Ebraniya 13 - NEAJEEDA EESH BEA BUUNEESSEAN

Gichchea ehhoosanda Aseetta

¹ Bariinyeega oorjoogiyya gagasa eamaduuleana.

² Adiiduw ginung'waadi gideaba gajahiimsiina rabasta innyeanda jeeda aba gideaba gwanda fuga mwaatkwa niing'aatta malaykajeega nea mwanala.

³ Oapkaada fuga Mida ghealooniga, ak goowuurjeewi giloondeayeesi ghealooniga sea saawa. Oapkaada fukka sisawaniin, aba gideaba earagooga goondeawi sasanuukka.

⁴ Geeshshooda dasissiina mureeda buuneessean, nea eara bulaliida gagasa ea mandeawana ririnnyeanda; aba gideaba Aseetta gaygoorgweaksa fuga munyas ea gea mealuuli.

⁵ Ak giheelleewi eaweagaagu bariinyeega lappiya, ak gagasa ghoahiinnyi gidindeawi aba gideaba gwayi, “Aniini manda gichchea daraay ghana danung'useey heeda.”

⁶ Hean abeeda gajeammuusa erukuna nea geesikteawi gideaba, “Ng'uttamiida weedannyeandeanyu gil, ak aniini ea maydaawal ng'eang'i; siida gaygwasmanean naaha?”

⁷ Oapkaada fuga ahaaghwaneagwa, fukka rukuneegwa ng'asheanda Aseettean; asikteawana gichchea ghabwat geeshta eaweega nyaawa, ak googali masaweega nyaawa.

⁸ Yeesu Gristo gawuurji gideaba heetta ea ghamneawa ea gagul damanda manda mudeanooda.

⁹ Adiiduw ghoayaachchi geeshta ng'asheega saang'a ea ginealshajeega hidu; aba gideaba ghwahit geemmajeek gurorooda aba dagheerjeandumeeda, nea mii aba hamichchoojiga gil, ak ea mwanyagaada aba gidaat geeshta.

¹⁰ Ak geendeawi heeda wagiida nea fukka gadiiyi aba jeeda maheemajeandean ea madoobiiwsiina gideaba gayghwaak.

¹¹ Aba gideaba sasanuukka diyeanga sihhiida foojeannyeekka nyaawa ak ghwaat ashoohoochcheanda haw heeda ghaydit ghoaw lukghumeeda appadayda ring'eedean geaghwarda aba jarooda murdeeda gambiini.

¹² Eara Yeesu gwasawana aba madeettooshta ak abeeda ghoammiidu buuneeda aba foojeandaannyi.

¹³ Asi eweaya mwadi heeda mida aba jarooda was murdeeda gambiini, ak geeguuyeesi baspaseagaaschi ghayi ahang'waay.

¹⁴ Aba gideaba aba hiji meendeawani mujiineeda jea ghwashng'u, aseasa geegasayi mujiineeda jea ghwahidu.

¹⁵ Asi aba niny eegala mwadi nea geattaydi lukghumeeda dumsheesiinda Aseetta, nea haghweega ghuutta gil gea mwas gheawungaaschi.

¹⁶ Adoofoolli sinooda ng'asheega miyaas nea gooppareannyi haleanjeeda oondeawi, aba gideaba lukghumeeda sunu goohoosan Aseetta.

¹⁷ Asissiina mureeda fuga ahaghwaneegwa nea googadiyeesi; aba gideaba saawa gang'ula guroruunatkeagwa, nea gawuurji siida jea godayyii ng'asheega. Asi saawa gagasa gwasin ng'asheesu nea gahoosan, nea adagagiisan, aba gideaba ng'asheega sunu maygwarachchi gil aba heedeang'wa.

¹⁸ Amwaasha Aseetta ghawooda appadahuukkaasa, aba gideaba geesikteawi gideaba geendeawi fughareeda miy, nea geegasayi eesna haleanjeessean aba mureeda.

¹⁹ Ak geamuscheegwa muuchchi aba jeedeanyu asna ng'asheanji ak abeeda geebay eetteelnean heedeang'wa.

Mooshta Aseetta

²⁰ Asi ghamneawa Aseetta mideawa hoyyoo biikta gweadu gichcha Ng'uttamiideanya was Yeesu aba jeeda miyeeda, jeagiischoochcheanda haw bea gisilga, aba foojeanda neajeeda manda muudeanooda,

²¹ gagasa gagooneegwa haleanjeessean miyaas ak abeeda goosinnyi gidagasa, nea gagadiiyi aba jeedeang'wa gidagasa niny aba gheanyangaaschi aba naweeda Yeesu Gristo; nea giigheambiitta ea daannyi damanda manda muudeanooda. Amin.

Ng'asheega huuydean

²² Geamuscheegwa, fuga eaduupcheewi, oang'ng'waanya ng'asheandeanyu jea goomajeegeegwa, aba gideaba ng'asheesu geang'oorneegwa nea ghanuwaaschi.

²³ Gagasa anala gideaba oorjeeda giyeanya was Dimotteo siittin aba ghealooniga, ak abeeda gaydabay dahidu heedeang'wa iibay ghwahidu.

²⁴ Aghada fugeagwa hees ea fuga ghaydidi sean. Fukka leabu ng'eanyiida Ittalyaan ghoaghadeagwa.

²⁵ Gagasa anyasa oagasean dagheerjeandumeeda. Amin.