Ebraniya 6 - NEAJEEDA EESH BEA BUUNEESSEAN

¹ Asi aseasa eweaya mwadi eanung'waada ng'asheekka ghayi bea garayi bea ginealshooda Gristohiin nea gehittiisi heeda, ak ea adagudeesinnyi sindeetta duukkuunooda aba gadiyoojiga nimeewa ak geendeawi masaweega aba heeda Aseetta,

² aba iitta gimmiinnooda, ea iitta iinda geattinga iheenga buuneeda, iitta dunnooda miyeeda, ea girgweageeda maygamuudean.

³ Nea ng'asheesu gajeesna iimwas Aseetta.

⁴ Ak ahang'waay gideaba gaynung' gwaduukkuuna fukka ghayi nidaah weeshinda ammwadiin, fukghayi siittaw gimearda Gurorooda Ghaydit,

⁵ ak ea nisamu aloheeda ng'asheanda Aseetta ea dea uurda gweannyeekka jea ghwahidu,

⁶ amaduw ghwayam geaw nea nittambiilan, nea abeeda ea ningoor Balleanda Aseetta aba gidagassiida saawa ak gong'ng'ooysa humng'eeda aba foolda.

⁷ Aba gideaba ng'eanyiida roobassa roopta galeagasean, ak goruudu nyeega miisa fukghayi barsean, ak ghwanyas ghawooda aba heeda Aseetta.

⁸ Ama jih halaghweenga ea ng'obeeshta, ea marachchi gil ea gwariikghta eamwaashta; nea mudeanoadaannyi ea ghwardeayda.

⁹ Asi earappeadi sibalooldunuun, aba badahuukkeagwa, fuga abwariinyi, geanalli muuchchi ng'asheega miyaas bea lealeanooda.

¹⁰ Aba gideaba Aseetta mandeawana ghwanooda ea ghoanaawa ghaang' gadiyoojigeagwa ea bariinyeega ghayi oahhiimu appadaydaannyi aba gadiyeesiinda fuga ghaydidi, duu asna eara ghamneawa.

¹¹ Ak geegasayi giliwas sih aba jeedeang'wa dahiimna doobiiwnatta uurji diitta ak ghwanal huumeanda ea girrar ea ghwahitta huydeanda,

¹² ak abeeda ea mwang'udeagwa ghaleehooda, ak gowoschi fuga jea goomaseaw geat fukka aba naweeda masaweega ea milikghteayda ak gohearannyi gidaghayi sihelleesa.

Helleesiinda huumwa bea Aseetta

¹³ Aba gideaba damanda sina Aseetta helleesiinda sea Abrahaamu, nea abeeda ea manda siida haw jea gweaksa habeawooda, gweaksa geaw habeawooda,

¹⁴ nea gwayi, “Aba huumwa gaydagoonnyi ghawooda ak ghahaachcheey.”

¹⁵ Gwasnu eara Abrahaamu, aba riyeeng'deayda, ghwanyas helleesiinda.

¹⁶ Buuneeda aba huumwa iissa gweaksa habeawooda siida haweewa saawa, nea aba mudeanooda sheang'nyeadinga nyaawa sean agitta habeawooda ea mudeanooda baloolda.

¹⁷ Hean nea gagasa Aseetta muuchchi gohiimsa fuga jea gwahearan helleesiindida ea gidamayghwayamwaatta seareeda aba gidagasa, hean gomajeek ng'asheagaaschi aba habeawooda,

¹⁸ asi aba jeemba haleanji iyyeenya moammu ghwayamwa, nea aba jeedeaba suu ea moammu gwargu Aseetta ng'uyyeega, aseaseeda mang'aw gasa heechchea gamng'awusa abeeda ghwanyas gimajeekta ak ghwanyas rarooda ghayi siyiin madeedeanya.

¹⁹ Geendeawi ng'asheanji nea gwargu huumwa ak gawuurji alooheeda jea ghaweat gisimeanda, ghusooda iissa gawa heeda ghaydit laabwa hoowa hang'da subwaasha gheeda,

²⁰ heeda weah Yeesu nea gawuurji siida galleada aba hoorgeedeanya, ak ea niiw ashoohoochcheanda haw manda mudeanooda nea gawuurji Melkisedeki.