttamiida,’ gawuurji gidaghayi rukuteayda sibaneeda suguura Isaaya.”

²⁴ Fiisu abeeda gojeagu Farisayajeega.

²⁵ Ng'atta geannyaash nea geyeeshsha, “Ang'iing'i imuwosi Gristo ghana Eliya, ghana sibaneeda anda gibattisanayi buuneeda?”

²⁶ Ghwasha Yohaana nea gwayeeshsha, “Aniini geabattiisananeegwa beega, ak gwanda jeedeangwa siida minaada nea moanali,

²⁷ Siisi gaygamaseawnean ak aniini ea mammisean gideaba gaydeameew deanga geakkaaschi.”

²⁸ Ng'asheesu seaniin geesin aba hoowa bea Bettaniyaan gigheawda Yordaan was heeda abattiisanniisa Yohaana buuneeda.

Dayeenda gisilleanda bea Aseetta

²⁹ Muchchu ghwadaa Yeesu nea ghwaan headaannyi ak gwayeeshsha, “Ngulla Dayeenda Gisilleanda bea Aseetta jea gageanda ring'eeda jeeda ng'eanyiida!

³⁰ Nii dea ghayi earukku eayeennyi, ‘Gwanda siisi jea gamaseawneani, aba gideaba niny ghayi gabay gwanda madeedeanyu, aba gideaba gwanda madeedeanyu.’

³¹ Aniini siisi ghayi mwaanali, amaduw ghaawunnyi deabattisana aba beega ak abeeda getteajiissa Israeeli.”

³² Ng'atta gamuuwwu Yohaana ng'asheega nea gwayi, “Nadaayi Gurorooda gwashubeanda gharibajeanda nea ghoabinna humng'eeda ak goobissa uhuudaannyi.

³³ Earaniini abeeda mwaanali; amaduw ghwanung' siitta ghayi ajeaknean deabattiisan aba beegean gwarukunean gideaba, ‘Siitta jea daaha nea gwashubeesa Gurorooda ak goobissa uhuudaannyiin siida nii diitta jea gobattiisan aba Gurorooda Ghaydidiin.’

³⁴ Ak aniini ea nadaayi ak ea neamuuwwu gideaba siisi Balleanda Aseetta gil.”

Ginealanga madeeda bea Yeesu

³⁵ Muchchu gabiikta Yohaana ghaminaada sea ginealangaaschi assiyyeenya.

³⁶ Hean gang'ulla Yeesu nea ghang'atta ak gwayeeshsha, “Ng'ulla, Dayeenda gisilleanda bea Aseetta!”

³⁷ Ghwayiiy Ginealangiga assiyyeenyean niny nea gwargu ng'asheesu ak ghwaat geeshta Yeesu.

³⁸ Ghwayam geaw Yeesu ak ghwadaa nea ghwaat geeshta ak ghoanyaash saawa nea gwayeeshsha, “Gogaseadayyi naaha?” Hean geyeeshsha niny, “Raabi” (nea gideaba Ginealshochcheanda gil), “ang'iing'i gibiitti yeenu?”

³⁹ Gwayeeshsha saawa, “Abeenni ak gajadaaha.” Ng'atta ghwaat geeshta, ak ghwadaa heeda eajusu abiitta, gobitpiit gwandeawa niny eaweettida abeeda gaba aseetta damanamughuush.

⁴⁰ Iiy oorjeanagi aba jeedeaba giikka assiyyeenyean nea gabalool Yohaana ak ghwaat geeshta Andereya gil, was oorjeeda gennyea Simoneeda suguura Betro.

⁴¹ Gosheeda ghwadaa Simoneeda was oorjeeda ghaamwat, ak gwayeeshsha, “Sidaayi Masiya” (nea gideaba Gristohi).

⁴² Hean ghwaat heeda Yeesu. Daa Yeesu gwayeeshsha, “Ghamneawa gegureweey Simon Balleanda Yohaana? Asi gajegureweey Geefa.” (Nea gideabeadaannyi ea Betro gil).

Yeesu gaguursa Filippo ea Nattanaeeli

⁴³ Iimuchchu eanigasa Yeesu beatta Galilaaya. Ghwadaah Filippo ak gwayeeshsha, “Eanni geeshteanyu.”

⁴⁴ Filippo niny siida leabu Betsayda gil, mujiineeda geaba Andreya ea Betro.

⁴⁵ Filippo ghwadaa Nattanaeeli ak gwayeeshsha, “Sidaayi siida ghayi ng'waar Muusa ng'asheagaaschi aba jeeda deaweeda. Siisi ghayi ng'asheagaaschi ghang'waar sibanga. Yeesuuyda Nasareetti, was balleada Yoseefu.”

⁴⁶ Gwayeeshsha Nattanaeeli niny, “Asseara Nasareetti ghoammu gwarinna gilimiyi?” Gwayeeshsha Filippo niny, “Benni daaha.”

⁴⁷ Ghwadaa Yeesu Nattanaeeli nea ghwaan headaannyi, ak gwayi, “Ng'ulla, Israeelajeanda huumwa, manda jeadaannyi ng'uyyeega eara gil!”

⁴⁸ Gwayeeshsha Nattanaeeli niny, “Assang'iing'i ginaldananniin?” Ghwalamda Yeesu ak gwayeeshsha, “Ghwanyawa ghadayeay nea gudumidana guumda shabogheechcheanda nea eara Filippo eamighwaan gaguurneey.”

⁴⁹ Ghwasha Nattanaeeli nea gwayeeshsha, “Rabi, ang'iing'i guwosi Balleanda Aseetta! Guwosi Sugoochcheanda Israeeli!”

⁵⁰ Ghwasha Yeesu nea gwayeeshsha, “Ghamneawa gumwasi aba gideaba geayeeshshineey ghwanyawa ghadayeay nea gudumidana guumda shabogheechcheanda? Asi gaydaaha ng'asheega hees naawa suh.”

⁵¹ Hean gwayeeshsha niny, “Aba huumwa, aba huumwa, geayeeshshineegwa, gajadaaha nea ghwajaada humng'eeda, ak gajadaaha malaykajeega Aseetta heeda mwascheeng'da suurja ghwararang'aan ghapka heeda Balleanda Siida.”