2 Goriinto 4 - NEAJEEDA EESH BEA BUUNEESSEAN

Maghasta Gurorooda aba jeeda dahuunatka sigeeda

¹ Asi aba sareani, iinukwa gendeawi gadiyeeni aba baydeayda Aseetta, ghanyea meabealbeali.

² Siheawi ng'asheega baspaseega, ea naweadinga ng'uyyeega; ak geaheawi gideaba gajeesna milmilanda ghana eyyamujeena sea ng'asheanda Aseetta, geaghus aba ng'asheega huumeanda surgu aba eeshpwara ak geaghwarji geat aba giliwas fughareemba sih aba madeeda Aseetta.

³ Ama deeppa giijasteanya miy afunyaat, ada abeeda geaghus afunyaat aba heedeaba fukka rodeadiin.

⁴ Aba sareani aseetteaba ng'eanyiini ninung' gang'oowiidi fughareenga fuga mandeawana masaweega, ak ghaweada deakta weeshinda giijasta miy mideawa gigheambiitta Gristo, nea niny gawuurji sea Aseetta.

⁵ Aba gideaba meerukkuuni ng'asheega badahuukkaasa aseasa geerukku gideaba Gristo Yeesu Ng'uttamiida, ea gideaba aseasa geewoschi soomjoogeagwa appadayda Yeesu.

⁶ Ak ea Aseetta gil dea ayi, “Nung'waada weeshinda ghoabwaay jeeda misaneeda,” nea niny ghoabwaay jeesinga guroruunatkaasa ak ghoadaw weeshinda fughareeda gigheambiitta Aseetta aba gheamamda Gristo.

⁷ Asi aseasa geendeawi gheaseeda aba jeeda haleanjeeda sigeeda, ak ghoahiimu gideaba uuri hawiin gwaleabu heeda Aseetta nea maleapna heedeanya aseasa.

⁸ Geesawaneasa aba naweadinga sean, ak ea mwasuunya uurjeangaasa; iissa geehirbabannyi, ak ghanyea meanyeahani;

⁹ geesawaneasa, ak ea meenung'useasa heeda; iissa geefutteeweasa ng'eanyi, ak ea meeshshealani;

¹⁰ galeagasean geesareenni badahuukkaasa miyeeda Yeesu, ak abeeda geattahaach eaweega Yeesu aba sasanuukkaasa.

¹¹ Aba gideaba aseaseeni sindiin iissa geattaydaneasa enuusseasa galeagasean appadayda Yeesu, ak abeeda geattahaach eaweega Yeesu aba sasanuukkaasa jea gameewa.

¹² Abeeda gagadiyi miyeeda aba sasanuukkaasa, nea gagadiyi eaweega aba sasanuukkeagwa.

¹³ Amaduw iinukkwa geendeawi gurorootta bea masaweegean geang'waar gideaba, “Ghaamwaschi, ak ghoaw gideabalooli,” earaseasa sumwaschi, ak ghoaw gissibalooli,

¹⁴ nea abeeda geanalli gideaba siida ghayi aduudu Ng'uttamiida was Yeesu, gaygoduunneasa earaseasa sea Yeesu ak ghwayiineasa mwadeadaannyi sea agooga.

¹⁵ Aba gideaba ng'asheega sean gaba badahuukkeagwa nea gidahadaatta dagheerjeandumeeda muuchchi, ghoahaada badiischeesiinda aba heeda fuga saang'a, aba gigheambiitta Aseetta.

Giibinda aba masaweega

¹⁶ Asi majeabealbeala. Earappeadi iissa gawosiidi sasanuunatkkaasa, iiduw guroruunatkaasa iissa gewweshiit giliwas eaweechcha.

¹⁷ Aba gideaba sawanadeedeanya sinyaschi gaba gheadi nuwaas ak gwasinneasa gigheambiitta haw manda gichchea eegala,

¹⁸ aba gideaba meeng'ulli haleanjeeda sidaah geaghus haleanjeetta meadaahaan. Aba gideaba haleanjeeda sidaah ghang'atta, nea haleanjeetta meadaahaan gwandeawa eaweega mammuudeana.