2 Goriinto 8 - NEAJEEDA EESH BEA BUUNEESSEAN

Innyeanda jeeda fuga Gristo

¹ Fugeaduupcheewi, geegasayi anala dagheerjeandumeeda Aseetta ghayi sihhiimu aba jeesinga ganiisajeega Makkedoniya,

² nea aba jeeda simsimda ng'waan ea sawanadeeda, hean aba hawunda hooseaneega nyaawa ea barbarannyeekka nyaawa raanya ea nibaruur muuchchi nea goobal geat aba meatkweeda nyaawa.

³ Ak ghoadayda aba gidammuusta, ak gaydamuuwwu, ea ghwanaawda, aba gidagassiida saawa,

⁴ gamuseasa muuchchi eattaw gheatta jea gobareannyi gadiyeani bea weetta fuga ghaydidiin,

⁵ nea nii ea mii gidasirardi gil, ammwadi ghanyi ghoadaw geat Ng'uttamiida ea biissa aseasa aba gidagassiida Aseetta.

⁶ Iiduw geamiinnyi gheang'da Ditto nea geegasayi gawuurji gidaghayi bean ghoang'eatta, gagasa ghoahiit aba jeedeang'wa gadiyeeni mideawa dagheerjeandumeedean.

⁷ Ghamneawa iyoang'aldi aba haleanjeessean aba masaweega, ea rukunooda, ea fughareeda, aba jeeda guroroossean, ea aba jeeda bariinyeegeagwa aba heedeanya, asikteawana gideaba ghoang'aldi aba gadiyeeni bea dagheerjeandumeedean.

⁸ Asi geargu ng'asheanji nea mii gideaba geagonnyi digheanda, geagasayi asikteawana aba dagheerjeandumeeda buuneeda suurja ak abeeda bariinyeegeagwa earada gaygaba huumwa.

⁹ Aba gideaba noanalli dagheerjeandumeeda Ng'uttamiideanya was Yeesu Gristo, earappeadi baruuriin, hean ghabwarbwariit appadahuukkeagwa, ak abeeda aba barbarandaannyi ghoahuuyi baruurji.

¹⁰ Nea appadaydeaba ng'asheanji gadagooneegwa badiida: ghwahit muuchchi ghamneawa aba heedeang'wa gihiitteaba gitta gweayda heetta ng'attaan ak ea meakghusa sinooda gibwadi gassooda,

¹¹ asi aba gidowosti hidaat aba gidoogassiidi gagasa gweatteayyi sea gidoahhiitti aba jeeda haleanjeeda ondeawi.

¹² Aba gideaba iinyoo gwanda hidooda, abeeda gajeamwas aba gitta mideawa siidean, nea mii aba gitta mandeawaneani.

¹³ Aba gideaba mearukuni ng'asheesu ak abeeda ghwanyas fuga mwaatkwa hooseaneega nea ghoanyaschi agooga sawanadeeda,

¹⁴ iiduw aba ng'asheega giiyang'deyyeeda aba haleanjeedeang'wa ghamneawa ondeawi saang'a gagasa ghaweat fukkasa, ak abeeda haleanjeeda saang'a mideawa ghaweadeagwa iyoogasayi, ak abeeda gaygwanda giyang'deayyeeda.

¹⁵ Gawuurji gissung'waarda gideaba, “Siida awaam ea ghwasaang'anyiit maburda gil, nea dea awaam geang'ay mwasunyeawana gil.”

Ditto sea bareandaannyi

¹⁶ Gagasa eebadiischeesa Aseetta iin jeeda Ditto gassoodida eandeawi aniini aba weetteang'wean.

¹⁷ Aba gideaba niny mwakghusa ging'ng'ooyda ng'asheandeanya, niny abeeda gagasa muuchchi hinnooda heedeang'wa aba uhuudaannyi.

¹⁸ Hean gechcheagu niny sea orjeediyya nigeawiit iitta aba rukkwiideayda Giijasta miy aba jeesinga ganiisajeega seaniin;

¹⁹ ak ameakghusa nii akghwahit, niny ghwaloat ganiisajeega ak geanung' etteayeewana damanda sibeawi eesnanaa gadiyeedeanya bea bariinyeega, aba gigheambiitta Ng'uttamiida ak ghoaw gwadeagooda gitta miy gasa jeesingaasaan.

²⁰ Ak ea meagassi gideaba gaygwarukuna sih badahuukkaasa ng'asheega munyas appadayda gimmuusta sugu ak gang'ula gisilachchiida haleanjeeda,

²¹ nea geeshsheedi ghanyi eapkaada ng'asheega miyaas, nea mii ammadeeda Ng'uttamiida gil akghwahit, earaba madeeda buuneeda.

²² Hean geechcheagu sea saawa orjeediyya nigeawiit eesimsim ak geadaayi gideaba aahiidaat aba haleanjeesaang'a, ak ghamneawa ea hidaat muuchchi ea ghang'alda appadayda masaweegaaschi adareemshi aba heedeang'wa.

²³ Asi aba iitta Ditto, niny bareannyeandeanyu ak ea siida easnuudayeewi gadiyeeda appadahuukkeagwa gil; nea gabiissa gagasa iitta fuga siduupcheewi, saawa fuga ajeagu ganiisajeega, ak ea gigheambiitta Gristo gil.

²⁴ Asi oahhiimda aba madeeda ganiisajeega, bariinyeegeagwa ea gissughwardi geat appadahuukkeagwa aba heedeaba fiisu.