Ebraniya 9 - NEAJEEDA EESH BEA BUUNEESSEAN

Ghadoowanda Aseetta aba ng'eanyiida ea humng'eeda

¹ Asi ghamneawa eara neajeeda madeeda gwandeawa digheanda gichchea eabwatta Aseetta ea heeda ghaydit aba hiji bea ng'eanyiidean.

² Aba gideaba iissa geesin maheemajeanda dea madeeda nea dea siyiina gheaboonyaneeda ea measa ea mukkatteeydida bea gihimnoodean; geguura Heeda Ghaydit.

³ Badaydeaba hang'deaba iyyeenya bea heashooda gwanda mahemajeanda was heeda Ghaydit muuchchi,

⁴ nea gwandeawa heeda wagiida eyda meang'meang' mideawa shearooda ng'andit ea sandakkwajeanda mida jeeda neajeeda nea sikkwealsa meadajeega sean aba lagheanga meeng'meeng'i nea gwandeawa bayookta meang'meang' mida hamitta suguura maana, ea bileangida Haruuni aruudu damealga, ea measeeda neajeeda;

⁵ nea uhuuda gwanda malaykajeega mideawa gigheambiitta nea gojiroon hoorgeeda ng'eeninda. Nea appadahuukkeaba haleanjeeni ea meammuusi eerukuna muuchchi nea gekkingiinayi.

⁶ Hean giding'ding'deaydeaba ng'asheesu ea sisin, iissa gaweay ashoohoodiga galeagasean jeeda maheemajeanda madeeda ak gwasin gadiyoojiga nyaawa bea mooshta ghawooda;

⁷ nea deaba iyyeenya iissa gawa ashoohoochcheanda haw nea gaba geaw, iissa gawa nibwagi aba jeeda gweayda, nea ghwaat foojeanda adayda appadaydaannyi ea dea gidinyeannyeekka buuneeda.

⁸ Nea aba nii ghoahiimu Gurorooda Ghaydit gideaba naweeda jea ghoahutta fii heeda ghaydit miyeajaat aba hiji duu ghamiinaadawa maheemajeanda madeedean

⁹ (nea geanung' gawuurji sea damani bea ghamneawean.) Nea aba badiini, haleanjeeda siittayda ea gea lukghumajeega iissa geattayda moammu goomajeek fughareeda siida mwaash Aseetta,

¹⁰ ak iissa gabeachchi hamitta ea leeshooda sea gihushshooda, was deaweedajeega saseeda ghayi sugu ea ghwahitta damanda jea ebiikta eesna gichcha.

¹¹ Iimuchchu nea ghwahidu Gristoyda was ashoohoochcheanda haw bea haleanjeeda miyaas jea ghwahidu, hean aba naweeda udahabeascheanda haw majeek (meesnana geattinga, nea maba badaydeaba ng'eanyiin)

¹² iissa gawa nibwagi Heeda Ghaydit, nea mwaada foojeanda nooga ea gea muhooga niny ghwaat foojeandaannyi, ak gwasin lealeanooda manda mudeanooda.

¹³ Aba gideaba siida mideawa ring'eeda isippuunna foojeanda nooga ea gea heewga ea deareeda haghweanda iyammiidu nea ghoammu goohuun saseeda,

¹⁴ abeeda gayghwaranyattaan muuchchi foojeanda Gristo, dea aba Gurorooda manda mudeanooda ghoadaw geaw Aseetta nea meerukunana badaydaannyi gidamuy, gayghoammiidu fughareengeagwa aba gadiyoojiga nimeewa ak gagadiyeesa Aseetta majeek.

¹⁵ Asi niny dea aduuptooschi buuneeda aba neajeedeesh gil, ak abeeda fukka suguursean ghwanyas helleesiinda hearaniischooda manda mudeanooda, hean gapnu miyeeda jea gwalealna saawa jeeda ramaseannyeekka aba neajeeda ghayi bea madeeda.

¹⁶ Nea heeda mida hearaniischooda, abeeda miyeeda siida ghayi sin gayghang'eat ghuutta.

¹⁷ Aba gideaba hearaniischooda iissa gamajeegiit iihidu miyeeda, amaduw ea manda uurda aba damanda duu eamajeek dea ghayi sin.

¹⁸ Hean eara neajeeda madeeda ea mamajeegiida iimanda foojeanda.

¹⁹ Nea gilinyoo ea digheanda gil mida jeeda deaweedeeda nurukusa Muusa buuneeda, gageanu foojeanda muhooga ea gea nooga, ea beega ea budeega areeri bea gisilga ea hisoppo, ak geappuunna sean gittabu ea buuneessean,

²⁰ nea gwayeeshsha, “Suu foojeanda neajeeda gil ghayi rukuneey Aseetta.”

²¹ Ak aba naweani ghoabuunna foojeanda maheemajeanda sea haleanjeessean sigadiydooscheatta damanda baditta Aseetta.

²² Aba huumwa, aba jeeda deaweeda gwaramagu eammiinna haleanjeessean foojeanda, ak iimeahhiida foojeanda ea manda samsiinda ring'eega.

Lukghumeeda Gristo gageanda ring'eega

²³ Ak ghwadoabiiw gideaba haleanjeeda uurji gea humng'eeda gideaba geammiidu aba naweani, nea haleanjeeda humng'eeda geammiinna lukghumajeega miyaas mawuurji suu.

²⁴ Aba gideaba Gristo nuwa jeeda, mii gideaba gawa heeda ghaydit sisna geattinga gil, niny gawuurji sea diitta bea huumwaan, niny gawa humng'eeda huumwa, ak ghamneawa ghwahidu nea gawuurji Aseetta appadahuukkaasa.

²⁵ Ak ea mii gideaba iissa gayghoadayda geaw galeagasean, gawuurji ashoohoochcheanda haw iissa gawa Heeda Ghaydit nibwagi aba jeeda gweayda nea mwaada foojeandaannyi;

²⁶ aba sareani gwachchi gaygabiikkiida jeeda sawanateeda ghang'eada dea ghayi sisna sindeetta ng'eanyiida. Ak aba nii, ghwahidu nibwagi aba mudeanooda damanda ak gageanda ring'eeda aba gidaydeaydeaba geaw ghoaw lukghumeadaannyi.

²⁷ Hean gawuurji gidaghayi siittawuda siida miyeeda nibwagi, amang'atta ghwahidu girgweaksiinda,

²⁸ gwasnu eara Gristo, niny ghayi geattayda nibwagi ak gageanda ring'eega fuga saang'a, gayghwahidu deaba iyyeenya, ak ea mayghwahidu appadayda ring'eeda niny gayghwaan gwalealu fukka amuukku niny muuchchiin.