Ditto 1 - NEAJEEDA EESH BEA BUUNEESSEAN

¹ Baulo, soomjeanda Aseetta ea biissa giijasoochcheanda Yeesu Gristo, ak ghaanung' gawa mwadi masaweega fuga loat Aseetta ea fughareeda humeanda mideawa miyinda,

² Aba jeeda rarooda eaweega manda mudeanooda, aba heeda Aseetta moammu gwanaba ng'uyyeega, sibean eheelleesa gweannyeekka goolla ghang'tta

³ iiduw nea ghwahitta damanda ghoadaajiit ng'ashaandaannyi ghayi sitteaganean aniini aba girrukuteayda lealnoochcheandeanya was Aseetta;

⁴ Heeda Ditto jeepteanyu bea huumwa aba naweeda masaweega sippareannyi. Gagasa nyasa dagheerjeandumeeda ea hoyyooyda leabu heeda Aseetta was Bwaabwa ea heeda Gristo Yeesu was lealnoochcheandeanya.

Gadiyeeda Ditto aba ng'eanyiida Grette

⁵ Nii gideanung'usiinaneey ng'eanyiida Grettehi ak abeda gisni gadiyeetta shoadaan, nea giyiini gweargwa giliwas mujiinajean gawuurji gidaghayi earukuneey, siida iimeyeatteena ghuut.

⁶ Iideappa siida ea miyeerukuna badayda ng'asheega munyas nea siyeeda gatmoodassagi gil, nea diibigaaschi gwandeawa masaweega miyeergweaksiina deambilaneandumeeda ghana nyootta mureeda.

⁷ Nea jeagiischoochcheanda ganiisa, was siida sitteaga gadiyeeda Aseetta, gammiisa ea meerukunana badaydaannyi ng'asheega munyas; ak gagasa ea maba ghwarja ghanea mii assas nyaras ak ea mii leeyeanda ghana gwajala ghana gwashissa ghaang' haleanjeeda mwahida,

⁸ gamiisa ea siida innya jihi, ak gwandeawa bariinyeega haleanjeeda miyaas, nea goodeeneaeda geaw, ak ea doabiiwaat, nea ghaydit, nea ghoang'ng'waay geaw;

⁹ nea ghoang'ng'waay muuchchi ng'asheanda gawuurji gissinnaalda, ak abeeda ghoammu ghoadayda ng'asheega gichchea eabeeda aba ginealshooda huumwa nea ghwajoar fukka heawaan.

¹⁰ Aba gideaba gwanda fuga saang'a manda mureeda, mideawa ng'asheega mwalooda gil, nea gwareengani buuneeda, nea ghwaranya gikka siyaat ghasmeahoodean,

¹¹ gidabal gearat ghuusiga nyaawa aba gideaba fiisu inyeesa gahutteawi buuneeda aba ginealshooda ak ghwanyas haleanjeeda aba ginealshooda mwadaagha.

¹² Nea siyagi aba jeannyaawa, ea sibaneeda nyaawa gil, ak gwayi, “Fuga Grette gaba ng'uyya galeagasean, ak ea diyeanga munyasi, ak gaba ghaleahu nea deewwi.”

¹³ Muwwunoani huumwa gil. Asi awoowsiina saawa nea ging'waniidi, ak abeeda gamajeegiit aba jeeda masaweega,

¹⁴ nea adagooleeysiit gununoonga fuga Yahuudi ea ng'asheega rugu buuneeda heawa humeandean.

¹⁵ Aba heeda fuga miyaas haleanjeessean amiyaas, nea gea munyas ea gea mandeawana masaweega aba heannyaawa manda gidamuy; fughareenga nyaawa ea gitteemshooda nyaawa ea munyas.

¹⁶ Iissa gwargu gideaba geanalli Aseetta, nea iissa ghwashaang' aba sinaweega nyaawa, nea gwandeawa sichcheeda, ak ea mandeawana mureeda, mammiisiina sinooda gadiyeeda miy.