2 Goriinto 11 - NEAJEEDA EESH BEA BUUNEESSEAN

Baulo ea giijasoodiga ng'uyyeega

¹ Gideaballi ghwanyawa ghoamilikghti lendeedeanyu gilimwanang'. Amilikghta sea aniini!

² Aba gideaba aniini geashisseegwa ghaang' aba shidoodeaba ghaang' bea Aseetta, aba gideaba neanyearriiseegwa Gristo ak ghaadaydaneegwa awuurjeewana sibeeda miy weesa ng'eedeanagi.

³ Iiduw ghabealli, gawuurji gidaghayi renganniida ichchibooda Haawa aba milmilandaannyi, gajeehutteawi fughareengeagwa ak ghoanung'waadi doobiiwnatta ea alooheeda Gristo.

⁴ Aba gideaba iihidu siinuut ak gwarukuneegwa Yeesu nuut nyoo ea mii dea ghayi sirukuneegwa, ghana oang'ng'waanya guroroonnuut mawosa dea oang'ng'waanyi, ghana iyoamwaschi giijasta miy nuut mawosa dea ghayi oamwaschiiin, abeeda goosissi mureeda gitta.

⁵ Aba gideaba ghaaghanyi manda gidashoadeawanaan aba gidamideawa giijasoodiga hees.

⁶ Earappeadi aniini eawoschi siida moammu gabalooliin, nii mii gideawuurjeewi aba fughareeda gil; naweadinga sean sinung'unyi ghwadaajiit ng'asheesu aba heedeang'wa aba haleanjeessean.

⁷ Heappi aniini neasinnyi ring'eeda iyayaachchi geaw ng'eanyi ak abeeda geakghambiideegwa, aba gideaba ghayi gearukkuneegwa giijasta miy bea Aseetta nea moattaydani gili?

⁸ Nareachchi ganiisajeega suuk haleanjeeda nyaawa goonan saawa ak abeeda ghaweachcheegwa.

⁹ Nea aniini damanda sindeayeewi nea geegasayi weettean, ghanyea mii dasawan siida wassean, aba gideaba haleanjeeda eagasayi gagoonan fuga eaduupcheewi leabu Makkedoniya. Ak geahelleewi geaw haleanjeessean ak ea measawaneegwa aba gidawassean.

¹⁰ Ak gawuurji gidabiideatta huumeanda Gristo jeedeanyu, ghanyea manda siida jea gwadukutta ghuutteanyu aba ghwaroani bea geawiin aba daroorakka ng'eanyiida Akkaya.

¹¹ Abwanaaha? Gweagu gideaba mwabwariinyeagwa agooga? Ghwanal Aseetta gideaba ghaabwariinyeagwa!

¹² Nea gideagasayi dasin gaydasin, ak abeeda ghabwaanyi ng'asheegeaba fukka gasa aba jeeda gadiyoojiga nyaawa bea ghwarjeedean gwasinda gadiyeeda gidasisindi aseasa.

¹³ Aba gideaba fuga uurji suu giijasoodiga ng'uyyeega, nea iissa gwasin gadiyeeda aba rengaweega, fuga iissa ghwayamgeat ak gwasin geat giijasoodiga Gristo.

¹⁴ Ak ea mayghaham fih ng'eanyi, aba gideaba eara Shattaani iissa ghwayamyam geaw gawuurji malaykajeanda weeshinda.

¹⁵ Adabeeda ea mii ng'asheanda haw gil gideaba eara soomjoagaaschi earaga iissa ghwayam geat ak gawuurji soomjooga doobiiwnatta. Huydeanda nyaawa gaygawuurji sea gadiyoojiga nyaawa.

Sawanadeeda Bauloyda was giijasoochcheanda

¹⁶ Asi geargu gichcha gideaba, adaghwanung' siida doaw gili eawoschi dasha; earappeadi oanung' dasunuun, amwastanaan siittasha, ak abeeda earaniini ghaaghwarji geaw gilimwanang'.

¹⁷ (Ng'asheega eargu mearukuni aba gheambalmeeda Ng'uttamiida geawuurjeewi siida dasha, aba jeedeaba ghwarooni bea geaw ararji;

¹⁸ nea fuga saanga iissa ghaghwara geat haleanjeeda ng'eanyiida, ak earaniini gaydaghwar geaw.)

¹⁹ Aba gideaba hooseaneegeagwa ghamilikghta fuga dasheahi, nea agooga gowoschi weaghoodi!

²⁰ Aba gideaba iissa ghoamilikghti eara siida nung' ahuuwa ging'ng'oonyanga ghana ghwanukghutaneegwa, ghana ghwanyagaadawaneegwa, ghana ghwayiineegwa heettiyeada, ghana ghwalas gheamamuunatkeagwa.

²¹ Aba baspaseegeasu, gaydayi, aseasa geewoschi ng'arng'ari aba ng'asheanji! Nea gidawassean ghwara geaw siida gaydaammu earaniini gaydaghwara geaw, geabalooldi siittasha, earaniini gaydaammu daghwara geaw gitta.

²² Saawa ea fuga Ebraniyahi? Earaniini geawoschi. Saawa fuga Israeeli? Earaniini geawoschi. Saawa jeatta Abrahaamu? Earaniini geawoschi.

²³ Saawa soomjooga Gristohi? Gharaanyi aniini, geabalooldi siida geeska, biissa gaba gadiyeeda haw, gharaanyi muuchchi aba ghealooniga, bea bayiiga meammu eyiida, nea ghariikghti aba miyeeda galeagasean.

²⁴ Aba heeda fuga Yahuudi naanyaschi bayiiga niba muut niaanyaschi bayi haradam shoada akkalealla.

²⁵ Subwaranaan fuga Ruumi ng'aritka niba samwagu; ak ea sufuttewean lagheanga nubwagi. Ak ea ninyar maleambooda niba samwagu; ak geabiidi jeeda basooda eawa ea askweari;

²⁶ aba bareannyeekkeasu bea galeagasean, iissa gwaramaknean guldeayda ghealooniga iissa geashageadi aba fuga areedi buuneeda haleanjeeda, ak geashageadi aba emeedeanya, ak geashageadi aba Emoojiga, ak geashageadi aba mujiini, ak geashageadi aba dareapcheeda, ak geashageadi aba jeeda basooda, ak geashageadi aba fuga eaduupcheewi bea ng'uyyeega,

²⁷ aba sawanadeeda ea deawiitmeeda, ea ging'weernooda galeagasean bea eawa, aba jalooda ea muwooshta, iissa ahoaghuut ea meandeawani hamitta, aba jeammeeda ea ng'ayinda hang'weakka.

²⁸ Ea mabeachchi ng'asheesu, gwanda eara ng'asha suuk appadaydeanyu bea galeagasean, nea machmajooda ng'ullooda ganiisajeega seani.

²⁹ Ak ea ng'eaha gil siida ng'arng'ar, ak amwang'arng'ariidi aniini? Ak ea ng'eaha siida sinung' ghoabeada, ak amwanyareasi aniini?

³⁰ Imisean ghwaroodeaba geaw, gaydaghwara geaw haleanjeeda ahiimu ng'arng'arandeanyu.

³¹ Aseetta was Bwaabwa Ng'uttamiideanya was Yeesu, ninnyeeda ghayi sibadiischeesa ea ghoaw damanda manda mudeanooda, ghwanal gideaba mearukuni ng'uyyeega.

³² Abeeda aba hoowa bea Dameskiin sugoochcheanda mida hing'eadayda sugoochcheanda haw bea ng'eanyiida Aretta abeeda gafur mujiineeda Dameski ak abeeda ghoang'ng'waanyan,

³³ ak gearrarang'dawaan sooscheanda ak gessiigan seawadeeda ghamarda, ak ghadaraamnyi geattingaaschi.