Lukka 21 - NEAJEEDA EESH BEA BUUNEESSEAN

Gidasabwa geadi gatmooni was masinung'weanda

¹ Ng'atta gang'ula ak ghwadaa gidiinda meanang'oodiga haleanjeeda sisappa geadi bea ghadoweeda jeeda gheaseeda.

² Ghwadaah eara masinung'weanji bwarbwar nea ghwayiin jeeda gida heelaji iyyeenya akghwahit.

³ Ak gwayeeshsha, “Geayeeshshineegwa aba huumwa masiinung'weanji bwarbwariin ghoadayda gidahaw ea ghwalaabwa hoowa buuneessean;

⁴ Aba gideaba suurja ghoadayda gidabinna jeeda barureega nyaawa, sinung' niny aba jeeda barbarandaannyi niidayda gidamideawa sean.”

Yeesu gabaloola nyarjeawda gheeda sibatta Aseetta

⁵ Iiduw nea gabaloola mwaatkwa gheeda sibatta Aseetta, gida siittamdaamda aba lagheanga miyaas ea haleanjeeda sisappa geadi bea ghadooweeda gwayeeshsha,

⁶ “Aba haleanjeeni ong'ulayiin, gayghwahidu damanda jea ea mayghoabit lagheana aba uhuumba nuut jea ea majeeng'ng'adeasa ng'eanyi.”

Sawanadeeda ea ghabasta

⁷ Hean geannyaash niny nea geyeeshsha, “Ginealshoochcheanda, ng'asheesu gayghoaw eeju, ak gwadeagoodeaba ng'asheesu ea naaha jea ghoahiimu gideaba hinnoodeaba ng'asheesu nineekkiit?”

⁸ Hean gwayeeshsha, “Ashageada adagahuttaneegwa siida; gwanda fuga saang'a jea ghapkaana gheawungeasu, nea gwayeena, ‘Siida aniini gil!’ Nea ‘Damanda nineekkiit!’ Adoayachchi geeshta.

⁹ Inyeessa gajayiinya iitta ng'uchcheeda ea jaleadinga, ea adoabealli; aba gideaba ng'asheesu gaygoosheeda ghwahidu, nea muudeanooda ea maygabay ghwahidu.”

¹⁰ Ng'atta gwayeeshsha saawa, “Gaygaba daroori ng'uchchi daroar nuut, ea sugoochcheandumeeni ng'uchchi sugoochcheandumeeda nuut;

¹¹ gaygwanda sawooda haw bea ng'eanyiida, ak gaygang'eeda gejeadinga aba daroorakka sean ea geyoonung'wea kka; ng'asheega jea ghwanung' eahamng'eanyi, ea gwadeagwajeega hees leabu humng'eeda.

¹² Ak damanda migapnu ng'asheesu seaniin gajeang'ng'waanyeagwa ak geesawaneegwa, nea geayadeagwa gealga sinnealshachcheewa ak gajeejakseegwa ghealooniga ak gajeayadeagwa madeeda sugoodiga hees ea madeeda fuga hees ambaliischi aba gheawungeasu.

¹³ Ak abeeda gili gayghoaw muwwunooda aba heedeang'wa.

¹⁴ Asi ong'ng'ooysiina jeesingeagwa ak ea adootteemshi aba gichchea ashaayda ng'asheega;

¹⁵ aba gideaba gaydagoneegwa ng'asheega ea weaghumeeda jea inyeessa eara weajoodigeagwa ghwaraay ng'alealleeda ghana gichchea ghwashang'da.

¹⁶ Ak gayghaghaseagwa ghweanigeagwa ea gheamadigeagwa ea oorjooga geamadu, ea buweadeegeagwa ea fuga oduupcheewi nea mwaatkwa gaygwanuusseegwa;

¹⁷ ak agooga gajeasteagwa aba gheawungeasu.

¹⁸ Ea mayghwaroat eara budeanjagi bea iheenngeagwa.

¹⁹ Ak agooga aba milikghteaydeang'wa gajookghuuha eaweegeagwa.

Yeesu gabaloola nyarjeawda Yerusaleemu

²⁰ “Asi iyoadaayi mujiineeda Yerusaleemu nea nineaweesa lugooda, abeeda anala gideaba nineekkiit nyaroadaannyi.

²¹ Nea fuga mida Yudeeya ea dasalsiina iheenga gijeega, nea gea mida mujiin ea daritteaysiina nea gea mida gharang'da ea adiidu ghapka jeani;

²² aba gideaba eawoojigiga gajea gea sawanadeeda ak ghoaw gida nyaashta ng'ooruutka.

²³ Dashageada gadeemga mideawa diibiga ea gea areerji diibiga aba askwearjoojikka! Aba gideaba gayghwadaa ng'asheanda ng'waan, aba gideaba gaygwanda sawanadeeda haw jeeda ng'eanyiida ea nyarasta aba badaydeaba fiisu;

²⁴ Ak gajeenuseadawa bwaanga nea suuk geattabwaardawa jeeda emoojiga sean nea Yerusaleemu gayghoalla emoojiga ea ghwahidu damanda fuga emoojiga.

Hinnooda Balleanda Siida

²⁵ “Gajadaaha gwadeagwajeega aba gheang'da aseetta ea sheeda ea miinga, gayghwanyas emoojiga jeeda ng'eanyiida sawanadeeda nea ghahamng'eanyi aba nyeashta laweajajeega basooda,

²⁶ buuneeda gaygoohiili aba muuwda aba gimmuukghnooda gichchea gwahissa ng'eanyiida, aba gideaba uurda mida humng'eeda gajeetuumduum.

²⁷ Ak gajeadaah Balleanda Siida nea ghwaana jeeda shamoghooda nea gwandeawa uurda ea gigheambiitta haw.

²⁸ Asi ghamneawa ng'asheesu iihidu ghoahalli geat, amiinada ak goong'ullay humng'eeda, aba gideaba nineekiit lealnoodeang'wa.”

Gidanaal fii shabogheechcheanda

²⁹ Hean iiduw gwarukusa saawa galeega nea gwayeeshsha, “Ang'ulla shabogheechcheanda ea geediga suurja sean;

³⁰ Iyoadaayi nea ghafirfiir seenga nyawiiri, abeeda goojeeng'u gideaba doomeelda nineekkiit.

³¹ Asi eara agooga iyoadaayi ng'asheesu nea gapnu, anala gideaba sugoochcheandumeeda Aseetta nineekkiit.

³² Aba huumwa geayeeshshineegwa jeachcheengsu bea ghamneawean mayghwanaawuda nea miyadaaha ng'asheesu.

³³ Humng'eeda ea ng'eanyiida gaygammudean. Duukku ng'asheesu ea maygammudean eara hay.

Gammiisa ging'weernooda

³⁴ “Asi afra geat adagoobal guroruunatkeagwa beeshkweeda ea booktuumeeda ea eaweesu bea ghamneawean, ea gwashameegwa eaweettida; gawuurji gidang'ng'oonnyiida ghudumbwaada haleanjeeda;

³⁵ aba gideaba nii gichchea gwahissinda fuga sean abiitta badayda ng'eanyiisseani.

³⁶ Asi agooga afra geaet galaagasean, nea ghoamwaashchi Aseetta gagoonegwa uurda jea oattaraamwa ng'asheesu sean jea gapnun, ea aminaada aba madeeda Balleanda Siida.”

³⁷ Inyeessa gonealshi askweari aba jeeda gheeda sibatta Aseetta, nea eawa gwaritteawa jeeda mujiini ak gawa gobiida uhuuda gijeeda suguura Masaytuni.

³⁸ Hean inyeessa sakteayda duw gaweay buuneessean headaannyi eelleeysiit aba jeeda gheeda sibatta Aseetta.