3 Yohaana 1 - NEAJEEDA EESH BEA BUUNEESSEAN

¹ Gweargweeda, heeda Gaayooyda abwariinyi, eabiissi dabwariiy aba huumwa.

² Siida abwariinyi, ghamwaashchi Aseetta gideaba ghwadoabiiw ng'asheegaagu sean ak guwosi majeek; ak ghaanalli gideaba guroroadaang'u eamajeek.

³ Ak geahoosannyi muuchchi iihidu fuga eaduupcheewi mwaatkwa ak gamuuwwu masaweagaagu bea huumwa aba jeeda eaweagaagu, ak ea huumwa gil giyaadi geeshta huumeanda.

⁴ Ea meandeawani hooseaneega haw ng'al nii, gideaba ghayiinyi gideaba diibigeasu ghwaat geeshta huumeanda.

Duumshesiinda Gaayo

⁵ Siida abwariinyi, nii gisni ng'asheanda doabiiw gideaba gisissi oorjookkiyeang'wa gadiyeeda, raanya gea was rabasta,

⁶ was fuga muuwwu bariinyeagaagu aba madeeda ganiisa. Gajadoabiiwa iinung' gaweay bareannyeekka haguuw gadiyeeda Aseetta.

⁷ Aba gideaba saawa gaweay appadaydaannyi ak ea moang'ng'waanya gil aba heeda fuga emoojiga.

⁸ Asi gammiiseasa gideaba eadeapta fuga uurji suu, ak geawoschi fukkadiyeeda bea huumwa.

Deotarife ea Demetariyo

⁹ Gwanda ng'asheega neang'oorsi fuga Ganiisa; nea Deotarifeyda, inyeessa bwariiy gawa mwadiin mwamwasa gheambalmeedeanyu.

¹⁰ Asi iyaawunnyi, gaydeadu iitta gissin, aba gideaba iissa goojuur nea gwarukuna badaydeanyu ng'asheega munyas. Ea mabeachchi suu, ghaheawa niny ghwadeapta fuga eaduupcheewi, ak ghoaghuum eara fukka gasa ghwadeapta saawaan ak gooruutteawa jeeda ganiisa.

¹¹ Fugeabwariinyi, adoogali sinooda ng'asheega munyas, anala geaw alooheeda. Siida sina alooheeda siisi gaba Aseetta; ak dea sina ng'asheega munyas ea mii ghwadaa Aseetta.

¹² Demetrio nimuuwwu fuga saang'a ng'asheega badaydaannyi, ak eara huumeanda gamuuwwu; ak earaniini geamuuwwu, ak ginali gideaba muuwwuunoodeanyu huumwa gil.

Giighatta huydean

¹³ Gwachchi geandeawi ng'asheega saang'a jea dang'oorneey, ak ea meagassi dang'waar aba galaamu ea wiino;

¹⁴ ak ghaararji gideaba gaydabay dadaanyi, ak abeeda gajeebaloola nea geeng'ulayi geat.

¹⁵ Beaha hoyyoo. Ghoaghannyi fuga siroroochcheewi. Aghada fuga siroroochcheewi, ea giliwas sii bea saawa.