Ebraniya 11 - NEAJEEDA EESH BEA BUUNEESSEAN

Masaweega

¹ Asi ghamneawa masaweega goomajeek haleanjeeda sirar, ak gwargu iitta haleanjeeda meadaaha.

² Appadaydeaba nii ea ninyas gweargwa ghaydidanda huumwa.

³ Aba masaweega geanalli gideaba ng'eanyiida geesin aba ng'asheanda Aseetta, ak eara haleanjeeda sidaa eameesnana haleanjeeda meadaaha.

⁴ Aba masaweega Abeeli ghoadaw Aseetta lukghumeeda ea ghang'al Gain, ak aba nii geattaw doobiiwnatta, hean ghoaw Aseetta mushoochcheanda iimwas haleanjeedaannyi bea gimearda; ak ghami, ak aba masaweagaaschi ea gudugabalool.

⁵ Nea aba masaweega geettiing'da Enokki humng'eeda ak abeeda eamwadaaha miyeeda; ak ea meanyasa, aba gideaba niyaat Aseetta. Asi heeda miyeayaada abeeda easurukuna badayda gideaba niihoosan Aseetta.

⁶ Nea iimanda masaweega ahang'waay gideaba gajahoosana niny. Aba gideaba siida wassean jea gwaneekkiissa Aseetta gagasa ghwanal gideaba niny gwanda ak gomeari fukka gaseadayyi ninyiin.

⁷ Nea aba masaweega Nuuhu damanda rekusiina Aseetta aba iitta ng'asheega meedaaha, ghwayiiy ak gwasin maleambooda haw jea ghaweada fugeaba gheannyi; ak aba nii gorgweaksa ng'eanyiida ak ghoaw siida jea gwahearan doobiiwnatta sinyassa masaweega.

⁸ Aba masaweega gwasin mureeda Abrahaamu damanda suguursiina ak gawa ng'eanyiida jea ghwanyasa hearaniischooda; ak gawa, nea mwanala eara heeda gal.

⁹ Aba masaweega goobiida ng'eanyiida helleesiinda, aba jeeda ng'eanyiida buuneeda, ak goobiida jeesinga maheemajeega sea Isakka ea Yakkobo, gwahearaniischi sea niny aba heelleesiindida.

¹⁰ Aba gideaba gang'ula mwadi ghwadaa mujiineeda mideawa sindeetta, nea siida deas ea dea sin ea Aseetta gil.

¹¹ Aba masaweega eara Saara ghwanyas uurda jea gagweayiida, earappeadi ninaawuda gweannyeakkaaschiin, nea ghwanung' ghoaw niny siida doabiiwaat mideawa helleesiinda.

¹² Iiduw aba hichpa siyagi miy nea gawuurji gilinimi, ak geeji jeatta saang'a deenna miinga humng'eeda ak gwadeenna iseaskweanda ghuutta basooda.

¹³ Fiisu seaniin gameewwiisa jeeda masaweega, ak ea miighwanyas gidaghayi sihelleesa, ak geaghus gideaba ghwadaa nea sheagi ak ghwadeapta, ak ghwanal gideaba saawa rabasta gil ea fuga mang'aw appadayda ng'eanyiida.

¹⁴ Aba gideaba fuga rukku ng'asheesu ghoahiimu muuchchi gideaba saawa gagaseadayyi ng'eanyiida jea goobiida.

¹⁵ Nea abeeda iyapkaat ng'eanyiitta leabuun, ghwanyawa gwandeawa seawadeeda biikteayda.

¹⁶ Asi ghamneawa aba giduurji, gagaseadayyi ng'eanyiida miy, nea diitta bea humng'eedeani. Hean Aseetta ea moammu ghabwaspwas aba gideaba geguura Aseetta nyaawa, aba gideaba nisissa saawa mujiini.

¹⁷ Abrahaamu aba masaweega, eaweetta sisimsima, ghoadayda Isakka, nea ninnyeeda ghayi nyas helleesiinda hean gagasa ghoadayda balleandaannyi was haghasheeda,

¹⁸ nea abeeda geeyi appadaydeaba niny, “Aba Isakka gajeeguurdeaweey diibiga jeachcheengaagu.”

¹⁹ Ak ghwanal gideaba Aseetta ghoammu gooduunna buuneeda jeeda miyeeda; hean gwargu nea ghoawaaghan, ak iiduw gabiikta ghwanyas.

²⁰ Nea aba masaweega gamus Isakka ghawooda jea ghwahidu appadayda Yakkobo ea Esaau.

²¹ Nea aba masaweega damanda meawa Yakkobo, gabadiischeesa giliwas ballean bea Yoseefu, ak gabuy uhuuda damanda moasha ghawooda nea gwadiiwa geaw bileangidaannyi.

²² Aba masaweega Yoseefu, aba mudeanooda eaweagaaschi gwargu ng'eayda fuga Israeeli ak ghoadayda iitta gichchea eebuyda.

²³ Aba masaweega, Muusa damanda sijiila, ghafuy ghwaan ea ghaamwat sheah samwagu, aba gideaba ghwadaa saawa gideaba aamiy; ak ea moawala digheanda sugoochcheanda.

²⁴ Aba masaweega Muusa, damanda hissiina heeda, ghaheawa eeguura balleanda hudeaba Faraao,

²⁵ ak ghwaloat gideaba gaygaweechchi sawanadeeda sea fuga Aseetta ak ea moasaamwa hooseaneega jeeda ring'eeda.

²⁶ Ak ghwanung' ghoaw ging'weakka ea sawanadeeda Gristo meanang'oochcheandumeeda haw mawuurji maghasuukka sittiing'da bea ng'eanyiida Misri, aba gideaba ghoamuughu gimearda.

²⁷ Aba masaweega ghabeawa ng'eanyiida Misri, nea moawala nyarasta sugoochcheanda; ak ghwarjeang'da nea gawuurji siida daa Aseetta meadaaha.

²⁸ Aba masaweega ghoang'ng'waay Basakka ak geeppuunna foojeanda, ak abeeda iihidu Gitta nuusa duweachchajeega ea moammu ghwasat saawa.

²⁹ Aba masaweega ghoaghaawa buuneeda Basoodareara gawuurji gili sik ng'eanyiida ghajaam; nea fuga Misri, iigala sinooda gawuurji gissinda saawa, ghwaak beega.

³⁰ Aba masaweega ghoabeada ghamarda Yeriikko damanda neaweesiina saawa eawooji ispwa.

³¹ Aba masaweega Rahaabooda aweaksheeda ghanyea mameewuudayi fukghayi manda mureeda, aba gideaba ghwadeapta fuga buwa gheang'da.

³² Abeeda gaydargu naaha? Aba gideaba madeayi damanda aba rukunooda iitta Gidion, Barakka, Samson, Jeefta, ea dea Dawdi ea dea Samweeli ea Sibanga,

³³ nea aba naweeda masaweega ghwajoar daroorakka, ak ghwanung' eesin gittoabiiw, ak ghwanyas heelleesiinda, ak ghwarat ghuusiga ng'annyeekka,

³⁴ ak gwanuus beasta ng'waan, ak gamng'awa madeeda bwaanga, nea ghwanyas uurda aba jeeda ng'arng'aranda, ak gwandeawa uurda aba jeeda ng'uchcheeda, ak ghwanung' gamng'aw lugooda emoojiga.

³⁵ Ghwanyas gadeemga fuga nyaawa duunna miyeeda. Mwaatkwa geesawan, nea ghaheawa ghamwas siksiinda, ak abeeda gwaduuttu gichcha ak ghwanyas eaweega miyaas.

³⁶ Mwaatkwa gwasawana aba shikkooda ea bayiiga, nea ghabwada geeratta munyaloalajeega aba ghealooniga.

³⁷ Geefutta lagheanga, ak geabwaash nibiyyeenya, ak genuuseada aba bwaanga; ak gwaneayi nea gookkwa eagweega gisilga ea gea nooga, ak ea barbari, nea geesawan, nea geesma ng'asheega munyas,

³⁸ nea ng'eanyiida ea magassa fiisu, ak gwaneayeewa eeshtearajeaga ea gijeega, ea jeesinga bearuutka ea gwaleadinga jeeda ng'eanyiida.

³⁹ Nea suuseaniin, earappeadi sisim aba masaweega nyaawaan, ghanyea mwanyasa gidaghayi siheelleesa,

⁴⁰ iiduw nea nibada Aseetta gidamiy appadahuukkaasa, iiduw isihelleewi ghanyea maygamajeekcheewiidi.