Ebraniya 12 - NEAJEEDA EESH BEA BUUNEESSEAN

Aseetta was Ghweandeanya

¹ Asi, dea nineaweesiinaneasa shamooghooda haw bea muushoodiga, gagasa easaja giliwas sareenda, ea ring'eeda nekkiisseasa muuchchi ak ghwanung' eesalda nea geemmiriikchi ng'weega siyiin madeedeanya,

² nea geeng'ulayi Yeesuuyda asheeda was dea amajeek masaweagaasa, was dea aba hooseaneega siyiin madeadaannyi ghoahang'waay aba beehiida, ak gafool baspaseega, ak goopteada aba meatkweeda geattinda dugwa bea hoorgeeda gheambalmeeda Aseetta.

³ Asi ng'ulla dea ahang'waay appadayda fuga ring'eega ea fuurjeeda appadaydaannyi, ak abeeda ea moahuuwi fuga bur ghana gea giyoonnyi.

⁴ Aba ng'uchcheedeang'wa sea ring'eeda miyoahhang'waanya ea eeyi bwak ea oahhiida foojeandeang'wa.

⁵ Ak ea niroosseegwa ng'asheega ghayi rukuneegwa nea gwahindaneegwa balloojiga? “Balleandeanyu, adiiduw gung'ulayi nea giibudeayani lasooda lasnyi Ng'uttamiida, ghana gabur iheengeagwa iilaseegwa niny.

⁶ Aba gideaba Ng'uttamiida iissa ghwalas siitta bwariiyiin, ak ghwalas giliwas ballean mwas niny.”

⁷ Geaghus mureeda ak abeeda ghoahhang'waanyi. Aseetta ghwanung' ahuuwa balloojiga; gaygwanda ana ballean jea ea maygwasissa mureeda ghwaan?

⁸ Isunung'waadaneegwa nea mealaseagwa, ak gowuurji sean, nea goguuyi sean, abeeda gowoschi diibiga sishuwaanda mowosi balloojiga.

⁹ Murdeedeaba ng'asheesu, geendeawi ghwaanigaasa bea ng'eanyiida jea ghwalaseasa ak geesissi saawa mureeda. Abeeda ea mammiisseasa muuchchi gideaba gajeettuuksiina geat Bwaabwa guroruunatka ak geanyaschi eaweega?

¹⁰ Aba gideaba saawa ghwalaseasa aba gheadi nuwaas aba gidamiisiinda saawa ak ghwalaseasa ak geemiyeesiidayi, ak abeeda geeguuyi ghaydidandaannyi.

¹¹ Aba gheadi nuwaas bayiiga sean iisung'ula ang'waan mawuurji gissubwariiy; ammuuchchu gwaji haghweega eadu hoyyoo bea doobiiwnatta aba heeda fuga sibean eannaal ng'asheesu.

Gichchea eabeada ea reekusiinda

¹² Asi agatkada geattingeagwa abittu ak goommajeekchi gutng'weakka ng'arng'ari,

¹³ ak ghoattoabiiwji naweadinga jea ghwala geeshangeagwa, nea abeeda gidamideawa badeeda ea meegeandeawana heeda roobuutka gagasa eahhaap.

¹⁴ Gagasa gimiriikta hoyyoo aba heeda buuneessean, aba ghaydidanda nea manda siida jea ghwadaa Ng'uttamiida iimandeawana.

¹⁵ Ang'ulla adaghanyi siisi mwanyasa dagheerjeandumeeda Aseetta; ak ea manda hawunnyeanda ng'weaninda ama rudu gweadu jaliida, nea aba nii ghang'ut fuga saang'a ririnnyeanda;

¹⁶ nea adagwanda siida sina ng'asheega munyas ghana dea meawalla gheang'da Aseetta uurji Esawu, ghayi shaayda hawundaannyi doobiiwsa aba agiischooda assagi.

¹⁷ Nea ghoanalli gideaba iiduw nea gagasa gwahearan ghawooda, geefool, aba gideaba mwanyasa gheatta duukuunooda, earappeadi gasa nea gobuuttu dabeakka.

¹⁸ Aba gideaba agooga miyapkaani heeda gidasiimmu eawaas, was ng'ushapta beasta, ea misaneeda, ea giiseaneega, ea shaarara,

¹⁹ ea nyeashta duruumbeatti, ea ghuutta siida ama nyaah ghwanung' ghabeal fuga iiy ak ghwanung' ea magassa gabiikta ghwayiiy giijasi nea geerukusa saawa.

²⁰ Ak ea mayghoammu aba ng'asheekka surukusean, “Nea eara diyeayda iisat gijeeda, gajeefutta lagheanga.”

²¹ Huumwa, nea hoowa ghang'uda fii muuwda nea heeda ayi Muusa, “Aniini ghaabwaadannyi aba muuwda.”

²² Ak ea noapkaannyi Giijeeda Sayuuni ea mujiineeda Aseetta majeek, Yerusaleemooda humng'eeda, ea heeda malaykajeega saang'a, bwat geat aba ghweelmeeda,

²³ ea heeda fuga bwat geat was gea sishsheeda eeji sung'oorsa gheawunga nyaawa humng'eeda, nea dea laja girgweaguutka ea Aseetta buuneessean i, ea heeda guroruunatka fuga doobiiweadi geemiyaas,

²⁴ ea heeda Yeesu, was siida aduuptooschi buuneeda bea neajeedeesh, ea dea foojeanda sippuunna jea gwanyagu haleanjeeda miyaas ng'al foojeanda Habeeli.

²⁵ Asi ang'ulla adiiduw ghoaheawi ninnyeeda balool. Aba gideaba inyeeda saawa ea mamng'awa damanda heaweawa ninnyeeda reekusa saawa aba jeeda ng'eanyiida, abeeda gajeemng'awdaan iisiheawi ninnyeeda rekuseasa aba humng'eeda.

²⁶ Hean ghwanung' nyeashtaannyi gwaduumduum ng'eanyiida; ak ghamneawa ea niheelleesa gideaba, “Ak gaydabiikta gichcha deaduumduum nea mwajeaghus ng'eanyiida gaydeaduumduum eara humng'eeda.”

²⁷ Ng'asheanji bea gideaba, “Gaydabiikta gichchean,” ghoahiimu geandeayda gissittuumduum, was gidaghayi sisin, ak abeeda geappuut gitta meammu eettuumduumiin.

²⁸ Asi eahuuwa fuga mideawa badiischooda aba nyasooda sugoochcheandumeeda majeettuumduum, ak geattawji Aseetta ghadoowanda huumwa, aba mureeda ea mooshta ghawooda.

²⁹ aba gideaba Aseetteanya beasta nyarja haleanjeesseani.