Lukka 17 - NEAJEEDA EESH BEA BUUNEESSEAN

Ring'eeda

¹ Ng'atta gwayeeshsha ginealangaaschi “Simsimda jea gweadu riing'eeda mayghwashiy hinnooda ak ea dashaageada siidida jea ghwanung' ghwahidu!

² Gwachchi gayghang'wana siisi geerassa gheatta lagheaneeda sing'ealliida ak geejaksa jeeda basooda, mayghwasam gideaba gayghwanung' goodiiy siyagi aba jeedeaba suu manang'iin.

³ Afra geat; iyadiiy oorjeeda geamadu, gireekusi, idukkuuna gisamsi;

⁴ ama adiiyseey niba ispwa aba jeemba askwarjaanjagi, ak gabiikseey niba ispwa nea gwayi, ‘Neadukkuuni,’ Abeeda gisamsi.”

Masaweega

⁵ Gwayeeshsha Giijasoodiga Ng'uttamiida, “Aheaneasa masaweega.”

⁶ Gwayeeshsha Ng'uttamiida, “Inyeeda goondeawi masaweega deenna gheang'nyeanda geetta suguura haradaali, abeeda gajoammuusa ayeeshshiina meagheayeanda, ‘Loadaana ak geng'eapseey jeeda basooda,’ ak gayghoawal gheang'deang'wa.”

Gidamiisa soomjeanda

⁷ “Heappi gajea ng'eaha gil aba jeedeang'wa mideawa soomjeanda bwar ng'eanyi ghana ghoahaghwa gisilga, jea gwayeeshsha niny ibiikna madamnyeanda, ‘Lamwajaana beenni apteada agiischeena?’

⁸ Heappi maygwayeeshsha, ‘Sinnean gichcheadaak, radiischeena ak gigadiyeesean ea daahiit, agiischooda ea leeshooda, ak abeeda giyeagiischi nea gileeshi?’

⁹ Gaygabadiischeesa soomjeandida aba gideaba nisin gissiruksa?

¹⁰ Eara agooga gidowuurjeewi gil, iyoasinnyi gidasiyeeshshineegwa asna, gooyeeshshi geat, ‘Aseasa geewoschi soomjooga marachchi gil, geesinnyi gidamiseasa sinooda.’”

Yeesu ghoahaap fii damanamughuush

¹¹ Iiduw nea gwanda naweeda gawa Yerusaleemu gwasik dageascheeda ng'eanyiida Samariya ea Galilaaya.

¹² Geeyi bwak ama hitta jeemba gharang'agi gwaroonnyi sea fii damanamughuush beardooschi udamusuura, ak ghaminaada nea sheagi

¹³ Goojuur nea gwayi, “Yeesu, Siida haw, eaniyean bwaydaneasa.”

¹⁴ Daa saawa gwayeeshsha, “Aweayeena ohhiimsiina geat ashoohoodiga diineeda Yahuudi.” Damandida beawaan geammiidu.

¹⁵ Daa siiyagi aba jeannyaawa gideaba nihaap, gabiigu nea ghoaghambiit Aseetta aba ghuutta haw;

¹⁶ gobeedeaysa Siidida geeshanga Yeesu ak gabadischeesa. Nea siidida gaba emeeda Samariya.

¹⁷ Hean gwayi Yeesu, “Fuga gwachchi sihhaap adamanamughuush? Gea ashshageash gwandayeenu?.

¹⁸ Manda dea nibiigu ghoaghambiit Aseetta geaghuus rabascheanji?”

¹⁹ Ak gwayeeshsha niny, “Ng'eada una; gidahaapnyi masaweagaagu.”

Hinnoda gheambalmeeda

²⁰ Ng'atta ghoanyaash Farisayajeega nea gwayeeshsha, “Sugoochcheandumeeda Aseetta gayghwahidu eeju?” Ghwasha nea gwayeeshsha saawa, “Sugoochcheandumeeda Aseetta mayghwahidu nea geadahaan.

²¹ Ea manda siichchea gwayi, ‘Gwanda hiji!’ ghana ‘Hoowa!’ Aba gideaba ng'ulla sugoochcheandumeeda Aseetta gwanda jeesingeagwa.”

²² Hean gwayeeshsha ginealanga, “Gayghwahidu eawoojiga jea agasseena adaahana eaweechcheanjagi aba eawoojiga Balleanda Siida, ak ea mwajadaaha.

²³ Ak gajeeyeeshshineegwa, ‘Ang'ulla gwanda hoowa!’ ghana ‘Ang'ulla gwanda hiji!’ Adooweayi, nea adooyaachchi geeshta nyaawa.

²⁴ Aba gideaba gaygawuurji dadamandeeda aboong'na meatkweanagi bea humng'eeda ea ghwahitta meatkweeda niirja bea humng'eeda, ea gichchea gawuurji Balleanda Siida gil aba aweadaannyi.

²⁵ Ak gayghanyi ghwanyas hang'weanidooda ammadeeda aba haleanjeessaang'a, nea gayghaheawa fiisu bea jeachcheeng'suun.

²⁶ Ak gidaghayi uurji aba eawoojiga Nuhu, ea gichchea gawuurji gil aba eawoojiga Balleanda Siida.

²⁷ Geeyeagiischi, nea geeleeshi, geegeeshshi, nea geegeena, ea ghwahiitta eaweeda weewa Nuuhu jeeda maleambooda, ghwahiing'aan roopta haw ak ghwalas uhudeaba sean.

²⁸ Gaygawuurji gidaghayi uurji aba eawoojiga Luuttu, abeeda geyeagiischi nea geeleeshi, geasha nea geashayda, geehista, nea geedeekshi,

²⁹ muchchu eaweeda ritteawa Luuttu Sodomean ghoaptu beasta wunda roopta leabu humng'eeda ak ghwalas uhuudeaba sean.

³⁰ Nii gichchea gawuurji gil aba eaweeda jea eattaajiida Balleanda Siida.

³¹ “Eaweedida siida mida uhuuda gheeda nea gwanda haleanjeedaannyi jeeda gheeda, adaghwararang'aan gageanda; ak eara dea mida madamnyeanda ea adagabiikta bwadaw.

³² Oapkaada gatmooda Luuttu.

³³ Siida wassean gasa ghoaghu aweagaaschi gaygahutta, nea dea hutteawi aweagaaschi gayghoaghu.

³⁴ Geayeeshshineegwa eaweedida, gaygwandeayi fii iyyeenya aba bulaliida, ak gajeegeanda siyagi ak geenung'usa heeda nirja.

³⁵ Gaygang'ealshi gadeem iyyeenya aba hijagi, gegeanda agi ak geenung'usa heeda niirja.” [

³⁶ Gaygwanda fii iyyeenya madamnyeanda, ak gajegenda akkalealla, ak genung'usa heeda akkalealla.]

³⁷ Ak geeyeeshsha niny “Eenu gil Ng'uttamiida?” Gwayeeshsha saawa, “Heeda mida guumeeda heeda jea gooweameesa madoonyaakka.”