2 Goriinto 13 - NEAJEEDA EESH BEA BUUNEESSEAN

Rekusiinda huydean ea giighatta

¹ Nii deaba samwagu gil aba wunooda awunnyi heedeang'wa. Gidinyeanda wassean gayghwadajiit aba ghuusispa mushoodi iyyeenya ghanea samwagu.

² Asi geareekusi fukka ghayi sin ring'eeda ammwadiin sea buuneessean, ak ghamneawa geareekusi saawa earea meandani hiji, gawuurji gidaghayi easindi damanda eandeawi hiji aba bareannoodeanyu bea iyyeenya, bea gideaba iyaawunnyi gichcha ea maydaaghu saawa,

³ iiduw nea gogaseadayi asikteawana gideaba Gristo balool aba jeedeanyu. Niny mii ng'arng'ar aba heedeang'wa, niny gwandeawa uurda aba jeesingeagwa.

⁴ Aba gideaba niny ghayi gengoor aba jeeda ng'arng'aranda, ak gobiideewa uurda Aseetta. Nea gewoschi ng'arng'ari appadaydeaba niny, amaduw nea gagadiyeeseegwa gajendeayeena sea niny aba uurda Aseetta,

⁵ Asi asawsiina geat agooga, adaaha ea ghoang'ng'waannyi masaweegeagwa. Asma geat, agooga. Ghana moanali agooga gideaba Yeesu Gristo gwanda jeesingeagwa? Geaghus aba huumwa araanya gideaba gajeesmeegwa!

⁶ Ak ghaararji gideaba gajanala gideaba aseasa miyearaanya.

⁷ Iiduw geamoashchi Aseetta ea moosni ng'asheanda muy, mii gideaba geegasayi eadaheasa gideaba sismeasa gil, geegasayi asna ng'asheanda doabiiw, earappeadi suwuurjeewi aseasa fuga raay.

⁸ Aba gideaba meammuusi eesna ng'asheanda wassean yamuuji sea huumeanda, geaghus eesna ng'asheanda was huumeanda.

⁹ Aba gideaba geehoosannyi isuwoschi ng'arng'ari ak gondeawi agooga uurda. Gissumwaashchi Aseetta gideaba gagasa amajeegiitta.

¹⁰ Ghang'waarji barawajeanji nea geawoschi sheageewaneegwa, nea geabaysiini gideaba iyaawunnyi ea mwang'waniidi aba uurdeanyu bea gheambalmeeda ghayi goonan Ng'uttamiida jea dadeekna nea mii dea nyarjeawda.

¹¹ Aba huuydeanda, abeaha seayu fugeaduupcheewi. Asna naweadingeagwa, ayiinya gideargu, daba siisi mwas nuut, abeaha weayda, ak abeeda Aseetta mideawa bariinyeega ea weayda gaygoobiida heedeang'wa.

¹² Okkatta geat aba samoodeaba geat ghaydit.

¹³ Ghoaghadeagwa fuga sean ghaydidi. Dagheerjeandumeeda Ng'uttamiida was Yeesu Gristo, ea bariinyeega Aseetta ea bareannyeeda Gurorooda Ghaydit gagasa andeawana oagasean.