Galattiya 6 - NEAJEEDA EESH BEA BUUNEESSEAN

Daba siisi sar sareemba nuut

¹ Oorjoogiyya, iyoadaayi siida nea niibitta jeeda ring'eeda asi agoogeani owoschi fuga guroroodean ootteelni siisi aba gurorooda garbabu. Fura geaw, ang'iing'i adiiduw geesimnyi.

² Daba siisi sar sareemba nuut, daba siisi ahiit deaweedeeda Gristo.

³ Ak siida iiyeeshsha geaw guwosi gil, nea mii gili, adagwareengani geaw.

⁴ Ak daba siisi sawsa gadiyeadaannyi nea gabageaw, ak gayghwanyas gichchea ghaghwara geaw niny aba gadiyeadaannyi, nea mii hichpa sii nuut gil.

⁵ Aba gideaba gaygaba siisi sar sareandaannyi nea gabageaw.

⁶ Siida sinnaal ng'asheanda deabareannyi haleanjeeda miyaas sean siida annealshi.

⁷ Adereenganneegwa, Aseetta meereenganna, aba gideaba siida gayghwalach gidawassean ghayi hista.

⁸ Aba gideaba siida hista ng'asheega aba saseadannyiin, aba jeeda saseadaannyi gayghwalach munyinda; duukku siitta histeawa guroroodean, aba jeeda gurorooda gayghwalach eaweega manda mudeanooda.

⁹ Ak ea adeeburji aba sinooda ng'asheega miyaas aba gideaba gajeelaja iihitta damanda imiyeepra.

¹⁰ Ak damani duu eendeawana gheattean esissiina buuneessean ng'asheega miyaas, ak ghwaraanya fukka mideawa masaweegean.

Miinda gheang'da huydean ea giighatta

¹¹ Ang'ulla ng'oorshooni gidang'waardi nea geaheettu ng'ooruutka ak geang'oorneegwa aba geattindeanyu aniini.

¹² Suu fukka gasa gideaba gayghoahiimu geediin gil jea gwadiing'seegwa eata ghasmeahooda, aba gideaba ea meesawana saawa aba beehiida Gristo.

¹³ Ak eara gea siyaat ghasmeahooda, mwaada geeshta deaweeda, saawa gagasa gideaba gajeeyaadeagwa ghasmeahooda, ak ghaghwar geat aba sasanuukkeagwa.

¹⁴ Ak aniini ea adaghwarji geaw aba gidawassean geaghus gigheambiitta beehiida Ng'uttamiideanya was Yeesu Gristo, aba gideaba aba naweani bea beehiidean singoorsa ng'eanyiida heedeanyu, ak aniini singoorsean heeda ng'eanyiida.

¹⁵ Siida eayaat ghasmeahooda ghanea meayaada mii gili, ghana dea miyeayaat ghasmeahooda geegasa ghoaw siideesh.

¹⁶ Hoyyoo ea baydeayda gagasa ghwanyas fukka sean ang'ng'waay deaweedeeni, appadayda Israeeleeda Aseetta.

¹⁷ Gidang'eada ghamneawa adagoodeawiidan sii; aba gideaba aniini geandeawi girooraneeda Yeesu aba saseedeanyu.

¹⁸ Dagheerjeandumeeda Ng'uttamiideanya was Yeesu Gristo gagasa gobiida jeeda gurooruunatkeagwa, oorjoogiyya. Amin.