2 Yohaana 1 - NEAJEEDA EESH BEA BUUNEESSEAN

¹ Gweargweeda, ea gheamatta siloat sea diibigaaschi, abwariinyi aba huumwa, ea meaghusaan aniini eara fuga sean nal huumeanda,

² appadaydeaba huumeanji mida jeedeanyean, gaygoobiida jeedeanya damanda manda mudeanooda:

³ Dagheerjeandumeeda, ea baydeada, ea hoyyoo gajeendeawana, nea gaygwaleabu heeda Aseetta was Bwaabwa ea heeda Yeesu Gristoyda was Balleanda Ghweanda, aba huumeanda ea bariinyeega.

Huumeanda ea bariinyeega

⁴ Geahoosannyi muuchchi iyadaayi diibigaagu mwaatkwa nea ghwaat naweeda huumeanda gawuurji gidaghayi goondaneasa Ghweanda.

⁵ Ak ghamneawa, geamuscheey gheamatta, mii gideaba geang'oorneey digheanda eesh gil, digheanji deaghayi sibean endeawana ammwadiin gil, bea gideaba ebariinnya geadi.

⁶ Ak bariinyeega ea nihi, gideaba eweaya nea geayaachchi geeshta digheannyeekkaaschi; ak nii ea digheanda, gawuurji gidaghayi oayiing'di ammwadi gideaba oppiidana jeeda bariinyeega.

⁷ Aba gideaba nirinna badayda ng'eanyiida fuga saang'a bea ng'uyyeega, gea mwamwasa gideaba Yeesu Gristo ghwahittayda siida; anni ea diitta bea ng'uyyeegeani, ak ea dea mwamwasa Gristo gil.

⁸ Ang'ulla sasanuukkeagwa, adoohutteawayi geanoosinnyi, ak ghoanyaschi gimearda hidaat.

⁹ Siida wassean weah mwadi nea moang'ng'waanya ginealshooda Gristo mandeawana Aseetta; dea abiida jeeda ginealshooda gwandeawa sean Bwaabwa ea Balleanda.

¹⁰ Siida ihidu heedeang'wa nea meanna ginealshooni, abeeda ea adideapti aba gheang'u nea adiigeachcheewi;

¹¹ aba gideaba siida ageachchi siisi gabareannyi gadiyoojigaaschi munyas.

¹² Earagwasa geandeawi ng'asheega saang'a eagasayi dang'oorneey, ghang'wana ea mwang'waari aba galaamu ea gardaasajeanda, ghaararji gideaba gaydoan dadaanyi ak geabaloolleey nea geeng'ulayi geat, ak abeeda gamajeegiit hooseaneagaasa.

¹³ Gagoonyi seayooda diibiga huda geamadu siloat.