2 Goriinto 5 - NEAJEEDA EESH BEA BUUNEESSEAN

¹ Aba gideaba geanalli beadi udahabeascheanji itteanya bea hiji bea muunda ng'eanyiidean eaweeda sinyarjeawa, gendeawi gheeda leabu heeda Aseetta, gheeda meesnana geattinga, ghaydit manda mudeanooda mida humng'eeda.

² Aba huumwa aba hiji iissa geamnyaannyi nea geegasayi muuchchi eshshubeesa gibindida bea humng'eedean,

³ nea abeeda isishshubeesa gajeadaheasa nea meewosi dawiiri.

⁴ Nea damani duu eendana jeedeaba gheawiin, iissa gessiimi aba sawanadeeda; nea meakna gideaba majeekkwealeasa gil, gweagu gideaba gajeekkwealeasa muuchchi, ak abeeda gitta iissa ghamiin abeeda gayghwanukghta eaweega.

⁵ Nea siida ghayi sineasa appadaydeaba ng'asheanji ea Aseetta gil, amaduw gagoaneasa Gurorooda uurji raduutka.

⁶ Asi gewoschi daruuschi galeagasean; ak geanalli gideaba damani duwea majeekcheewi sasanuukkaasaan geewoschi sheageewa Ng'uttamiida,

⁷ aba gideaba geabeawi masaweega, nea meabeani deakta.

⁸ Asi edaruusiitta, ak abeeda ghang'wana geesheagiidi saseeda ak geppiidi ghoah sea Ng'uttamiida.

⁹ Ada endana ghoah ghana ea meendani, geesinnyi gissippurbuurji ak abeeda geehhoosannyi niny.

¹⁰ Aba gideaba gajeahitta eesasean madeeda hoorgeeda girgweageeda Gristo, ak abeeda gaba siisi nyas gidamiy ghanea gidamuyi, gawuurji gitta ghayi sin aba saseedean.

Duupcheeda sea Aseetta aba naweeda Gristo

¹¹ Asi, geanalli gissiwwaldi gheang'da Ng'uttamiida, iissa geaghurghurji buuneeda; nea gissuwuurjeewi ghwanal Aseetta, ak ghaararji gideaba analaat earaba jeesinga fughareengeagwa.

¹² Ak aseasa ea meegwarseegwa geat gichcha geegasayi gideaba gajaghwara geat agooga appadahuukkaasa, ak abeeda ghoammuuschi ashaaha ng'asheegeaba fukka gwara geat aba madeeda buneedean nea mii aba jeeda guroroodaannyi.

¹³ Aba gideaba iinung'uleasa geeska, gweagu badayda Aseetta; ama sindeawi fughareangaasa, gweagu badahuukkeagwa.

¹⁴ Aba gideaba bariinyeega Gristo iissa gwasinneasa uurda aba gideaba aseasa sumwaschi gideaba siyagi ghayi ghami appadahuukka buuneessean; asi abeeda ea nimeewa sean.

¹⁵ Ak ghami appadahuukka buuneessean, ak abeeda fukka majeekcheewiin ea meabiideewana badahuukka nyaawa abeeda goobiideewa dea meah appadahuukka nyaawa amaduw geettuudu.

¹⁶ Ghang'eada ghamneawa, asi aseasa meesissiini siida wassean mureeda aba ng'asheega saseeda; earappeadi aseasa sinalli Gristo gideaba siida gil, amaduw ghamneawa ea mudea gissinaldi.

¹⁷ Nea siida iimida jeeda Gristo, ea niiw siideesh; haleanjeedeaba garayi ning'atta, ng'ulla, nihidu haleanjeedeashish.

¹⁸ Amaduw haleanjeessean gwaleabu heeda Aseetta, ghayi aduupchaneasa aseasa sea niny aba naweeda Gristo, amang'atta gagoaneasa gadiyeeda giduuupcheeda;

¹⁹ nea aba jeeda Gristo gooduupchi geaw Aseetta ng'eanyiida, ak ea mang'ulla gidiinyeanyeekka mida badahuukka nyaawaan ak gagoaneasa giijasta giiduupcheeda.

²⁰ Asi geewoschi fuga sichcheakta bea Gristo, hean gamusiischooweasa Aseetta. Geemearmearanneegwa appadayda Gristo, ottuupcheewana geat Aseetta.

²¹ Appadahuukkaasa geanung' ghoaw niny ring'eeda nea niny ea mwanala ring'eeda, ak abeeda aba niny geahuuyi doobiiwnatta Aseetta.