Golosaayi 2 - NEAJEEDA EESH BEA BUUNEESSEAN

¹ Geagasayi anala gideadeawiitti appadahuukkeagwa, ea badahuukka fuga mida ng'eanyiida Laodokiya, ea gikka miighwadahaniin,

² abeeda geemmajeek guroruunatka nyaawa, nea gaguuyi aba barinyeega, ak ghwanyas meanang'oochcheandumeeda sean bea huumwa, ak ghwanal makcheameetta bea Aseetta was Gristohiin,

³ nea jeadaannyi ea sufuysa gheaseeda bareaynata uhuuda ea fughareenga.

⁴ Geargu nii aba gideaba adiiduw ghoamwaschi gwareenganeegwa siida aba ng'asheega ng'uyyeega.

⁵ Earappeadi eawoschi sheagi aba heedeang'wean, geendeayi aba guroorooda, ak geahoosanyi muuchchi aba gideaba neajeeng'u gidamiyda giibindeang'wa ea gidamajeekta masaweegeagwa appadayda Gristo.

Giibinda hidaat aba jeeda Gristo

⁶ Asi agooga ghayi ghoodeapti Gristo Yeesu was Ng'uttamiida, asi oppiidana jeadaannyi,

⁷ nea goongooreadi hawungeagwa ak geemmajeegeegwa aba jeadaannyi ak gamajeegiit masaweegeagwa, ak gawuurji gidaghayi siinnaaldaneegwa, nea goobadiisachcheesi.

⁸ Asi ashageada adaghaghaseagwa siida ak gahuttaneegwa aba fughareedaannyi bea mwadaagha aba searoojikka bea buneedean, aba haleanjeedeaba garayi bea meangeenda mida jeeda ng'eanyiida nea mii dea Gristoohi.

⁹ Aba gideaba headaannyi gwanda hidooda sean bea Aseetta nea goobiida badaydaannyi.

¹⁰ Ak agooga eanoonyaschi eaweega hidaat appadaydeaba niny, nea niny ahaweewa fuga ahaaghwa ng'eanyiida ea gea ambalischi.

¹¹ Nea appadaydeaba niny earagooga siyaadeagwa ghasmeahooda aba ghasmeahooda meesnana geattinga, nea ghoanung'waadi ng'asheega saseeda aba ghasmeahooda Gristo,

¹² nea geepnyeegwa sea niny aba gibattiisanda, amaduw geettuunneegwa sea niny aba masaweega aba gadiyeeda Aseetta, ghayi aduunna niny jeeda miyeeda.

¹³ Hean agooga, goomeewayyi aba riing'eegeagwa ea aba sasanuukkeagwa meayaada ghasmeahooda, iiduw ghoadaw Aseetta eaweega sea niny, ak ea nisamseasa riing'eagaasa sean,

¹⁴ iiduw nea nibuus ng'ooruutka mida badahuukkaasa jea goorgweakseasaan, gageanu ak ghwasach ak goongoorsa uhuuda behiida.

¹⁵ Ak ghoareat fuga mideawa uurda gheambalmeeda dabitta ng'uchcheeda ak geanu ghoaw gichchea eahhiimda aba eeshpwara aba saawa, ak gahoosan appadahuukka nyaawa.

¹⁶ Asi adagoorgweakseegwa siida aba giinyeashteayda gichchea eayaak ghana gichchea eali ghana badayda ghweelmeeda ghana aba ng'ushshiinda sheeda ghana Sabatto,

¹⁷ suu jirooneeda ng'asheega jea ghwahidu; nea gidahuumwa ea Gristo gil.

¹⁸ Asi adaghaweadaneegwa sih gil, aba giimajeekta eatteaba geaw bea ng'eanyi ea ghadoowanda malaykajeega, nea ghamiinaada aba giidaheachchteaba geaw, nea ghaghwar geaw mwadaagha aba fughareadaannyi bea saseeda,

¹⁹ ak ea mwanoasa geat sea uhuuda, nea aba niny ghoang'ng'waay geat saseassean aba roobuutka ea mayiishka, ak gwaheedu aba heennooda leabu heeda Aseetta.

Miyeeda ak geendeay Gristo

²⁰ Ama inoomeewudayeewi Gristo aba haleanjeeda ng'eanyiida was meangeenda, ghwasaan anda gooppiideatti gili duu abeaha ng'eanyiida? Ghwasaan inyasghoamwaschi huumeannyeekka nyaawa,

²¹ “Adoang'ng'waanyi, ak eadoosamu, nea adoosachchi.”

²² (Ak ghoahiimu haleanjeeda jea goosha iisigadiyeatta), aba giduurji ginealshooda buuneeda ea gissurukutteayda?

²³ Suu seaniin aba huumwa gawuurji gwadeagooda mideawa weaghuumeeda ak ghoang'eat ghadooweeda aba eatteaba geat bea ng'eanyi aba gidahang'waay gasa saseeda, ak ea marachchi gil ak moammu ghoadeal gitta gasa saseedean.