2 Goriinto 6 - NEAJEEDA EESH BEA BUUNEESSEAN

¹ Nea aseasa iisisinnyi gadiyeeda sea niny, hean geemuscheegwa gideaba adiiduw ghoanyaschi dagheerjeandumeeda Aseetta mwadaagha.

² Aba gideaba gwayi, “Damanda sumwas gealeyseey iit, ak ghaweachcheey eaweetta lealeanooda.” Ng'ulla, ghamneawa damanda sumwasi; ng'ulla ghamneawa eaweeda lealeanooda

³ Meagassi eayiina naweemba siida wassean gichchea gwaruusa, ak abeeda eameedeaksiina gadiyeedeanya munyinda,

⁴ nea iisuwuurjeewi soomjooga Aseetta abeeda geaghwarji geat aba naweadinga sean, aba naweetta haw bea milkghteaydean, aba sawanaduutka, hang'ooynachcheekka habitkwajeega,

⁵ bayiiga, ghealooniga, gidumduumda, gadiyoojiga, ging'weernooda, jalooda;

⁶ ea aba alooheeda, ea fughareeda, ea gihang'ooyda, ea innyeanda jeeda, ea aba Gurorooda Ghaydit, ea bariinyeega huumwa,

⁷ aba ng'asheanda huumwa, ea aba uurda Aseetta; ea baditta doabiiw bea ng'uchcheeda mida geattinda dugwa ea geattinda ghaadaam;

⁸ aba mureeda ea nyootta mureeda, iisismaneasa ng'asheega munyas ghana eesmaneasa ng'asheega miyaas. Ak geenung' eahuuwa fuga rengani buuneeda nea geerukku huumeanda;

⁹ ak geewuurjeewi fuga meanala, nea geanaleasa muuchchi; ak geewuurjeewi fuga meewa nea gung'ulayi geewoschi majeekcheewi; ak geewuurjeewi fuga siyaaga ghoorjooda, ak ea menuussa;

¹⁰ geewuurjeewi fuga giisan, nea ghana gehoosannyi galeagasean; nea geewuurjeewi fuga barbari, nea ghana geepparuurji fuga saang'a; geewuurjeewi fuga mandeawana gil, nea ghana geendeawi haleanjeessean.

¹¹ Ghuusigaasa sijaachchi aba heedeang'wa, ea fuga Goriinto; nea guroruunatkaasa ea nibareahiidi.

¹² Aseasa meakghumeagwa, agooga ghoaghuumeegwa haleanjeetta oabwariinnyiin.

¹³ Aba yamitteaba geaw geabalooldi gili eabaloolli diibiga, oapwargiida guroruunatkeagwa.

Reekusiinda seareeda fuga mandeawana masaweega

¹⁴ Adiiduw ghoang'ng'waanyi geat sea fuga mandeawana masaweega. Aba naweeda mwadoabiiwa, aba gideaba gwanda dupcheemba naaha mida dageascheeda doobiiwnatta ea heheweega? Nuut gichcha gwanda rorochcheemba naaha mida dageascheeda weeshinda ea misaneeda?

¹⁵ Gwanda giyang'deayyeemba naaha dageascheeda Gristo sea Gidamuy? Ghana siida mideawa masaweega neada gaygwandeayeesa naaha sea siida mandeawana masaweega?

¹⁶ Neada gwanda neajeemba naaha dageascheeda gheada sibatta Aseetta sea gidamawosa Aseetta? Aba gideaba aseasa geewoschi gheeda sibatta Aseetta majeek; ak gawuurji ginnyaashta Aseetta nea gwayi, “Gaydeabiida jeannyaawa, nea gaydaneayeewa jeanyaawa, ak gaydoaw aniini Aseetta nyaawa, nea ghoaw saawa fugeasu.

¹⁷ Asi arinnana jeannyaawa, ak gohhelleewi geat saawa gwargu Ng'uttamiida, ak ea adoang'ng'waannyi gida mideawa ririnnyeanda; ak abeeda gaydadeagwa ghoah.

¹⁸ Gaydoaw Bwaabwa aba heedeang'wa, ak gajahuuwa agooga balloojigeasu ea haweegeasu, gwargu Ng'uttamiida mideawa uurda.”