Ebraniya 8 - NEAJEEDA EESH BEA BUUNEESSEAN

Yeesu ashoohoochcheandeanya hawi

¹ Asi ghamneawa huumeanda surgu nihi: geendeawi ashoohoochcheanda haw uurjunu, siida apteada aba meatkweeda geattinda dugwa bea hoorgeeda sugoochcheandumeeda Aseetta was Ng'uttamiida aba humng'eeda,

² niny siida gadiiy aba heeda ghaydit gil ea heeda maheemajeandida bea huumwaan ghayi masna siida gwasin Ng'uttamiidean.

³ Aba gideaba giliwas ashoohoochcheanda haw iissa gealoat ghoadayda haleanjeeda ea lukghumajeega; nea eara ashoohoochcheanda gammiisa gideaba gaygwandeawa gichchea ghoadayda.

⁴ Inyeeda gwachchi gwanda badayda ng'eanyiida, ea mayghoaw ashoohoochcheanda eara hay, nea gwanda ashoohoodiga adayyiida haleanjeeda aba ginnyaashta deaweeda.

⁵ Gwasin gida uurji diitta was jirooneeda haleanjeeda ghaydidi mida humng'eedean; aba gideaba damanda ramagu gwasin Muusa maheemajeanda, ghoadoabiiw Aseetta, nea gwayeeshsha, “Sikteawana gideaba gisni haleanjeessean gawuurji gidaghayi sihhimdaayda aba uhuuda gijeeda.”

⁶ Asi aba nii, Gristo ninyas gadiyeeda adareamshi muuchchi adaraam dea waas gawuurji neajeeda goduupchi muuchchi, ak ea niiw deaweeda aba helleesiinda huumwa.

⁷ Ama inyeeda neajeetta bea madeedean ea manda sirjeeda, gwachchi ea maygwanda gassoodeaba diita bea iyyeenyean.

⁸ Aba gideaba ninyas ramaseanda aba heannyaawa aba heeda eneewa: “Gwanda askwearjoojiga jea ghwahidu gwargu Ng'uttamiida, ak gaydang'eat neajeedeesh sea gheeh Israeeli ea gheeh Yuuda;

⁹ ak ea mawuurji neajeeda ghayi itteanyu sea ghweaniga nyaawa aba eaweeda ghayi ang'ng'waanyi saawa geattinda ak gearutteawi jeeda ng'eanyiida Misri; aba gideaba mudugoobiida jeeda neajeedeanyu, ak ea mududaduuba saawa aba ginnyaa Ng'uttamiida.

¹⁰ Nii neajeeda jea dasissa gheeh Israeeli iing'atta askwearjoojikka, aba ginnyaa Ng'uttamiida: Gaydayiin deaweedajeegeasu iheenga nyaawa, ak ghang'waarji aba jeesinga guroruunatka nyaawa, ak gaydoaw Aseetta nyaawa, ak gayghoaw fugeasu.

¹¹ Ea manda siida jea ghoanaal dea mideawa ghana giliwas sih ea oorjeeda ghaamwat, nea gwayeeshsha, ‘Nala Ng'uttamiida,’ aba gideaba gayghwanalan sean, ghang'eada dea mwanang'eawa saawa ea gagul dea haweewa sean.

¹² Aba gideaba gaydawas ng'eeni aba gidinnyeannyeekka nyaawa, ak ea maydapkaat ring'eega nyaawa earahay.”

¹³ Aba rukunooda neajeedeesh ea nunung' ghawaasiit dea madeeda. Nea dea nuwaasiit ea niriikghta gammuudean.