Efeeso 5 - NEAJEEDA EESH BEA BUUNEESSEAN

Giibinda jeeda weeshinda

¹ Asi ayaada geeshta Aseetta awuurjeewana diibiga subwariiy.

² Ak ghoabeawi bariinyeega, gawuurji gidabwariiydaneasa Gristo ak ghoadayda geaw appadahuukkaasa, ak ghoaw haleanjeeda sisappa geadi bea ghadoweeda ng'andit aba heeda Aseetta.

³ Nea hiseadayeandumeeda ea ng'asheega munyas sean ghana gassooda ng'asheega munyas adiiduw geyiingsa jeedeang'wa, aba gideaba nii ghwahit aba jeeda fuga ghaydidi.

⁴ Ak ea adiiduw geyiing'sa heedeaeng'wa ng'asheega baspaseega ea gea leendeeda ghana nyootta mureeda.

⁵ Agooga ghoanalli ng'asheanji gideaba siida hiseada ghana dea sina ng'asheega munyas ghana dea gaseadayyi haleanjeeda ea dea (bada gidamwadaagha ghwanung' ghoaw Aseettaannyi) manda dea jea gwahearan gheambalmeeda Gristo ea Aseetta.

⁶ Adagwareenganeegwa sii aba ng'asheega mwadaagha, aba gideaba ng'asheega uurji suh, gayghwahidu nyarasta Aseetta badahuukka balloojiga manda mureeda.

⁷ Asi adiiduw goabareanyeewi saawa,

⁸ aba gideaba ghayi agooga gowoschi misaneeda, ak ghamneawa gowoschi weeshinda aba jeeda Ng'uttamiida; asi abeada diibiga weeshinda

⁹ (aba gideaba haghweeega weeshinda geenyassa jeeda haleanjeessean miyaas ea doobiiwnatta ea huumwa),

¹⁰ nea ghoang'ng'eachchi nalooda gidabwariiy Ng'uttamiida.

¹¹ Iissa ea adoosinnyi gadiyoojiga manda haghweega bea misaneeda iissa ghang'wana ghoanung'waadi.

¹² Aba gideaba gaba baspaseega ruknooda ng'asheega sisin aba makcheameeda;

¹³ nea gidawassean iisunung' ghwadaajiit aba heedeesh abeeda gajeadaah, aba gideaba gidawassean sidaah weeshinda.

¹⁴ Hean ghoaw gidasirukuna ng'asheanji bea gideaba, “Ng'eada ang'iing'eeda ing'utti ghaat, duunana heeda fuga nimeewa, ak Gristo gaygagoonnyi weeshinda.”

¹⁵ Ang'ulla muuchchi aba gidoabeadi, adoowuurjeewi fuga manda fughareenga, awuurjeewana gea mida fughareenga,

¹⁶ ak googadiyeatti muuchchi damani ondeawiin aba gideaba askwearjoojusu gea munyas gil.

¹⁷ Aba sareani adoowaschi dasheahi, gagasa anala gideaba Ng'uttamiida gagasa naaha jea asna.

¹⁸ Asi adooboogidayi aba difaayeeda jea gahutteawweegwa; ghang'wana geannyideagwa Gurorooda Ghaydit.

¹⁹ Oppaloolana geat ng'asheega nyiigheega ea duumjeenga guuskuseega ea sarmoojiga guroorooda, asarmasiina Ng'uttamiida nea ghoammiidu daghanuunatkeagwa aba jeesingeagwa sean,

²⁰ nea goobadischeesi Aseetta was Bwaabwa galagasean aba ng'asheega sean aba gheawunga Ng'uttamiideanya was Yeesu Gristo.

Siyeenatka ea gadeemga

²¹ Asinisiina geat mureeda gawuurji gidoosinnisiindi Gristo mureeda.

²² Gadeemga, asinnisiina siyeenatkeagwa mureeda gawuurji gidoosinnisiindi Ng'uttamiida.

²³ Aba gideaba siyeeda goombal gatmoodaannyi, gawurji gidambalda Gristo ganiisa, nea niny ea lealnoochcheandaannyi gil.

²⁴ Gawuurji gidasinnisiinda ganiisa Gristo mureeda, asi eara gadeemga dasisiina siyeenatka nyaawa mureeda aba haleanjeesean.

²⁵ Siyeenatka, abwariinya gadeemgeagwa, gawuurji gidabwariyda Gristo ganiisa ak gabeagu geaw appadaydaannyi,

²⁶ ak abeeda gabaysiina gimminoadaannyi nea goohuun aba beega ea ng'asheanda.

²⁷ Abeeda gwanyaksa geaw ganiiseeda ghambiidaat, mandeawana munyinda, ghana ng'asheega munyas sean, ak ea ghaydit biissa ea meerukunana badayda munyinda.

²⁸ Ak eara headiga gamiisa gideaba gayghabwariiyda gadeemga nyaawa gidabwariyda saseenukka nyaawa. Siida bwariy gatmoodaannyi eara niny ghabwariy geaw.

²⁹ Aba gideaba manda siida sit saseadaannyi, inyeesa ghoarear nea gookwealsheesa, gawuurji gidahinniida Gristo ganiisa,

³⁰ aba gideaba aseasa geewaschi roobuutka saseadaannyi.

³¹ “Aba seareani ng'eedeeda gaygwanung'sa heeda ghwaan ea ghaamwat ak gwandeayi sea gatmoodaannyi, ak fiisu assiyeenyean gayghoaw saseanagi.”

³² Makcheameeni funyaadiin ahaw ak aniini geabalooli badayda Gristo ea ganiisa;

³³ ak daba siisi bwariyda gatmoodaannyi saseadaannyi, ak gatmooda ea dasissiina siyeedaannyi mureeda.