Galattiya 1 - NEAJEEDA EESH BEA BUUNEESSEAN

¹ Baulo giijasoochcheanda, nea maleapna heeda buuneeda ghana gwasku naweeda siida, gwasku heeda Yeesu Gristo ea heeda Aseetta was Ghweanda, ak gooduunna niny jeeda miyeeda,

² ea oorjooga giyeanya sean eandeawi, Aba heeda ganiisajeega mida Galattiya:

³ Gagasa anyasa dagheerjeandumeeda ea hoyyooyda leabu heeda Aseetta was Bwaabwa ea Ng'uttamiideanya was Yeesu Gristo,

⁴ nea gabeagu geaw aba ring'eegaasa ak gwalealnaneasa aba jeeda seaygean bea ghamneawa munyasiin, gawurji gidagasiida Aseetta was Ghweanda;

⁵ niny gwandeawa gigheambiitta ea ghoow damanda manda mudeanooda. Amin.

Giijasta miy assagi

⁶ Aniini nihamwan ng'eanyi aba gidoobay anung'usiinda heeda dea ghayi guurneegwa aba jeeda dagheerjeandumeeda Gristo ak gooyamsi geat giijasta miy nuut,

⁷ mii gideaba gwanda giijasta miy nuut gil, iiduw gwanda fuga mwaatkwa adeawiideegwa nea gagasa ghoaschoorda giijasta miy bea Gristo.

⁸ Duukku aseasa ghana malaykajeanda humng'eeda, iirukneegwa giijasta wassean mawasa dea ghayi sirukneegwa, gagasa eamwaashta.

⁹ Gawuurji gidagwachchi sibean eerukna, ak eara ghamneawa geergu gichcha, gideaba siida wassean irukuneegwa giijasta mawosa dea ghayi oadeapti, gagasa eamwaashta.

¹⁰ Neada goaghayi gili eagasayi dashiit buuneeda, ghana Aseetta? Ghana eegasayi deahoosan buuneeda? Asi iiduw deahoosani buuneeda, ea maydoaw soomjeanda Gristo.

Gidaghayi huuwda Baulo Giijasoocheanda

¹¹ Oorjoogiyya geagasay gideaba gajanala gideaba giijasta miy ghayi earukwiidi maleapna heeda buuneeda.

¹² Aba gideaba mwaanyasani hichpa sii, ak ea moanalaan sii, gwaleabu naweeda giidaheachta Yeesu Gristo.

¹³ Agooga noayiinyi iitta ghayi bea giibindeanyu aba jeeda diineeda fuga Yahuudi gideaba geasawannyi muuchchi fuga Ganiiseeda Aseetta nea geagasayi dalas uhuuda;

¹⁴ ak geandi mwadi aba ng'asheega dineeda Yahuudi ea dadaraam fuga seaygeedeanyu aba jeeda buuneedeanyu, al geabiissi dawos ng'waan aba searoojiga ghweanigaasa.

¹⁵ Hean iiduw nea niloadaan Aseetta nea miyeejiilan, ak gaguurnean aba dagheerjeandumeadaannyi,

¹⁶ ak geanung' ghoahimnaan Balleandaannyi, ak abeeda geerukkwiidi aniini iittaannyi aba jeeda Emoojiga, aniini mwaawunani saseeda ea foojeanda,

¹⁷ ghana dascheang'da dawa Yerusaleemu heeda oorjooga asheedeawean ghoaw giijasoodiga, aniini geawi ng'eanyiida Araabiya; ak geabiigu Dameski.

¹⁸ Ng'atta gweannyeew samwagu, geawi Yerusaleemu dabareessa Gefa, ak geabiidi gheannyi eawooji damwanamuut.

¹⁹ Ak ea manda giijasoocheanji naadaay nuut geaghus Yakkobo oorjeeda gheamatta Ng'uttamiida.

²⁰ (Nea ng'asheega eang'oorneegwa, aba madeeda Aseetta mii ng'uyyeega gil!)

²¹ Iiduw geawi meatkwajeega ng'eanyiida Siriya ea Gilikiya.

²² Nea abeeda ea mii ghwadaahan aba gheanyanga fuga Ganiisajeega Gristo mida Yudeeya;

²³ Gabeachchi gideaba ghwayiiy iitta gideaba, “Siida ghayi sawaneasa ghamneawa gwarukwiida giijasta miy bea masaweegiga ghayi gasa ghwalas uhuudean.”

²⁴ Hean geekghambiit Aseetta aba badaydeanyu.