Golosaayi 3 - NEAJEEDA EESH BEA BUUNEESSEAN

¹ Asi agooga isittunneegwa sea Gristo, asi agassa haleanjeeda mida humng'eeda hooweanji mida Gristoohiin, niny nipteada aba geattinda dugwa bea Aseetta.

² Oppkeatta haleanjeeda mida humng'eeda galagasean, mii gea mida ng'eanyiida gil.

³ Aba gideaba agooga goomeeway ak eaweegeagwa ea sifuy sea Gristo aba heeda Aseetta.

⁴ Iiduw isiittaajiit Gristoyda was eaweegaasa, abeeda eara agooga gajeettaajiideagwa sea niny aba jeeda giigheambiitta.

Giibindeaba garayi ea giibindeesh

⁵ Asi anung'waada ng'asheega munyas bea munda ng'eanyiida mida saseenuukkeagwa: was hiseadayeandumeeda, ririnnyeanda, geawunda gheang'da muyi, giitteemshooda muy, ea shidoodeaba ghaang', ea ghadoowanda gidamawosa Aseetta.

⁶ Appadaydeaba ng'asheesu gayghwahidu ng'weaninda Aseetta.

⁷ Ak eara agooga ghayi gooneayeewi jeedeaba ng'asheesu nea gooppiidi jeeda.

⁸ Ak ghamneawa ghoanung'waadi ng'asheesu seaniin; nyarasta, ea ng'weaninda, munyinda, ea beeshta, ea ging'weakka aba ghuusigeegwa.

⁹ Adoonappiisi geat ng'uyyeega, nea gooyeeshshi geat noasuuchchi searoojigeaba garayi, ea gissisinniida

¹⁰ ak gookkweali searoojiga eashish, sinung' gaweeriidi ak ghoanalli nea geegala ninnyyeeda ghayi bwaat.

¹¹ Ak aba sareani ea maheelli siida Yunaani ghana dea Yahuudi, dea siyaat ghasmeahooda ea dea miyeayaat ghasmeahooda, bunyeanda, ghana siida mwanala gil, ging'ng'oonyaneeda, ghana dea abal geaw, nea Gristo ea sean gil aba jeeda haleanjeesean.

¹² Asi okkwealsheatta fuga niloat Aseetta, ghaydiidi subwariiy, bea jeesinga bayyiida buuneeda, ea ng'eeninda, eattoodeaba geat bea ng'eanyi, miyinda ea milighteayda,

¹³ daba siisi sar sareambwa nuut, nea goosammiisi geat, iimida siida nidiysa nuut, gawurji gidaghayi samsiindaneegwa Ng'uttamiida, ak gwasnu eara agooga asindunu.

¹⁴ Iing'atta suu seaniin gamiiseegwa andeawana barinyeega, aba gideaba gaygooroonnyi haleanjeesean ghoaw gilagi hidaat.

¹⁵ Ak ghoanung' goombalischi hoyyoo Gristo aba jeesingeagwa, aba gideaba agooga geeguurneegwa awasa saseanagi. Nea ghoahuuyi fuga badiischooda.

¹⁶ Anung' goobiida ng'asheanda Gristo jeedeagwa nea gwaheedu, anaala nea gaba siisi reekusa nuut aba weaghumeeda sean, nea goosarmannyi nyiigheega ea sarmoojiga guroorooda nea goobadiischeesi Aseetta aba guroruunatkeagwa.

¹⁷ Nea gilwassean osinyi, aba ng'asheanda ghana sinooda, asna sean aba gheawunga Ng'uttamiida was Yeesu, nea goobadischeesi Aseetta was Gheanda aba naweedeaba niny.

Giibinda nyasitta eaweega eashish

¹⁸ Gadeemga, asissiina siyeenatkeagwa mureeda, nii gidahaguuwsa Ng'uttamiida.

¹⁹ Siyeenatka abwarinya gadeemgeagwa nea adoonyareekiisi.

²⁰ Diibiga, asisiina ghweanigeagwa ea gheamadigeagwa mureeda aba haleanjeesean, aba gideaba ng'asheanji gidagasiida Ng'uttamiida.

²¹ Ghweaniga, adoonnyareesayi diibigeagwa, aba gideaba gajiidu ghwalagaan.

²² Ging'ng'oonyanga, amwasa ng'asheega sean bea meanang'oodigeagwa bea ng'eanyiida, nea mii aba gheanyanga gil, gawurji fuga sin alooheeda aba heeda buuneeda, asi gamiiseegwa agadiyeena nea eashish guroruunatkeagwa, nea ghoawalli Ng'uttamiida.

²³ Gilwassean osinyi, asna nea goobeayi jeesinga miyaas, gawuurji giloosissi Ng'uttamiida,

²⁴ Nea ghoanalli gideaba gaygagooneegwa Ng'uttamiida gidageattindeang'wa bea hearaniischooda, ak googadiyeesi Ng'uttamiida was Gristo.

²⁵ Aba gideaba siida wassean sina ng'asheega munyas gayghwanyas gidageattindaanyi uurji dea sina nea maygwanda shiitmeeda.