Galattiya 3 - NEAJEEDA EESH BEA BUUNEESSEAN

Deaweeda ghana masaweega

¹ Ea fuga Galattiya dasheahi! Goong'ushooneegwa ng'eaha, Yeesu Gristo geala bwadaw ak geengoor aba eeshpwara aba madeedeabeang'a?

² Geagasayi danyaashta ng'asheanjagi, aba heedeang'wa, Heapi ghoanyaschi Gurorooda Ghaydit aba sinooda deaweeda, ghana aba gideaba ghooyiinyi aba masaweega?

³ Ak gowoschi dasheahhiidunu? Nea ghoang'ng'eachchi ghuutta sea Gurorooda Ghaydit, ak ghamneawa ghoahhiichchi aba saseeda?

⁴ Ghoanyaschi sawanadeeda haw sunu mwadaagha? Iimwadaagha gil ea huumwa.

⁵ Aseetta goneegwa Gurorooda Ghaydit, ak gwasin ng'asheega deamdeameadi aba jeedeang'wa, gwasin ng'asheesu aba sinooda deaweeda, ghana gideaba ghwayiiy aba masaweega?

⁶ Gawuurji gidaghayi, “Mwasta Abrahaamu Aseetta ak geenung' ghoaw doobiiwnatta.”

⁷ Asi anala gideaba fuga mideawa masaweega, suuh diibiga Abrahaamu gil.

⁸ Gabean gwargu Ng'ooruutka gideaba Aseetta gayghoadaw fuga emoojiga doobiiwnatta aba masaweega, Ak Giijasta Miy gabean gwaruksa Abrahaamu gideaba, “Gayghoadaw Aseetta ghawooda eemoojiga sean appdaydaang'u.”

⁹ Nea fukka mideawa masaweegean, gajeattaw ghawooda gawuurji Abrahaamooda mideawa masaweega.

¹⁰ Ak fukka sean sina ng'asheega deaweedean abeeda ea sumwashta; aba gideaba gwayi Ng'ooruutka, “Simwaashta gilinyoo ea sii gil mwaada geeshta ng'asheega sean sung'oorsa jeeda gittaabooda deaweeda.”

¹¹ Asi ghamneawa adaach gideaba manda siida jea ghoodaw Aseetta doobiiwnatta aba naweeda deaweeda; aba gideaba, “Siittoabiiwaat gayghwanyas gibiinda aba masaweega;”

¹² Ak deaweeda ea mwahinnana masaweega, duukku “Siida sina ng'asheesu gaygoobiida jeedeaba ng'asheesu.”

¹³ Gristo goottinnaneasa jeeda mooshteayda deaweeda, aba gideaba niny sumwaashta aba badahuukkaasa aba gideaba gwayi Ng'ooruutka, “Sumwaashta gilinyoo ea sii gil siratta aba uhuuda geetta,”

¹⁴ ak aba jeeda Gristo gayghwanyas Emoojiga ghawooda Abrahaamu, ak abeeda geanyaschi helleesiinda Gurorooda Ghaydit aba masaweega.

Deaweeda ea Heelleeda

¹⁵ Asi iyeagaligeat sea siida, oorjoogiyya: manda siichchea ghoammu gageanda neajeeni, ghana ghoahaat, iining'atta nea sisikteawa.

¹⁶ Asi heelleesiinda ghoadaw Aseetta Abrahaamu ea jeattaannyi. Ak ea mayi, “Ea jeachcheenga,” nea gwargu buuneessean; nea ghana gwargu akkalealla, “Ea jeattaang'u,” nea Gristoohi.

¹⁷ Nii gidanyaashchi: deaweedeeda, ghayi hidu iing'atta gweannyeew bughalaji ang'wan ea diktam ea damanamughuush, ea mwahinna neajeeda aba jeeda gweayda iinisikteawa Aseetta amaduw ghwanung' ghoaw heelleesiinda gidamwadaagha.

¹⁸ Aba gideaba hearaniischooda gweadu deaweeda, ak ea maygweadu heelleesiinda; amaduw ghoadaw Aseetta Abrahaamu aba heelleesiinda.

¹⁹ Abeeda deaweeda ghwasaan? Geegu aba gideaba geesin ng'asheega munyas, ea eeyi bwak ea ghwahidu jeattaannyi ghayi sibean eattaw heelleesiinda; ak ghoaw hawunda malaykajeega aba naweetta bea siida aduuptooschi suurjean.

²⁰ Asi siida aduuptooschi meaduupchi siyagi ak Aseetta aagi.

Gissibaysiina deaweeda

²¹ Heappi deaweeda gwaheelli sea heelleesiinda Aseetta? Manda aba huumwa; aba gideaba inyeeda geegeanu deaweedeeda ammu ghoadaw buuneeda eaweega, gwachchi buuneeda gayghwanyas doobiiwnatta aba naweeda deaweeda.

²² Nii nibean gwargu Ng'ooruutka gideaba nijooriischi ring'eeda aba ng'eanyiisean geettaajiitunu aba gideaba fukka mwas Yeesu Gristohiin gayghwanyas heelleesiindida ghayi siruksean aba masaweega.

²³ Damanda ghayi mii ghwahinna masaweega, abeeda geendi jeeda deaweeda, siratteasa ea ghwahidu masaweegiga jea eattaajiidiin.

²⁴ Aba sareeni deaweeda gawuurji ashoohooda gweanneasa heeda Gristo, ak geenyaschi doobiiwnatta aba masaweega.

²⁵ Ak daanihinna masaweega deaweeda eamudea ashoohooda gil;

²⁶ aba gideaba aba jeeda Gristo noowoschi oagasean balloojiga Aseetta, aba naweeda masaweega.

²⁷ Aba gideaba agoogeeda ghayi sippatttisaneegwa aba naweeda Gristo, aba sareani ea nookwealli Gristo.

²⁸ Ak biissa ea maheelli siida Yahuudi ea siida Yunaani, ghana siida was ging'ng'oonyaneeda ghana dea abalgeaw. Ea manda ng'eedeeda ghana gatmooda; aba gideaba agooga noowaschi agi aba naweeda Gristo Yeesu.

²⁹ Asi agooga iyoowoschi fuga Gristo, agooga earada gowoschi jeatta Abrahaamu, aba sareeni hearaniischooda deang'wa gil aba heelleesiindida.