Lukka 14 - NEAJEEDA EESH BEA BUUNEESSEAN

Yeesu ghoahaap siida miyaan

¹ Eaweechcha nea gwanda sabatto gawa gweagiischi aba gheappa siyagi ambaliischi bea Farisayajeega, hean geeng'ulla niny.

² Asi ng'ulla, gwanda madeeda siisi lolloohani saseeda.

³ Gobalool Yeesu diinagoodiga ea Farisayajeega, nea gwayeeshsha, “Heappi ghwadoabiiwi gideaba gajeahhaap siida eaweeda Sabatto, ghana manda?”

⁴ Hean geasiinda. Ghoang'ng'waay siidida ak ghoahaap, ak gwasiksa gawa.

⁵ Ak gwayeeshsha saawa, “Gajea ng'eaha aba jeedeang'wa, jea ghoabitta, balleandaannyi ghana heaydaannyi jeeda healadeeda, eaweeda Sabatto jea ea maygabay gwalealu?”

⁶ Ea measha ng'asheanji.

Ng'eeninda ea inynyeanda jeeda

⁷ Iiduw gwaruksa Yeesu buuneeda gidagala fuga siguush, iidaa gidiissa ghwaloatta buuneeda hoorgajeegeaba mwadi, ak gwayeeshsha,

⁸ “Tiguurneey siida wassean nyeangiida, adiipteadawi hoorgeda madeeda, aba gideaba gwadeeppa ea siguush siida siwwal gheang'da mawuurjeeweey;

⁹ ak ghwahidu siida guusheegwa ak gwayi, ‘Assiipta goopteada siisi aba hiji,’ abeeda gajuna apteadawana horgeedeaba bwadaw nea gibwaspwasaadi.

¹⁰ Asi isiguushnyi, guwi ak giipteadi aba hoorgajeegeaba bwadaw, iihidu siida guurneey gaygwayi, Siida eaduupchcheewi beenni hiji bea mwadiin, abeeda gaynyasa mureeda aba madeeda buuneessean imbuuchcheewi.

¹¹ Aba gideaba siisi nyoo goodiing'u geaw gajeahiing'u nea dea hiing'u geaw gajeettiing'u.”

¹² Ng'atta gwayeeshsha siitta guush ninyiin, “Iidaydi hamitteaba askweari ghana ghweelmeeda, adiguushi fuga iduupcheewi ghana oorjooga geamadu ghana buweadeegaagu ghana giischeawdaang'u was meanang'oodiga, gajiiduw gaguushnyi saawa gawalu guurshtida ghayi ittaang'uun.

¹³ Eaweeda isini ghwelmeeda aba gheang'u abeeda giguursi fuga barbari, ea gea ghanyeatta ea gea badoojiga, ea gea ng'oowi,

¹⁴ abeeda gaynyasa ng'wanooda, aba gideaba fiisu mandeawana gichchea gawalneey. Ak gaygawalneey Aseetta eaweetta dunnooda fuga doobiiweadi.”

Gissigala ghwelmeeda haw

¹⁵ Iiy Siagi bea jeeda fuga ammbuuchchi gwayeeshsha, “Ghang'wana siida jea ghwaak mukkatte aba jeeda sugoochcheandumeeda Aseetta!”

¹⁶ Ghwasha ak gwayeeshsha niny, “Siyagi ghayi gwasin ghweelmeeda haw, ak gaguush fuga saang'a;

¹⁷ hitta damanda ghweelmeeda goojeakta soomjeanda gaguush rabastannyi nea gwayeeshsha, ‘Abeenni aba gideaba haleanjeessean nihit.’

¹⁸ Hean ghabwar badooji sean. Ak gwayeeshsha dea madeeda siitta, ‘Nashaayi madamnyeanda ak gaydawa dadaa, geamuscheey samsean.’

¹⁹ Gwayi niirja, ‘Nashaayi heew damanamughuush bea barooda, ghamneawa geawi danaal, geamuscheey samsean.’

²⁰ Gwayi nirja, ‘Nagheannyi gatmooda ak ea maydaammu dahidu.’

²¹ Iiduw gawa soomjeanda ghoadaw siidaannyi haw itteaba ng'asheesu seanin. Ak ghwanyareas siida bea gheeda ak gwayeeshsha soomjeandaannyi, ‘Lamwaja una jeeda naweadinga hees ea gea manang'i bea mujinin, ak giyeadu fuga barbari ea gea ghanyeatta ea gea badoojiga ea gea ng'oowwi.’

²² Ak gwayeeshsha soomjeanda, ‘Siida mureeda, gida ijeakteawanean nahiichchi ak gheeda ea miighwannyiit.’

²³ Hean gwayeeshsha Siitta hawiin soomjeanda, ‘Ritta jarooda una guyeeda naweadinga ea moonghajeega ak gidiing'si buuneeda ghapka gah ghwannyiit gheanyu.

²⁴ Aba gideaba geayeeshshineegwa, manda eara siyagi aba jeedeaba fukka sigushiin dea jea gwasamu ghwelmedeanyu.’”

Gidamiisa sinooda ijeahuuwa ginealaneeda

²⁵ Hean gaweay emeeda nea goodeay niny; ak Ghwayam geaw ak gwayeeshsha,

²⁶ “Siida iihidu heedeanyu nea mwasta ghwaan ea ghaamwaat ea gatmoadaannyi ea diibigaaschi ea oorjooga ghamwaat ea haweega ghaamwat, nea amwasta eaweagaaschi mwoammu ghoaw ginealaneedeanyu.

²⁷ Siida mwaada behiidaannyi ak gweadu geeshteanyu, mwoammu ghoaw ginealaneedeanyu.

²⁸ Heappi gajea ng'eaha aba agooga gasa ghwadeas gheeda haw sikkeawiit, ak ea meapteada gwayiida nea goodeen haleanjeeda jea ghwadeakta ghwadaa ea jea gwadeay?

²⁹ Aba gideaba gajiiduw gwasin sindeetta, ak ghwaraay ghoahiit, ak abeeda gwajuuga fukka sean dahiin,

³⁰ nea geeyi, ‘Siisi ghoang'eat ghuutta deekshooda ak ghwaraay ghoahiit.’

³¹ Ghana gajea ana sugoochchean gil jea iigasa gawa gang'uchchi sea niirja, jea ea mayghanyi goopteada, ak gootteemshi ghwadaa ea ghoammu ninyi sea fii sagalamnyooji damanamughuush, ea jea ghoammu gang'uchchi sea niirja mideawa fii sagalamnyooji diktam?

³² Ak idaa gideaba mwoammu gabay gojeakta buuneeda gabay gagasa hoyyoo nea gudeasheagi.

³³ Asi gwasnu eara aba agooga, siida manung'usiina heeda haleanjeedaannyi sean mideawa mwoammu ghoaw ginealaneedeanyu.

Balang'da masamna gil

³⁴ “Balang'da aamiy, ak balang'da iinuhutta samneeda, ea manda gichchea ekkuuyi gabiiksa mattawanda?

³⁵ Biissa ea mudugwarachchi gil earaba ng'eanyiida ghana raghwatta, inyeessa gageanu buuneeda ak gohiisa jarooda. Siida mideawa iidiga ea dayiing'shi.”