Filimoon 1 - NEAJEEDA EESH BEA BUUNEESSEAN

¹ Baulo siida ghealooniga appadayda Gristo Yeesu, ea Dimotteo oorjeeda giyeanya, heeda Filimooneeda was siideanya subwariinyi suweechcheewi aba gadiyeeda

² ea Afiyayda was huda giyeanya, ea heeda Argibo was shirikkarajeanda Gristo suweechcheewi bea ganiiseeda mida jeedeaba gheang'u:

³ Gagasa anyasa dagheerjeandumeeda ea hoyyoo leabu heeda Aseetta was ghweandeanya ea heeda Ng'uttamiida was Yeesu Gristo.

Bariinyeega ea Masaweega Filimoon

⁴ Geabadischeesi Aseetteanyu galeagasean iyapkachcheey nea ghamwaashchi Aseetta,

⁵ aba gideaba nayiinyi bariinyeegaagu ea masaweega indeawi appadayda Ng'uttamiida was Yeesu ea heeda fuga ghaydidi sean,

⁶ ak ghamwaashchi Aseetta aba masaweagaagu suguuyeesi nyagu fughareeda miy bea haleanjeessean ikkaasa aba jeeda Gristo.

⁷ Aba gideaba naanyaschi hooseaneega muuchchi ea hawdeayda aba bariinyeegaagu oorjeediyya, aba gideaba guroruunatka fuga ghaydidi nihawda appadaydaang'u.

Musiischooda appadayda Oneesimo

⁸ Aba gideaba earapeadi eawoschi muraneeda hidaat aba naweeda Gristo ak geerukneey sina gidasigasa,

⁹ iiduw appadayda bariinyeega geamuscheey gideaba, aniini Baulo, was siida siichcheagu ak ghamneawa geawoschi siida ghealooniga appadayda Gristo Yeesu,

¹⁰ Geamuscheey appadayda jeepteanyu was Onesimo, nea nahuuyi ghwaan aba damanda eandeewi ghealooniga,

¹¹ (Ghanyi niny mwaloada aba headaannyi gil, ak ghamneawa gwalooseey gil agooga ea aniini).

¹² Geajeagu gabiigu headaang'u, aba gideaba niny guroroodeanyu.

¹³ Gaydahoosan aniini iyabiida heedeanyu ak ghaweadan aba meatkweedeang'wa damani eandeawi ghealooniga appadayda giijasta miyiin,

¹⁴ ak geagasayi ea measni gil nea mimwasi ak abeeda ea mediing'seey aloaheadaang'u geaghus aba gidigassiidi.

¹⁵ Nii ghaghanyi ghoaw gidasihhelleewaneey aba gheadi nuwasiin, ak iiduw goobiiksiinyi gichcha ak goopiidi hijagi damanda manda muudeanooda.

¹⁶ niny mudugawuurji ging'ng'oonyaneeda, niny ning'al ging'ng'oonyaneeda, niny gawuurji oorjeediyya abwariinyi, raanya aba heedeanyu ak gaygawuurjiin muuchchi aba headaang'u, aba saseeda ea heeda Ng'ttamiida.

¹⁷ Asi iiyoanung' doaw siida oguuyeewi, deaptaayda niny gidagwachchi jea deaptaaydanaan aniini.

¹⁸ Ama ideeppeanidiiyseey aba gidawassean, ghana gwandeawa sileadaang'u wassean, abeeda ging'oornean sileeni.

¹⁹ Aniini Baulo ang'warji ng'asheesu aba geattindeanyu, gaydawalu aniini, Mearukuni ak gindeawi sileedeanyu aba jeeda Gristo.

²⁰ Asaha, oorjeediyya, sinnean ng'asheega miyaas ak ghaanyagaadi appadayda Ng'uttamiida, ak gihoosani guroroodeanyu aba naweeda Gristo.

²¹ Ghamwaaschi aba mureadaang'u, ak geang'oorneey ang'iing'i nea ghaanalli gideaba gaysina ng'asheesu ea ghwanaawa gea earukuneey.

²² Asi aba damani, asna ghooriida rabasta jea deabiida, aba gideaba ghaararji aba mooshteang'wa bea Aseetta gajanyasaan.

Giighatta huydean

²³ Ghoaghannyi Epafrayda eandeayeesi ghealooniga aba jeeda Gristo Yeesu,

²⁴ ea Marko ea Aristakko ea Deema ea Lukka was fuga easnuudayeewi gadiyeeda.

²⁵ Dagheerjeandumeeda Ng'uttamiida was Yeesu Gristo gagasa goobiida jeeda guroruunatkeagwa.