Lukka 1 - NEAJEEDA EESH BEA BUUNEESSEAN

¹ Aba gideaba ng'asheesu ning'waar Fuga saang'a nea gooroottooschi, aba iitta ng'asheega ghayi sisin aba dageascheedeanya,

² gawuurji gidaghayi goondaneasa mushoodiga daa ea aba heeda fuga rukkwiida ng'asheenda,

³ Ak ea nadaayi eara Aniini gideaba ghwahit, ak ea neasikteawi muuchchi gidaghayi ng'eatta ng'asheesu seaniin aba beanatta, ak geang'orneey ng'asheesu nea ghadoabiiwji Diofilooyda mureeda,

⁴ abeeda gay nala humeanda appadayda ng'asheega ghayi sibean surukneeyi.

Geergu jeatta Yohaaneeda Abattiisachchi

⁵ Damanda waseewa Heroode sugoochcheada Yudeeya, abeeda gwanda ashoohoochcheanji suguura Sakkariya, bea gharmuchcheanda Abiya, nea gwandeawa gatmoadaannyi bea haweega Aron, nea gheawungaaschi geguura Elisabeetti.

⁶ Nea abeeda saawa ea doobiweadi aba madeeda Aseetta, nea ghoang'ng'waay muuchchi digheanynyeekka sean ea humeannyeekka Ng'uttamiida nea meerukunana badahuukka ng'asheega munyas.

⁷ Abeeda ea mandeawana jeepta aba gideaba Elisabeetti sonnooda nea nuwoosiidi sean.

⁸ Nea aba damanda sineewa gadiyeeda ashoohoochcheandumeeda aba madeeda Aseetta nea abeeda ea galannyeanda sineewa gadiyeeda lugoodaannyi,

⁹ aba seareetta bea gissiniida ashoohoodiga gadiyeedean, inyessa ghwaloat Aseetta siida gawa jeeda gheeda sibatta Aseetta bea Ng'uttamiida ghaghwarda geetta sing'ng'andiitta.

¹⁰ Nea aba damani sing'ng'andiida gheedean abeeda gwanda Emeessean daghatta gheeda ghamwaash Aseetta.

¹¹ Hean goobeersa Malaykajeanda Ng'utamiida ak ghaminada aba murdeeda geattinda dugwa bea heeda wagiida siyiina geetta sing'ng'andiitta.

¹² Daa Sakkariya gwahirbaban nea ghabeal.

¹³ Ak gwayeeshsha Malaykajeanda, “Adibeal, Sakkariya, aba gideaba siyiiy gidumwaashi, nea eara Elisabeetteeda was gatmoadaang'u gaygwajiilneey balleanda, ak gaygureewana ghawungaaschi Yohaana.

¹⁴ Ak gay hoosana nea ging'weelayi muuchchi, nea eara fuga saang'a gaygahoosassa jeattaannyi;

¹⁵ aba gideaba gaygwaheedu aba madeeda Ng'uttamiida, Mayghwali difaayi ghana gichchea gooboogit, ak gajeannyiit Gurorooda Ghaydit, ghang'eada jeeda ghaamwat.

¹⁶ Ak gaygooguumsa balloojiga saang'a bea Israeeli Ng'uttamiida was Aseetta nyaawa,

¹⁷ ak Gaygosheedeawa aba jeeda gurorooda ea uurda Eliya, ak ghwayam guroruunatka ghweaniga gagal diibiga, nea fuga mandeawana mureeda ghoadaw weaghumeeda doobiiwnatta, ak gwasissa Ng'uttamiida fuga hideadi.”

¹⁸ Ak gwayeeshsha Sakkariya malaykajeanda, “Gaydajeeng'daydaan ng'asheanji? Aba gideaba aniini nawaasiichchi nea eara gatmoodeanyu ea nuwaasiit.”

¹⁹ Ghwasha Malaykajeanda nea gwayeeshsha, “Aniini geawoschi Gabrieleeda minaada aba madeeda Aseetta, ak gechcheakneani headaang'u deanneay Giijasi miyiin.

²⁰ Asi ng'ulla, gayghwaroat ghuuttaang'u ea eamudammuussa baloola ea ghwahita eaweeda jea ghang'attaawa ng'asheesu, aba gideaba mumwasi ng'asheegeasu jea gwasa aba damanda nyaawa.”

²¹ Nea gafurriida buuneeda Sakkaria, ghahamng'eanyi sean aba gideaba nishiing'da aba jeeda gheeda sibatta Aseetta.

²² Hean nea gwardu jarooda, ghwaraay goobalool buuneeda, ak gwajeeng'u buuneeda gideaba sihhiimsa gil aba jeeda gheeda sibatta Aseetta; goobaloola geattinga nea niroat ghuutta.

²³ Duulean galandaannyi bea gadiyeada, gawa gheannyi.

²⁴ Ng'atta eawoojusu ng'ay ghwadurmaniit gatmoadaannyi suguura Elisabeetti, ak ghafuy geaw sheamuut nea gwayi,

²⁵ “Nii gissinnean Ng'uttamiida aba eaweeda ng'ulleewanean ak gageandeawean rearga aba jeeda buuneeda.”

Geergu jeatta Yeesu

²⁶ Sheedeaba lah goojeakta Aseetta malaykajeanda suguura Gabrieli gawa mujiineeda Nasareetti mida ng'eanyiida Galilaaya,

²⁷ hichpa hudi miyeasat suguura Mariya, anyeari siisi suguura Yoseefu bea dooshagi sea sugoochcheanda sugura Dawdi.

²⁸ Ghwahidu headaannyi ak gwayeeshsha, “Seayuu ang'iing'eeda siittaw dagheerjeandumeeda ang'iing'i gindeayi sea Ng'uttamiida!”

²⁹ Hean gwadeawiit muuchchi aba ng'asheanji ak goottemsheesa seayoani giduurji.

³⁰ Gwayeeshsha Malaykajeanda, “Adibeali Mariya, aba gideaba nugoonnyi Aseetta dagheerjeandumeeda.

³¹ Asi ngulla, gaygweayiida ak Gayjiila balleanda, ak gayguureewana gheawungaaschi Yeesu.

³² Nea gajeahaw, ak gajeeguura Balleanda Aseetta haw mida humng'eeda; nea gayghoadaw Ng'uttamiida was Aseetta hoorgeeda sugoochcheandumeeda Dawdi was ghwaan,

³³ nea gayghoahaaghwa gheeh Yakkobo ea ghoaw gweanyeekka manda muudeanooda; nea sugoochcheandumeedaannyi ea maygwanda muudeanooda.”

³⁴ Gwayeeshsha Mariya malaykajeanda, “Gayghoawattaan ng'asheanji nea aniini ea meandeawani siyeeda?”

³⁵ Gwayeeshsha Malaykajeanda, “Gaygwashubeseey Gurorooda Ghaydit, nea uurda Aseetta haw gaygookwealseey jirooneeda; aba sareani jeepta jea eeji gajeeguura siida ghaydit, Balleanda Aseetta.

³⁶ Asi ng'ulla, buweachcheandaang'u was Elisabetti eara niny nigweayiit aba jeeda woosindaannyi ak gaygwaji balleanda; nea nii ea sheedeaba lahi; nea niny abeeda geeguura sonooda.

³⁷ Aba gideaba manda ng'asheanda jea ghwaraay Aseetta.”

³⁸ Gwayeeshsha Mariya, “Ng'ulla, anini geawoschi soomjeanda Ng'uttamiida, nung' gwasa aba heeeanyu ng'asheanji inyashiin.” Ak ghabeawa headaannyi Malaykajeanda.

Mariya gabareasa Elisabeetti

³⁹ Askwearjoojikka ghang'eat Mariya ak ghwalamwajaada gawa ng'eanyiida heayeeniiga jeeda mujiineeda Yuuda.

⁴⁰ Ak Gawa jeeda gheeh Sakkariya ak googeachchi Elisabeetti;

⁴¹ Iiy Elisabeetti giigeachcheeda Mariya, ghwadanghan jeepta miida jeadaannyi ak geannyiit Elisabeetti Gurorooda Ghaydiit

⁴² goojuur aba ghuutta haw nea gwayi, “Sugoonnyi ghawooda aba jeeda gadeemga, ak ea sittaw ghawooda dea jea jiila!

⁴³ Gayghoawdaani aba heedeanyu, gideaba ghwahidu heedeanyu gheamatta Ng'uttamiideanyu?

⁴⁴ Aba gideaba ng'ulla, iyayiinyi ghuutta seayoadaang'u ghwadanghan jeepta mida jeedeanyu aba ng'weellooda.

⁴⁵ Ghang'wana siida jea ghamwas gideaba gay gwasa ng'asheega rukusa Ng'uttamiida.”

Sarmeeda Mariya bea duumsheesiinda

⁴⁶ Gwayi Mariya, “Jeedeanyu ghoaghambiit Ng'uttamiida,

⁴⁷ Nea guroroodeanyu gahoosasa Aseetta was lealnochcheandeanyu

⁴⁸ Aba gideaba nidaah nyootta uurda soomjeandaannyi. Asi ng'ulla, ghang'eada ghamneawa gaygaguureewean jeachcheenga sean dea sing'ushsha;

⁴⁹ Ak ea nisinneani siida sittaw ghawooda hoauur ng'asheega hees muuchchi, ak gheawungaschi ea ghaydiit.

⁵⁰ Nea baydeaydaannyi gwanda heeda buuneessean awal gheang'daannyi ghang'eada jeachcheenga ea gagul jeachcheenga.

⁵¹ Ak ea nihiimu uurda aba geattindaanyi, nea ghoadabwarda fuga ghwarjajeega aba jeesinga nyaawa,

⁵² Ak ea nirareang'na fuga mideawa uurjeenga hoorgajeega nyaawa bea sugoochcheandumeeda, ak goodiing'u fukka mandeawana uurjeengean;

⁵³ Ninnyiit fuga bearji jalooda aba haleanjeeda miyaas, nea meanang'oodiga gaweay nea ghwadalaada.

⁵⁴ Ak anuweat soomjeandaannyi was Israeeli, aba giipkeatta baydeaydaannyi,

⁵⁵ gawuurji gidaghayi rukusiinda ghwaanigaasa, ea Abrahaamu ea jaattaannyi aba gweannyeekka manda muudeanooda.”

⁵⁶ Gwandeayi niny sea Mariya ea goosha sheah samwagu, imuchchu gabiiktta gheannyaawa.

Jeatta Yohaaneeda Abattiisachchi

⁵⁷ Iiduw nea ghwahitta damandaannyi bea jeatta gwaji Elisabeetti jeepta was balleanda.

⁵⁸ Iiy gischeawdaannyi ea buweadeagaaschi gideaba nubwayda Ng'uttamiida Elisabeetti gang'weela sean.

⁵⁹ Eaweetteaba siis geayaat jeepta ghasmeahooda; ak ghwanyawa gajeeng'assa gheawunga ghwaan siyi Sakkariya,

⁶⁰ ak gwayeeshsha ghamwat, “Manda; gajeeguura Yohaana.”

⁶¹ Ak geeyeeshsha, “Aba buweadeagaagu manda siida sing'assa gheawung'su.”

⁶² Iiduw geeng'wachsa geadi ghwaan gwargu gheawunga gasa gang'assa.

⁶³ Gamus eeyeasa beehiida jea ghang'waar, ak ghang'waar gideaba, “Gheawungaaschi Yohaana.” Ghahamng'eanyi sean.

⁶⁴ Deagheatta ghwajaat ghuutta nea goottina ng'ushapta ak gabadiischeesa Aseetta.

⁶⁵ Hean ghang'ut muuwda gischeewda nyaawa sean. Ak gageawiit iitteaba ng'asheesu aba heayeeniga sean mida ng'eanyiida Yudeeya;

⁶⁶ Fuga sean iiy iitteaba ng'asheesu gaba nii ang'ng'ooysa jeadaannyi nea gwayi, “Jeebi gayghoaw siida uurjiin?” Aba gideaba geattinda Ng'uttamiida gwanda badaydaannyi.

Ramooraneeda Sakkariya

⁶⁷ Nea Sakkariyaayda was ghweanda jeepta geannyiit Gurorooda Ghaydit ak ghwaramoaran nea gwayeena,

⁶⁸ “Dumsheesiinda gaba Ng'uttamiida was Aseetta Israeeli, aba gideaba nibareassa ak gwalealu buneadaannyi,

⁶⁹ nimiinda gujaweeda lealnooda aba jeeda gheeda soomjeandaannyi was Dawdi,

⁷⁰ Gawuurji gidaghayi rukuteayda aba ghuutta sibangaaschi ghaydidi ghang'eada garayi,

⁷¹ ak gajeelealnaneasa heeda weajoodigaasa, ea geattinga fuga sean sideasa;

⁷² ak gayghabwayda ghwanigaasa aba gidaheelleesa, nea ghoapkaat neajeadaannyi ghaydit,

⁷³ ak gweaksa habeawooda Abrahamooda was ghweandeanya,

⁷⁴ ak gagooneasa gideaba gajeelealnaneasa geattinga weajoodigaasa, ak geaghadoawannyi nea meawwali gil,

⁷⁵ aba ghaydidanda ea doobiiwnatta galeagasean amwadeadaannyi aba jeeda eaweegaasa sean.

⁷⁶ Nea ang'iing'i jeepta, gajegureweey sibaneeda Aseetta haw; aba gideaba gajasheedeawana Ng'uttamiida sissiina naweadingaaschi,

⁷⁷ Nea gwarukusa fugaaschi ghwanal fughareeda lealnooda aba samsiinda aba geandeayda riing'eega nyaawa,

⁷⁸ Aba baydeayda Aseetteanya, nirearseasa weeshinda leabu humng'eeda,

⁷⁹ ak gayghoabwaay fuga sean mida jeeda misaneeda haw bea jirooneeda miyeeda, ak ghoadoabiiw geashangaasa eayaada naweeda miy bea hoyyoo.”

⁸⁰ Ak gwahissa heeda jeepta nea ghwanyas uurda aba gurorooda, nea goobiitta dareapcheenda ea ghwahitta eaweedaannyi jea goohimsina geaw fuga Israeeli.