2 Goriinto 12 - NEAJEEDA EESH BEA BUUNEESSEAN

Gissihhiimsa Baulo ea giidaheachta

¹ Asi gaydaghwar geaw; earappeadi manda gichchea danyagaadawa, ak gajeahhiimnaan nea geattahaach Ng'uttamiida.

² Aniini ghaanalli siyagi aba jeeda Gristo nea aba jeemba gweannyeew damanang'wan geayaat ea ehhiitta humng'eedeaba samwagu, ada gwandeawa saseeda ghana ea mandeawana saseeda aniini mwaanali, ghwanal Aseetta.

³ Ak ghaanalli gideaba siisi geng'ng'ooysa Nyeamus, ada gwandeawa saseeda ghana ea mandeawana saseeda aniini mwaanali, ghwanal Aseetta,

⁴ ak gwandeawa haleanjeeda meammu eergu, biissa ea moommu siida rukunooda.

⁵ Appadaydeaba siisi gaydaghwar geaw ama duukku badaydeanyu ea mwammuusi daghwar geaw, geaghus appadayda ng'asheega ng'arng'arandeanyu.

⁶ Aba gideaba inyeeda ghwanyawa geagasayi daghwar geaw, gwachchi ea maydawos dasha, aba gideaba gaydargu ng'asheega huumwa. Iiduw ghang'ng'waanyi geaw, ak abeeda ea manda siida jea ghoapkaat gil appadaydeanyu ea ghang'al gitteaksa heedeanyu ghana gwayiing'sa heedeanyu.

⁷ Ak goheellewean ghwaroodeaba geaw aba seang'ayda dagheerjeandumeeda sittahaach, ak geegoonan aniini halaghweeneeda aba saseeda, giijasoochcheanda Shattaani, ak goodeawiidan, ak goheellewean ghwarjeeda.

⁸ Niba samwagu geamuschi Ng'uttamiida appadaydeaba ng'asheanji, ak abeeda ghang'amwanaan;

⁹ ak gwayeeshshinean niny, “Dagheerjeandumeedeanyu ghoahiinnyi, aba gideaba uurdeanyu iissa gamajeegiit aba jeeda ng'arng'aranda.” Ak gaydahoosan muuchchi iyaaghwari geaw ng'arng'arandeanyu, ak abeeda gobiida uurda Gristo badaydeanyu.

¹⁰ Appadayda Gristo, asi, naahiichchi aba ng'arng'aranda, ea giing'weakka, ea sawanaduutka, ea ghabasta, ea habitkwajeega; aba gideaba damanda eawosi ng'arng'ar, hean geawoschi majeek.

Gadiyeeda Baulo aba heeda fuga Goriinto

¹¹ Nadashahiichchi! Ak ghoanung' agooga dasnu, ak gahaguuwan gideaba gajagwarsean agooga. Aba gideaba meawosi mwanang'eawa giijasoodiga suurja hees, earappeadi meawosi giliin.

¹² Nea gwadeagwajeega giijasoochcheanda huumwa sisin aba jeedeang'wa aba milikghteayda sean, aba gwadeagwajeega ea deamdeamanga ea gadiyoojiga hees.

¹³ Iiduw ea nishoadeewaneegwa naaha ea eemowuurjeewani ganiisajeega suurja, geaghus gideaba aniini miidasawaneegwa? Asamsean appadaydeaba ramaseanji!

¹⁴ Nii ghamneawa deaba samwagu nea geawoschi hidaat aba wunooda heedeang'wa. Ak ghanyea maydoaw sareenda, aba gideaba miidagasa haleanjeedeang'wa, ghaaghuschi gassoodeang'wa agooga; aba gideaba mammiissiina diibiga gideaba gaygoodiiwsheesa ghweaniga nyaawa, ea gheamadiga nyaawa, geaghus godiiwsheesa ghweaniga ea gheamadiga diibiga nyaawa.

¹⁵ Nea aba gideahoosandi aniini iyeagadiyeatti nea gegadiyeettanean, appadahuukka guroruunatkeagwa. Asi iyaabwariinyeegwa muuchchi, abeeda gajeabwariinyan gilimwanang'i?

¹⁶ Asi eanung'waada gwasnu, aniini miidasawaneegwa, geawoschi milmil, ak goyeenyi, ghawaamnyeegwa aba ghasooda.

¹⁷ Neada ea mwaanyagaadawaneegwa appadahuukka fuga eajeagu?

¹⁸ Ghayi geareekusi Ditto nea geayeeshshi una, ak geajeagu orjeetta bea giyeanyean sea niny. Neada Ditto ea ninyagaadawaneegwa aba gili? Neada aseasa ea meegadiyeattani Guroroodida? Neada ea meallabwaadani geeshangiga?

¹⁹ Ghoang'ng'wa apkaada gideaba geefurji geat aba heedeang'wa? Nii ammadeeda Aseetta geebaloolli aba jeeda Gristo, nea aba sean gedeegu bariinyeegeagwa, fuga abwariinyi.

²⁰ Aba gideaba ghaawalli dahidu ak ea moowuurjeewani gideagassiidi dahidu nea goowuurjeewi, ak ea moahiimni nea geewuurjeewi gitta moogassiidaniin; ea gideaba gwadeeppa gwanda jaliida, geawunda gheang'da, ea nyarasta, shidoodeaba ghaang', giheakteayda, soomeanda baloolda, rengaweega ea deakghuyandeeda.

²¹ Aniini ghaawalli gideaba gajiiduw iyaawunnyi gichcha gayghwahiing'naan Aseetteanyu aba madeedeang'wa, ak abeeda geagiisannyi appadahuukka fuga saang'a ghayi sin ring'eeda ammwadiin ak ea mii gwaduukkuuna munyinda, ea munyinda, ea hiseadayeandumeeda ghayi sineadayyi.