Lukka 20 - NEAJEEDA EESH BEA BUUNEESSEAN

Geannyaash Yeesu heeda nyasa gheambalmeadaannyi

¹ Eaweechcha nea ghoonaal buuneeda aba jeeda gheeda sibatta Aseettean, nea gwarukwiida giijaasta miy, gaweay headaannyi ashoohoodiga hees ea ng'oorshoodiga ea gweargwa

² ak geeyeeshsha niny, “Rukuneasa gisni ng'asheesu aba gheambalmeedeabeang'a, ea ng'eaha gil siida goonnyi gheambalmeani.”

³ Ghwasha saawa nea gwayeeshsha, “Earaniini gaydanyasheagwa ng'ashaanjagi, asi arukunean,

⁴ Ghayi gibattiisanda Yohaana gwaleabu humng'eeda ghana leabu heeda buuneeda?”

⁵ Hean gabiissa gwasheang'nyi nea gwayi, “Ghamneawa isiyeeshshi ‘Gwaleabu humng'eeda,’ gaygwayi, ‘Ghwasaan anda ghayi ak ea mwoomwasi niny?’

⁶ Ama siyeeshshi, ‘Gwaleabu heeda buuneeda,’ ada gaygafutteasa buuneessean aba lagheanga aba gideaba ghamwas sean gideaba Yohaana sibaneeda.”

⁷ Hean ghwasha Saawa nea gwayeeshsha aseesa meanali heelleabu.

⁸ Gwayeeshsha Yeesu saawa, “Eara aniini ea maydarukuneegwa heeda leabu gimbalischooni itteanyu easinni ng'asheesuun.”

Gissigala fuga aragan madamnyeanda misabiibu

⁹ Hean ghoang'eat giibaloolda buuneeda nea gwarukusa galeesu, “Ghayi sii gang'eapsa sabiibu jeeda madamnyeandaannyi, hean gwanung'usa madamnyeandaannyi fuga jea gooragan, ak gawa daroorakka sheagi, goobiida hoowa ea gageawiit.

¹⁰ Godendeen ama gul damandida, gojeakta soomjeanda heeda fuga aragan madamnyeandean eattaw haghweega mwatkwa bea sabiibu; ng'atta ghabwar fukka aragan madamnyeandean ak geanung' gawa nea mwaada gil.

¹¹ Iiduw gojeakta siidida soomjeanda nuut; hitta earada geabwar ea eesawan ak geenung' gawa nea ghabwaspwasaada nea mwada gil.

¹² Iiduw gojeakta siideaba samwagu; ada geabwar ea gwasawana ak geahoan gawa jarooda.

¹³ Gwayi siidida bea madamnyeanda misabiibuun, ‘Gay dasin naaha? Gaydeajeakta balleandeanyu abwariinyi; gwadeeppa eesissa mureeda.’

¹⁴ Daa fukka aragan madamnyeandean, gwayeeshsha geat saawa, ‘Siisi dea jea gwahearaniischi, anung' eabwara ghami ak gabwaheasa hearaniischooda.’

¹⁵ Hean geang'ng'waay balleandida bea siidean ak gerruutteawa jeeda madamnyeanda misabiibu ak geenuus. Asi heappi sisi bea madamnyeandean iihidu gaygwahindaan fiisu?

¹⁶ Adaaha gayghwaan ama hidu gaygwanuuseada fugiga aragan madamnyeandannyiin ama hit gaygagasa fii suuk jea gwanung'usa madamnyeandaannyi.” Siyiiy ng'asheesu geeyi, “Gagasa ghoashiiy Aseetta!”

¹⁷ Hean ghoaduup ghaang' saawa, ak gwayeesha, “Abeeda ng'asheesu sing'wardunun naaha bea gideaba: ‘Lagheaneeni aneawa ghaang' fuga deekshi nea meanung' ghoaw giliin niiw lagheaneeda haw washiin?’

¹⁸ Nea siida jea gobedeaysa lagheaneeni gaygagiishachchi, nea siida was sean ng'adeesa lagheaneeni gay ghang'aal.”

Ginyeashteayda girutteayda gwaadi

¹⁹ Muchchu gagasa ng'oorshoodiga ea ashoohodiga hees gichchea ghoang'ng'waayda aba damandida, ak ghoawal buuneeda; aba gideaba saawa nijeeng'u gideaba ng'asheesu sigalla geadiin geerukuna badahuukka nyawa.

²⁰ Inyessa geasaach niny nea geegasa gheatta miy ak gechcheakta fuga hinda geat fuga doobiiweadi, eanyas gheatta gichchea eaghasta aba nga'sheesu ikkaaschiin, ak geayin geattinga sugoochcheanda haw ahaaghwa ng'eanyiida.

²¹ Geannyaash niny nea geeyeesha, “Ginealshoochcheanda, geanalli gideaba girukku ng'asheega nea gidoabiiwi, nea miduuppi siisi haw, ang'iing'i ginaali buuneeda naweeda Aseetta doabiiwaat.

²² Heappi, ghwadoabiiwi gideaba geattaw Gaysaari gwaadi, ghana manda?”

²³ Gwajeeng'u milmilanda nyaawa ak gwayeeshsha,

²⁴ “Oahiimnaan shiliingajeanda. Uhuuni ea gheawung'su gabeang'a? Geeyeeshsha, Gaba Gaysaari.”

²⁵ Gwayeeshsha saawa, “Asaha ghoattawji Gaysaari gea Gaysaari, ak ghoattawji Aseetta gea was gea Aseetta.”

²⁶ Hean gearaay gichchea eang'ng'waayda aba ng'asheagaaschi aba madeeda buuneeda; ghahamng'eanyi buuneeda aba gida shaayda ng'asheega ak ghwasiinda sean.

Ginyeashteayda dunnooda miyeeda

²⁷ Iiduw ghapka headaannyi fiisu ng'ay was Sadukkayajeega eena manda dunnooda,

²⁸ Hean geannyaash nea geeyeeshsha, “Ginealshoochcheanda, Muusa ghayi gang'oorneasa gideaba siida iimea oorjeeda ghaamwat, nea gwandeawa gatmooda mandeawana diibiga, gaygageanda oorjeeda ghaamwat gatmootta ak gwanyaksa diibiga oorjeeda ghaamwat.

²⁹ Ghayi gwanda oorju ispwa bea ghaamwadagi, gageeshshi oorjeeda haw, amaduw ghami nea ghwanung'wa hiji gatmooda mandeawana diibiga;

³⁰ ea deaba iyyeenya

³¹ gea deaba samwagu, iiduw gwahearan oorjookka seaniin assipwaan nea gameewwa agi ea goosha sean nea gatmoodida ea mandeawana diibiga.

³² Iiduw eara gatmoodida ghami.

³³ Heappi eaweetta siittuunna buuneeda gatmooni gaygaba ng'eaha? Aba gideaba nighi buuneeda ea ghwahitta ispwa.”

³⁴ Gwayeeshsha Yeesu saawa, “Balloojigeaba ng'eanyiini gageeshshachchi, nea gegeena;

³⁵ nea fukka sinung' ghoaw gili miisa ng'eanyiidida bea hooweaniin nea duunnoodida bea miyeedeani mageeshshachchi nea megeenna,

³⁶ ea maygabiikta gameewa aba gideaba gaygawuurji malaykajeega, ak saawa ea balloojiga Aseetta gil ea gideaba saawa balloojiga sittuuttu.

³⁷ Aba iitta gideaba gwaduuttu buuneeda, eara Muusa ghoahiimu aba jeeda ng'ooruutka iitta geetta mughuush damanda guursiina Ng'uttamiida was Aseetta Abrahaamu ea Aseetta Isakka ea Aseetta Yakkobo.

³⁸ Asi ghamneawa niny mii Aseetta fuga nimeewa gil, aba gideaba ghwanyas sean eaweega aba niny.”

³⁹ Ghwasha ng'oorshoodiga mwaatkwa nea geeyeeshsha, “Ginealshoochcheanda, aba hiji girgu huumwa.”

⁴⁰ Ea mudu gwanda siida ammu gabadaksa ghoanyaash ng'asheanda.

Ginyeashteayda iitta Gristo

⁴¹ Ng'atta gwayeeshsha saawa, “Gaygwayeendaan saawa gideaba Gristo balleanda Dawdihi?.

⁴² Aba gideaba gwayi Dawdi aba jeeda gittabooda nyiigheaga, ‘Ng'uttamida gwayeeshsha Ng'uttamideanyu, Apteada aba geattindeanyu bea dugwa,

⁴³ ea danung' ghoaw weajoodigaagu horgeeda jea iinna geashangaagu.’

⁴⁴ Abeeda Dawdi iguura niny Ng'uttamiida ghoawdaan balleandaannyi?”

Yeesu gwayeeshsha buuneeda ashageada ng'oorshoodiga deaweeda

⁴⁵ Hean nea gwayiing'shi buuneessean gwayeeshsha ginealangaaschi,

⁴⁶ “Ashageada ng'oorshoodiga, fuga bwariiy gwaleammideawa hang'weakka geawwi bwariiy eyenniisa seayu aba naadajeega, ea hoorgajeega miyaas aba gealga sinnealshachcheewa, nea eara iweay gealga ghwelmeeda ghwanyoahaada hoorgajeega madeeda,

⁴⁷ fuga inyeessa gweagiisachchi aba gealga masiinung'weega nea aba gimminnoodeaba geat inyeessa ghamwaash Aseetta nea gogeawiit. Asi gayghwanyas girgweaksiinda haw.”