2 Goriinto 9 - NEAJEEDA EESH BEA BUUNEESSEAN

Weetta fuga Gristo

¹ Asi ghamneawa ghwaraanya aba heedeanyu gideaba geang'oorneegwa iitta haleanjeeda sisappa geadi jea eattaw fuga ghaydidi,

² aba gideaba ghaanalli gidowosti hidaat, ak ghaaghwari geaw appadahuukkeagwa aba heeda fuga Makkedoniya, nea gideaba fuga Akkaya ahidaat ghang'eada nndeara; iiduw gidoogasayi eanimajeek fuga saang'a mwaatkwa.

³ Iiduw geajeagu fuga eaduupcheewi ak abeeda amoawa ghwaroodeanya bwaageat appadahuukkeagwa gidamwadaagha aba ng'asheanji, ak abeeda gowoschi hidaat, gawuurji gidearukuteaydi jea awuurjeewana;

⁴ amaduw nea ghawunnyi nea geadeani fuga Makkedoniya, ak ghaahidu nea mowosi hidaat, gajeappwaspwaseasa, ak abeeda ea mwajeammuusa eerukuna gil appadahuukkeagwa, aba damani sindi jeeda masaweegean.

⁵ Hean ghadaayi gideaba ghwadoabiiw rekusiinda fuga eaduupcheewi ak ghwahidu heedeang'wa goshooynanean, ak gabean gwasin gitta sugu ghayi ohelleesiin, ak gagasa ahidaat ak ea mawuurji gissidiing'sa gawuurji gissittaydaawa masooda.

⁶ Asi gaydargu ng'asheanji: siida hista gea ng'ay gayghwalach gea ng'ay, nea siida histeawa innyeanda jeeda gayghwalaja innyeanda jeeda.

⁷ Daba siisi sinda gadiyeeda gidagassiida aba uhuudaannyi, adagwasin nea magassa ghana eediing'sa, aba gideaba Aseetta ghabwariiy siitta adayyiida haleanjeeda aba jeedeeshiini.

⁸ Nea Aseetta ghoammu ghoannyiideagwa ghawooda, ak abeeda gondeawi agooga heluutka haleanjeessean aba galeagasean abeeda ghoannyiideagwa muuchchi aba giliwas gadiya miy.

⁹ Gawuurji gissung'waarda bea gideaba, “Nidaarda, ak ghoadaw fuga barbari; doobiiwnattaannyi gayghwashng'u damanda manda mudeanooda.”

¹⁰ Nea siida adaw mmbeyooda siida jea gwahista ak ghoaw mukkattee ghoaw hamitta gaygagooneegwa ak gwalakkuuneegwa haleanjeeda ak ghwanung' ghoahaada booga aba doobiiwnatteang'wa,

¹¹ Gajeenung' abaruura aba naweadinga sean abeeda gwannyeaniidi jeesingeagwa muuchchi, nea aba naweedeanya gayghoadaw Aseetta badiischooda;

¹² aba gideaba gadiyeeni maygabeachchi gideaba gayghaweat fuga ghaydidi aba gidagasa, gayghwanung' gabadiischeesa buuneeda Aseetta muuchchi ea ghwanaawda.

¹³ Aba simsimdeaba gadiyeeni, gajoakghambiida Aseetta aba mureedeang'wa aba masooda Giijasta miy bea Gristo, ea appadayda innyeanda jeesingeagwa oattawji saawa ea buuneessean;

¹⁴ nea saawa ghamwaash Aseetta muuchchi appadahuukkeagwa, aba dagheerjeandumeeda naawda mida jeedeang'wa.

¹⁵ Ebadiischeesiina Aseetta aba gidagooneasa meammuusi rukunoodean!