Ruumi 3 - NEAJEEDA EESH BEA BUUNEESSEAN

¹ Asi siida Yahuudi gaburda naaha? Ama ghasmeahooda gwarachi naaha?

² Gaburda muuchchi aba naweadinga sean. Aba madeeda fuga Yahuudi siittaw ng'asheega gasa Aseetta.

³ Gay gawuurjiin abeeda ii mwamwasa fuga mwaatkwa? Nyootta masaweega nyaawa gay ghoammu ghwayam doobiiwnatta Aseetta?

⁴ Manda! Aseetta adoobiiwaat galeagasean earappeadi bea ng'uyya buuneessean. Gawuurji ginnyaashta ng'ooruutka, “Ng'asheagaagu iissa iirgu eadoobiiweadi, nea girgweageeda iissa gijooriischi.”

⁵ Nea munyasnachcheakkaasa iyadahaach doobiiwnatta Aseetta, gajeayeanaan? Gajeeyeena Aseetta miidoabiiwaat iiyeadu ghoorjooda? (Aba hiji geabalooldi siida.)

⁶ Manda! Aba dascheani gwachchi gay ghoammu Aseetta gorgweaksa ng'eanyiida nea ghoadoabiiw?

⁷ Asi aba ng'uyyeegeasu iiniibiida huumeanda Aseetta jeeda gigheambiitta abeeda ghwasaan gudeergweaksiinanean siida riing'eeda?

⁸ Ak abeeda ghwasaan inyas measni ng'asheega munyas ghwahidu gea miyaas? Aba gideaba fuga beasheasa goorgweakseasa aseasa nea gwayi. Girgweageeda nyaawa ghwadoabiiw.

Manda siida doabiiwaat

⁹ Asi gajeayeanaan? Aseasa fuga Yahuudi geewoschi miyaas muuchchi? Manda, eara gili mwanang'. Aba gideaba sisikteawi aseasa gideaba buuneessean, fuga Yahuudi ea fuga Yunaani, eara saawa gwanda jeeda uurda ring'eeda,

¹⁰ gawuurji gissung'waaarda; “Manda siida doabiiwaat, mandana eara akkalealla;

¹¹ manda siida nal gil, manda siida gaseadayyi Aseetta.

¹² Niyam geat sean, ak ea nimunyasiidi sean; manda siida sina ng'asheega miyaas, eara akkalealla.”

¹³ “Muwooguukka nyaawa bung'eeda abwara ghuusi, nea ng'ushapkeakka nyaawa iissa gwareengani buuneeda.” “Gwarittuuna ghuusiga nyaawa furooda uurji dea ichchibooda.”

¹⁴ “Ghuusiga nyaawa ghwannyiit mooshteayda ng'waan.”

¹⁵ “Geeshanga nyaawa eang'weani aba gihideayda foojeanda,

¹⁶ naweadinga nyaawa sik sea gwanda nyariida ea hirbabandeeda,

¹⁷ nea ghanyea mwanala naweeda weayda.

¹⁸ Nea gheawalmeeda Aseetta ghanyea manda gheanyanga nyaawa.”

¹⁹ Asi sinalli gideaba ng'asheega sean rugu deaweeda gwarukuna badahuukka fuga mida jeeda deaweeda, ak abeeda gearat ghuusiga sean, ak gawa ng'eanyiisean jeeda girgweageeda Aseetta;

²⁰ ak ea manda siida jea ghwanyas doobiiwnatta aba madeadaannyi aba gadiyoojiga deaweeda, nea aba deaweeda iissa geanyas fughareeda ring'eeda.

Gidagoonniidaneasa Aseetta doobiiwnatta

²¹ Ak ghamneawa doobiiwnatta Aseetta ea nidaajiit nea manda deaweeda, aba gideaba sibanga ea deaweeda gamuuwwu ng'asheesu,

²² ak ea doobiiwnatta Aseetta gil, aba naweeda masaweega mida jeeda Yeesu Gristo aba heeda buuneessean mideawa masaweega. Aba gideaba maheelli;

²³ aba gideaba nisin buuneessean ring'eeda, ak ghwasunyeawa gigheambiitta Aseetta,

²⁴ iissa geattaw doobiiwnatta mwadaagha aba dagheerjeandumeadaannyi, aba naweetta bea lealeanooda mida heeda Gristo Yeesuun;

²⁵ nea niny ghayi ea ninung' Aseetta ghoaw siida jea goohuun buuneeda, aba foojeandaannyi, ak geanyas aba masaweega. Ak abeeda ghoahiimu doobiiwnattaannyi ak gwasindunu nea gagasa ghoahiimu gideaba niny adoobiiwaat ak ghwanung'waada Aseetta ring'eega ghayi siisheeda eesin;

²⁶ ak ghoadaajiit aba damani gideaba niny ea doabiiwaat ea gideaba gaygoomajeek siida mideawa masaweega aba jeeda Yeesu.

²⁷ Asi gwandeenu ghwaroadeaba geaw? Sirassa jarooda. Aba deaweedeeda uurjiin? Aba deaweedeeda jea eesini? Manda! Geaghus deaweedeeda mideawa masaweega.

²⁸ Asi sidaayi gideaba siida iissa ghwanyas doobiiwnatta aba masaweega nea meakna sinooda deaweeda.

²⁹ Ama Aseetta niny Aseetta fuga Yahuudi gil akghwahidi? Niny mii Aseetta Emoojiga seani? Huumwa, niny Aseetta Emoojiga seani.

³⁰ Aba huumwa Aseetta iiyagi, nea dea jea ghoadaw doobiiwnatta fukka siyaat ghasmeahooda aba masaweegeani abeeda gay ghoadaw doobiiwnatta eara fukka mii gaweay ghasmeahoodean aba masaweega.

³¹ Abeeda gajeayamwa deaweeda aba masaweegiga? Manda! Iisiyam abeeda geemajeekchi deaweeda.