Lukka 24 - NEAJEEDA EESH BEA BUUNEESSEAN

Dunnooda

¹ Iimuchchu eaweeda madeeda bea wikkajeanda, nea ghaghar gayeew, gaweay heeda bung'eeda, nea ghwaat geediga ng'andidi nisin.

² Hean sihitta geadaah lagheaneedida nea sishsheagiida ghuutta shoomanda bung'eeda,

³ iiduw nea gaweay jeeshshomanda bung'eeda ea mwadaaha muusta.

⁴ Damani duuw ghahamwang'eanyi aba ng'asheanjiin, hean ghamiinaada fii iyyeenya aba murdeannyaawa nea gookwa hang'weakka meang'meang'i;

⁵ damanda duughang'uda muuwda nea ghwahiiy geat gogeal iheenga nyaawa ng'eanyi, gwayeeshsha sih saawa, “Ghwasaan andagoogaseadayyi siida majeeck aba jeeda fuga nimeewa?

⁶ Oapkaada gidaghayi rukuneegwa, damanda duuw gwandeewa Galilaaya,

⁷ gideaba, Balleanda Siida gajeayiin geattinga fuga ring'eega, ak gengoor, ak gwaduudu eaweetteaba samwagu.”

⁸ Hean geapkaat ng'asheagaaschi,

⁹ bikna hooweanji bea bung'eedean gaweay ghoadaw iitta ginealangiga attamwanagiin ea buneessuurja.

¹⁰ Nea Mariya Magdaleena gil, ea Yoana ea Mariya gheamatta Yakkobo, ea gadeemga suurja gwachchi mideawean suu fuga rukusa giijasoodiga iitteaba ng'asheesun gil;

¹¹ gawuurji ng'asheesu aba heannyaawa duguuga mwadagha, ak ghanyea meamwasa.

¹² Aka gawuurji ng'asheega nyaawa aba heannyaawa duguuga mwadaagha, nea ghanyea mwamwasa. Ng'atta ghang'eat Betro ak ghafwach ea ghwahitta heeda bung'eeda, ak ghwahiiy geaw gong'weersa jeeda, ghwadaa wegeakkiga sibung'dean akghwahit; hean ghang'eat gawa nea ghaham ng'eanyi aba ng'asheega bunu.

Beatta Emau

¹³ Eaweettida gaweay fii iyyeenya aba jeannyaawa gharang'i suguura Emawu, nea sheageewa Yerusaleemu jea ghoahiitta aseetta iyyeenya hitteayda,

¹⁴ gabalooleadawa iitteaba ng'asheekka nndeareetta bunuun.

¹⁵ Aba damani balloleadawa nea gonyeari geadiin, gawa Yeesu ea gwaneekkiissa ak godeayi.

¹⁶ Geadukuta gheanyanga nyaawa ea mwanala siida was.

¹⁷ Hean gwayeeshsha saawa, “Ng'asheespa naaha obalooleadawi nea goweayiin?.” Ghaminaada nea niikkaroomnyi gheamamuunatka nyaawa.

¹⁸ Ghwasha Siyagi aba jeannyaawa, suguura Gleoppa ak gwayeeshsha, “Neada ang'iing'i guwosi rabascheanda nea gubwaageawi aba Yerusaleemu mwanala ng'asheega sisiin aba hiji askwearjoojusu?”

¹⁹ Hean gwayeeshsha saawa, “Ng'asheespa naaha?” Geyeeshsha niny, “Ng'asheega Yeesuuyda Nasareetti, ghayi was sibaneeda mideawa uurda sinooda ea baloolda aba madeeda Aseetta ea dea buuneessean,

²⁰ ea gidahaaktaayda ashoohoodigasa hees ea fuga ahaaghwa ng'eanyiida ak ghoadayda ergweaksiina miyeeda, ak gengoor.

²¹ Nea abeeda aseasa geararji gideaba niny siichchea ghoaghu Israeeli gil. Gilnuut gichcha askwareani ea deaba samwagu aba ng'eetta ng'eada ng'asheesu.

²² Gabiissa gwanda gadeem bea ng'eang'deanya gwachchi nung' eabeala. Weay bung'eeda sakteayda duuw

²³ ea mwadaaha mustaannyi; ak ghwahidu ak gwargu gideaba niroonnyi sea malaykajeanda eeshsha ea majeek.

²⁴ Eara fii suuk gichcha gwachchi sindeawi gaweay hoowa bea bung'eedean ak ghwadaakta gidagwachchi rugu gadeemgiga; nea niny ea meadaaha.”

²⁵ Ng'atta gwayeeshsha saawa, “Ea fuga dasheahi, mideawa guroruunatka hang'oonyi ak amwamwasa eara ng'asheega ghayi rugu sibanga!

²⁶ Mammisiina gideaba Gristo gayghwanyas sawanadeeda ama ng'atta gawa jeeda gigheambiittaannyi?”

²⁷ Hean ghoang'eada Muusa ea sibanga sean, ak gwarukusa saawa ng'ooruutka sean bea ng'asheega bwadaydaannyi.

²⁸ Gaweay ea gwaneekkiissa gharang'dida gwachchi weayiin. Ak gwahinda geaw giligasa ghang'atta,

²⁹ hean gemearmearani nea geeyeeshsha, “Shinya endeayeena, aba gideaba niisha Aseetta ak ea nihiidu eaweeda.” Hean gawa jeeda gheeda ak gwandeayi.

³⁰ Damandida mideayeewa aba agiischoodean gageanu mukkatte ak gang'ushsha ak ghabwanach ak ghoadaw saawa.

³¹ Ghwajaada gheanyanga nyaawa, deagu ghwanal gideaba ninyi, ama ng'atta ghwaroada gheanyanga nyawa.

³² Gonyeari geat nea gwayeena, “Neada jeesingaasa ea mwayeadana beasta damandida gwachchi abaloolaneasa aba naweedean, nea gang'achcha iitteanya aba gidaghayi nyaah ng'ooruutka?”

³³ Ghang'eatng'eat damandida ak gabiikta Yerusaleemu, ak ghwanyasa hoowa giikka attamwanagiin nea gwandeawa giikka eawooschu mideaydooschiin,

³⁴ nea gwayi, “Humwa gil niduudu Ng'uttamiida, geabwada nihiimsa geaw Simon!”

³⁵ Hean ghoadayda iitteaba ng'asheekka bussa aba naweedean, ea gida siyi bwak ea ghwanalda saawa gideaba ninyi damanda bwanaja mukkatte.

Yeesu gwaroonnyi sea ginealangaaschi

³⁶ Damani duuw gwandeawa jeedeaba baloliin, ghaminaada Yeesu appugusta nyaawa.

³⁷ Ghahamng'eanyi ak ghabeal muuchchi, nea ghaghay gili daa malonghajeanda.

³⁸ Gwayeeshsha saawa, “Ghwasaan anda nung'deagwa muuwda, ak ghwasaan anda goonyearayi geat ng'asheesu aba jeesingeagwa?

³⁹ Ong'ng'wersiina geattingeasu ea geeshangeasu, gideaba aniini gil; ong'ng'waanya eara saseedeanyu ak ghoadaayi; aba gideaba malonghajeanda mandeawana saseeda ea geekka gawuurji gidoadaaktanaan ghamneawa.”

⁴⁰ Iiduu ne ning'atta rukunoodeaba ng'sheesu gohiimsa geattingaaschi ea geeshangaaschi.

⁴¹ Damani mii ghamwasa aba hooseaneegean, nea ghahamng'eanyi nea gwayeeshsha saawa, “Goondeawi gichchea ayaaga aba hiji?”

⁴² Geattaw banajaneeda ghweayeanda sibeash.

⁴³ Gageanu ak ghwaak aba madeannyaawa.

⁴⁴ Hean gwayeeshsha saawa, “Suu ng'asheegeasu ghayi earukuneegwa, damanda sindeaydooscheewi, ak abeeda ng'asheega appadaydeanyu aba jeeda deaweedeeda Muusa ea sibanga ea gittaabooda Nyiigheega gajeahhiit.”

⁴⁵ Ng'atta ghwajaat fughareenga nyaawa ghwanal ng'ooruutka.

⁴⁶ Ak gwayeeshsha saawa, “Nii gidaghayi sung'waarda gil gideaba Gristo gayghwanyas hang'weanidooda ak gwaduuna miyeeda eaweetteaba samwagu,

⁴⁷ ea gideaba duukkuunooda ea samsiinda ring'eega gajeerukkwiida aba gheawungaaschi, aba jeeda emoojiiga sean, ghang'eada Yerusaleemu.

⁴⁸ Nea agooga gowoschi mushoodigeaba ng'asheesu.

⁴⁹ Ang'ulla, geayeaneegwa heelleeda Bwaabwa; asi oppiidana mujiineeni ea egoneegwa uurda leabu humng'eeda.”

Yeesu geayaat humng'eeda

⁵⁰ Ghoadoabiiw ea ghoahiitta ng'eanyiida Bettaniya, ak gagatgat geattingaaschi ak gang'ushsha.

⁵¹ Damani ng'ushshiinean goheelli geaw ak geettiing'da eayaat humng'eeda.

⁵² Ama ng'atta gabiigu Yerusaleemu nea gahoosan muuchchi,

⁵³ goobiitta jeeda gheeda sibatta Aseetta nea gwaduumsheesa Aseetta.