Lukka 8 - NEAJEEDA EESH BEA BUUNEESSEAN

Gadeemga adeayi Yeesu

¹ Iiduw ghang'eat gwasik jeeda mujiinajeega ea gharang'weakka, gwarukkwiida nea gweadu Giijasta Miy bea sugoochcheandumeeda Aseetta. Nea abeeda gwandeayi sea ginealangaaschi attamaniyyeenya,

² nea abeeda goodeay gadeemsu mida jeeda gea siihaabwa meangeenda ea geeyoonng'weakka: Nea Mariyaayda suguura Magdaleena ghayi sirruutteawa meangeenda assispwa,

³ ea Yoana gatmooda Guusa, ea haghweadoochcheanda haleanjeeda Heroodehi, ea Susaana, ea suuk gea saang'a, gadiydooscheesa saawa aba haleanjeeda mideawa.

Gissigala Siida weah histeayda

⁴ Iiduw bwat geat Eemeetuw leabu mujiinajeega sean gaweesa Buuneeda niny, ak gwarukusa galeega nea gwayeeshsha:

⁵ “Ghayi ghang'eat sih gawa histeayda; hitta nea gwahista gwanda gea abitpissa heeda was naweeda, ak geallaaplaap aba geeshanga, nea ghwahitta dariidakka humng'eeda ak ghwaak.

⁶ Gwanda eara gea abitpissa heeda was harearachcheanda; ridu ghwasis aba gideaba mii nyeewaneat sigeeda.

⁷ Gwanda eara gea abitpissa jeeda geediga halaghweenga; iiduw nea gwardu sea halaghweenga ghwariis geediga.

⁸ Gwanda eara giikka abitpissa jeeda sigeeda miyaasiin ak gwardu, gaba ghealooni jih bughala.” Iing'atta rukunoodeaba ng'asheesu, gojuur nea gwayeeshsha, “Siida mideawa iidiga jea ghwayiinya, ea dayiing'shi.”

Gissibaysiina galloodeaba geat bea ng'asheega

⁹ Iiduw ghoanyaash ginealangaaschi gidabaysiina gallodeaba geat bea ng'asheega,

¹⁰ gwayeeshsha, “Agoogeeni simeayneegwa makcheameeda sugoochcheandumeeda Aseetta; nea aba fii suuk geaghus eegalla geat, aba gideaba eara iyang'wearda amayghwadaa, ama eara iyiiy amayghwanal gidawas.”

Yeesu gwargu ganeega gala siida weah histeayda

¹¹ Balooli gissigala nihi: Histeanga geegala ng'asheanda Aseetta.

¹² Giikka abitpissa naweedean fugiga ama iiyiin gil; hean ghwahidu meangeenda gageandeawa ng'asheandida guroruunatka nyaawa, aba gideaba adaghamwas ak gealealu.

¹³ Nea giikka abitpissa badayda harearachcheandean, giikka ama iiy ng'asheanda ghoang'ng'waay nea gahoosaniini; ak ea mandeawana hawungeani, iissa ghamwas gilinuwaas ama duw nea geesimsim gabay gabiikta bwadaw.

¹⁴ Nea giikka abitpissa jeeda geediga halaghweengean, ea giikka ama iiy, iiduw nea gaweay ghwariis mittagheasta muunda ng'eanyiida bea gassooda barureega, ea haleanjeeda bwariiy sasanuuka nyaawa ak iiduw haghweagaaschi ea mwaheasa.

¹⁵ Nea giikka abitpissa jeeda sigeeda miyaasiin, giikka ama iiy ng'asheanda, gabay ghoang'ng'waay muuchchi aba gurorooda miyiini, ak gwaji haghweega aba milikghteayda.

Gheaboong'nyeanda sudukutta

¹⁶ “Manda siida jea ghoayeat gheaboong'nyeanda ak gwadukuteawa dahuuda, ghana ghwayiin uutta bulaliida, geaghus ghwayiin uhuuda ghamarda, abeeda ghwadaa fuga buwa gah weeshinda.

¹⁷ Ea manda gidafunyaat ak ea majeenung' ghwadajiit, ak ea manda gidawassean was makcheameeda jea ea majeattahaach ak geeyeadu heedeesh.

¹⁸ Asi ashageada aba gidoayiing'di; aba gideaba siisi agar gil gajeehheassa, nea siitta meagara giliin, eara gitta mideawean gajeegeanda.”

Gheamatta Yeesu ea oorjooga geennyea Yeesu

¹⁹ Iiduw ghwahidu ghaamwat sea Oorjooga geennyea Yeesu ghapka headaannyi, ak ea meanyasa gheatta jea eahhittaawa headaannyi aba seang'ayda emeeda.

²⁰ Geerukusa nea geeyeeshsha, “Geamadu ea oorjooga geamadu ghamiinaada aba jarooda, nea gagasseey.”

²¹ Ak gwayeeshsha Yeesu saawa, “Iiyya ea oorjooga iyya gea iiy ng'asheanda Aseetta ak gwasiniini.”

Yeesu ghwanung' ghahawda siilakghta basooda

²² Eaweechcha gawa jeeda maleambooda sea ginealangaaschi, ak gwayeeshsha saawa, “Eakghaawana basooda eebu meatkweeda niirja.” Hean ghang'eatng'eat gaweay,

²³ damani beawaan abeeda ghoang'ng'waay ruweanga. Gabalagu siilakghta aba jeeda basooda ak ghwanung' gwaneawwiida beega ea gwaramagu ghwannyiit beega jeeda maleambooda nea gwanda jeeda washta.

²⁴ Geeweay ak ghwaheat nea geeyeeshsha, “Siida haw, siida haw, Sishsheali!” Ghang'eat ak gwareekusa silakghtida ea laweajajeegiga bea basoodean; ak ghwaasiinda gwayi saw.

²⁵ Hean gwayeeshsha saawa, “Gwandeenu masaweegeagwa?.” Hean ghabeal nea ghahamng'eanyi ak gaba siisi eeshsha nuut, “Siisi nii siida urjiini, ammu gwareekusa jeammeeda ea beegean, ak ghoawal gheang'dean?”

Yeesu ghoahaap siida bearji meangeenda

²⁶ Iiduw ghwahiitta ng'eanyiida Geraasi, deaschi sea Galilaaya.

²⁷ Rarang'aan ak ghoalla ng'eanyiida ghajaam gwaroonnyi siisi bearji meangeenda; leabu mujiini nea nigeawiit ea meakwealla hang'weakka, ak ea mobiitteena eara ghoah gobiitta heeda bung'eadinga.

²⁸ Daa siitteani Yeesu gobeedeaysa madeadaannyi ak gojuur aba ghuutta haw nea gwayeeshsha, “Geendeayeesi naaha sea ang'iing'i Yeesu Balleanda Aseetta miida humng'eeda? Aniyean adisawannyean.”

²⁹ Ghwanyaashtunu aba gideaba abeeda niyeeshsha Yeesu meangeenda ritteaysiina siisi. (Ak ea nibiikssa siisi nyamoanna; inyeessa geefur nea geerada aba munyaloalajeega ea biingu, ak gang'achcheaweada sean ak ghwaat uurda meangeenda ea gawa eeshtearajeanda aba uurda meangeenda.)

³⁰ Ghoanyaash Yeesu niny nea gwayeeshsha, “Ghaawungaagu ng'eaha?” Ghwayeeshsha siidida, “Aniini geguurewean Lugooda;” aba gideaba gabearji meangeenda saang'a.

³¹ Gamearmearani Meangeenda nea gwayeeshsha, Geemuschcheey, adiiduu ginung' eeweaya jeeshshoomanda sheagi.

³² Aba damani gwanda hawanda ukkurmajeega daghatpa heaya ghwajeada, ak gamearmearani Meangeeda gideaba nung' eweaya eappitta jeedeaba ukkurmajeesu. Ak ghwanung' gaweay.

³³ Gwaritteawa meangeenda siidida ak ghoabiitta jeeda hawanda ukkurmajeega, gwasalda hawanda ukkurmajeega ghwararang'aadawa beareega heayeeda, ea ghoabiitta jeeda basooda ak goosha sean.

³⁴ Daa jeagiischoodiga gaweay gwarukuta gidabunu, gaweay mujiini ea jeeda ng'eanyiida.

³⁵ Iiduw gaweay Buuneeda ghwadaa gidabun, gaweay heeda Yeesu, ak ghwadaa siidida sihhaabwa meangeendean, nea goopteada aba murdeeda geeshanga Yeesu, nea gookwa hang'daannyi, nea nibiiksa fughareadaannyi; ak geabeal.

³⁶ Nea fukka dahiin gwarukwiida gideaba siitta bearji meangeendean sihaap.

³⁷ Hean gamus buuneessean mida geeng'oojiga Geraasi gideaba ng'amwana ng'eang'deanya; aba gideaba ning'ut muuwda; nga'atta gwading'da maleambooda ak gabiikta.

³⁸ Gamus Siidida sihhaabwa meangeendean iidaa nea gawa hean gwaneawsageaw nea gagasa godeayi, ghwanung' gawa nea gwayeeshsha,

³⁹ “Una gheang'u, ak girukkwiidi gitteenna ng'asheega sean bea ginnuweattaneey Aseetta.” Ghang'eat gawa gwarukkwiida aba mujiineesean gitteenna ng'asheega sean sissa Yeesu.

Hudeaba Yayro ea gatmooda waas weleeda Yeesu

⁴⁰ Iiduw nea gabiigu Yeesu ghwadeapta emeeda aba gideaba nigeawiit gomuukku sean.

⁴¹ Iiduw ghwahidu heeda siisi suguura Yayro, nea abeeda ghoahaaghwa ghoriida sinnealshachcheewa; hidu gobedeaysa geeshanga Yeesu ak gamearmearani goodeayi gheannyi,

⁴² nea abeeda hudaannyi was haghasheeda, bea gweannyeew damaniyyeenya, ghabwar miyeeda. Damani weewean ghwariis Buuneeda Yeesu aba murdajeega sean.

⁴³ Abeeda gwanda gatmooni areemi foojeanda gweannyeew damaniyyeenya ak ea manda siida ammu ghoahaap.

⁴⁴ Ghwaat geeshta ak ghawaasa geaw weleeda hang'daannyi; deagheatta goosha gireemdida bea foojeandean aba geeshangiga.

⁴⁵ Ak ghoanyaashta Yeesu nea gwayeeshsha, “Ghawaas ng'eaha?” Ghwashaang' buuneessean, gwayeeshsha Betro, “Siida haw, emeeda gwaneaweeseey nea ghwariisnyi!”

⁴⁶ Gwayeeshsha Yeesu, “Gwanda siida nuwaasan; aba gideaba ghadaayi niritteawanean uurda.”

⁴⁷ Iiduw nea ghwadaa Gatmoodida gideaba mudughoammu ghafuy geaw, gaweesa nea ghabwaadanaada aba muuwda, ama hitta ghoabeada aba madeadaannyi ak ghoadayda iitta aba madeeda buuneessean gidawaasta, ea gidasihhaapta aba geeshangiga.

⁴⁸ Gwayeeshsha niny, “Huda gidahaapnyi masaweagaagu, una nea gibeahi hoyyoo.”

⁴⁹ Damani duuw gabaloolean, ghwahidu siida leabu gheeda siida haw ahaaghwa gheeda sinnealshachcheewa ak geeyeeshsha, “Hudaang'u niibitta; adagudideawiidi Ginealshochcheanda.”

⁵⁰ Iiy Yeesu iidi ghwasha nea gwayeeshsha, “Adibeali, ang'ing'i mwasa abeeda gayghahaap.”

⁵¹ Hitta ghoah eamwanung' gaweay buuneeda gah sea niny, geaghus niny ea Betro ea Yohaana ea Yakkobo, ea ghwaan ea gheamatta jeepta.

⁵² Nea abeeda goyyeawda sean nea gaguuttu heareegaaschi; hean gwayeeshsha, “Adooyyeawdi; aba gideaba mii gami gwalil.”

⁵³ Geebarra rear, aba gideaba geanal goolla ghami.

⁵⁴ Hitta ghoang'ng'waay geattinda ak gaguursa nea gwayeeshsha, “Balleanda, ng'eada.”

⁵⁵ Gabiiksa guroroodaannyi, ak ghaminaada aba geeshangiga; ak gwayeeshsha, oattawa gichchea ghwaak.

⁵⁶ Ghahamng'eanyi ghaamwat ea ghwaan; ak gwayeeshsha, “Adiiduw goorukusi sih ng'asheanji gwachchi easinnyiin.”