Ebraniya 7 - NEAJEEDA EESH BEA BUUNEESSEAN

Ashoohoochcheanda was Melkisedeki

¹ Nea abeeda Melkisedeki, was sugoochcheanda Saleemu, was ashoohoochcheanda Aseetta haw bea humng'eeda, gwaronnyi sea Abrahaamu nea gwaleabu nuseadayda sugoodiga ak ghoadaw niny ghawooda;

² nea Abrahaamu ghoadaw niny gida aba gilattamwanamughuush aba jeeda haleanjeessean. Niny duweachcheeda, aba isuroobu gheawungaaschi, sugoochcheanda doobiiwnatta, ak gabiissa ea sugoochcheanda Saleemu, ak ea sugoochcheanda hoyyoo.

³ Niny manda ghwaan ghana ghaamwat ghana rooproobanga, ak ea manda ging'eetta askwearjoojigaaschi ghana huydeanda eaweagaaschi, gawuurji sea Balleanda Aseetta nea ashoohoochcheanda manda mudeanooda.

⁴ Asi daaha hawundaannyi gitteenna! Abrahaamooda was gheamba ghweanigaasa ghoadaw niny gilagi aba jeeda gilattamanamughuush bea easanga.

⁵ Nea eara diibiga Laawi ghayi nyas ashohoochcheandumeedean, gwandeawa digheanda aba deaweeda jea gageandeawa heeda buuneeda haleanjeeda aba gilattamanamughuush, nea heeda fuga siduupcheewi, nea eara suu ea jeatta Abrahaamu.

⁶ Nea siisi maba roproobang'suun ghoawaam haleanjeeda aba gilattamanamughuush aba heeda Abrahaamu ak ghoadaw ghawooda ninnyeeda mideawa helleesiinda.

⁷ Ak ghanyea mesheang'nyeesiina gideaba dea mwanang' nibadischeesa dea haw.

⁸ Aba hiji gageanda haleanjeeda aba gilattamanamughuush aba heeda fuga jea gameewa; nea aba hiji gwanda dea sumuuwwu gideaba eamajeek.

⁹ Nea ghoammu sih gwayi Laawi ninyeeda ghayi awaam haleanjeeda aba gilattamanamughuush, ghoadayda haleanjeeda aba gilattamanamughuush aba naweeda Abrahaamu,

¹⁰ aba gideaba abeeda niny miyeeji damanda ronnyeewa niny sea Melkisedeki.

¹¹ Asi doobiiwnatta iisinyas aba heeda ashoohoochcheandumeeda Laawi (hean aba nii ghwanyas buuneeda deaweeda,) abeeda gudeegasa ashoohoochcheannuut jea ghang'eat uurji Melkisedeki, ea ghang'al dea surgu uurji Haruuni?

¹² Aba gideaba iimida yamitta aba ashoohoochcheandumeeda, abeeda ghwahit gideaba gajeayam eara deaweeda.

¹³ Nea siida was dea surukuna ng'asheesuun gaba eamwa nuut, manda dea nisin gadiyeeda aba heeda wagiida.

¹⁴ Hean adaach gideaba Ng'uttamiideanya gwaleabu jeatta Yuuda, iiduw aba gidaguyeatta sea emeetta ghanyea marukuna gil Muusa appadayda ashoohoodiga.

Ashohoochcheanda nuut, uurji Melkisedeki

¹⁵ Iiduw ghwadajiit muuchchi ng'asheesu aba iirudu ashoohoochcheanda nuut nea gawuurji sea Melkisedeki,

¹⁶ amaduw ghoaw ashoohoochcheanda, nea mii aba naweeda deaweedeeda gasa saseeda gil aba jeatta geaghus aba uurda eaweega mayghwadattasa.

¹⁷ Aba gideaba gemmuuwwuuna badaydaannyi nea geeyi, “Ang'iing'i guwosi ashoohoochcheanda manda mudeanooda, nea gawuurji Melkisedeki.”

¹⁸ Aba meatkweanagi, digheanda ghayi bea madeeda sisach aba ng'arng'arandaannyi ak ea marachchi gil

¹⁹ (aba gideaba deaweeda manda gissin ak gamajeegiit); aba meatkweanagi, ea sugu gidamiy sirarji, aba nii ea sineekkiissi Aseetta.

²⁰ Ak ea masa nea manda habeawooda.

²¹ Nea fukka ghayi bea mwadi huuw ashoohoodigean ghwanyas hoorgajeega nyaawa nea mwaaga habeawooda, ama duukku nii geattawa habeawooda, “Nguttamiida niyaak habeawooda ak ea mayghwayam fughareadaannyi, ‘Ang'iing'i guwosi ashoohoochcheanda manda mudeanooda.’”

²² Ng'asheanji aba huumwa ghwanung' ghoaw Yeesu neajeeda adareamshi.

²³ Ashoohoodiga madeeda ghayi asaang'a isiyiida, aba gideaba ghayi ghaweada miyeeda giibinda hoorgajeega nyaawa;

²⁴ nea niny ghoang'ng'waay ashoohoochcheandumeadaannyi nea gomajeek, aba gideaba niny gayghwashng'u damanda mamuudeana.

²⁵ Nea giduurji sean ghoammu aba damannyoojiga sean gwalealu fukka neekkiissa Aseetta aba ninyiin, nea niny gwanda galeagasean nea goduupchi saawa.

²⁶ Asi ghwahit gideaba gajeendeawana ashoohoochcheanda haw uurji nii, ghaydit, meerukunana badayda ng'asheega munyas nyah siirja, sihheelli sea fuga ring'eega, sittiing'da ea ghwalaabwa hoow humng'eeda.

²⁷ Niny manda gidagasa, mawuurji ashoohoodikka heesiin, iissa ghoadayda lukghumajeega galeagasean, iissa ghanyi ghoadayda appadayda ring'eegaaschi niny amaduw ghoadayda geaw.

²⁸ Aba huumwa deaweeda iissa gageanu fuga ng'arng'ari ak ghwanung' ghoaw ashoohoodiga hees, nea ng'asheanda habeawooda, eadu geeshta deaweeda, ghwaloat Balleanda ghayi bean ahidaat damanda manda mudeanooda.