2 Goriinto 10 - NEAJEEDA EESH BEA BUUNEESSEAN

Baulo ghaweat geaw aba gadiyeadaannyi

¹ Aniini Baulo, geamuscheegwa nea gabwageaw, aba garbabanda ea ng'eeninda Gristo, nea iissa geawoschi ng'eeni aba gheanyangeagwa, nea iyeawoschi sheageewaneegwa geawoschi daruus!

² Asi geamuscheegwa gideaba isindeayi ea mwahiimni dargooda aba gitta amwaschiin ak geahiimsi fuga rar gideaba aseasa geayaachchi geeshta ng'asheega gasa ng'eanyiida.

³ Earappeadi sindi ng'eanyiidean aseasa meeng'uchcheewani fuga mida ng'eanyiida,

⁴ aba gideaba dabitteanya sing'uchcheatti maba saseeda suu gwandeawa uurda Aseetta ak gwanyarja uurda lugooda.

⁵ Ak geenyarji fughareenga sean gasa godiing'u geat appadayda fughareeda Aseetta, ak geaghaschi giliwas fughara ak abeeda gwasissa mureeda Gristo,

⁶ nea geewoschi hidaat eayaagana ghoorjooda fuga manda mureeda, damanda hida mureedeang'wa.

⁷ Ang'ulla haleanjeeda mida madeeda gheanyangeagwa. Siida iirar gideaba gaba Gristo ea dapkaattunu niny gideaba niny siida Gristo, adabeeda earaseasa gewoschi.

⁸ Earappeadi aghwarji geaw gilimwanang'iin aba gheambalmeeda sindeawi, ghayi goaneasa Ng'uttamiida ak abeeda gedeekneegwa nea mii gideaba gajeenyarjaneegwa, ghanyea majeappwaspwaasan.

⁹ Meagasi eadaah gideaba geagasayi deamuuweagwa aba barawajeega.

¹⁰ Aba gideaba gwayeena, “Barawajeegaaschi eadurmani nea gwandeawa uurda nea saseadaannyi iimida hiji ea ng'arng'ar, nea eara girgweageadaannyi geefool.”

¹¹ Fuga sunu gagasa ghwanal gideaba ng'asheega surgu aba barawajeanda damanda meandeewani hiji, iissa geesinnyi iimida hiji.

¹² Mii gideaba geegasayi eebadaksiina eahhaadana geat fuga gwara geadi ghana eegalana geat fuga adiing'ng'u geat gil. Hean nea gaba siisi adeena geaw niirja, ak gaba siisi gala geaw niirja, ak ghanyea manda ginnal.

¹³ Ak aseasa ea mwajeaghwara geat ea ghwanaawda, geaghus gheadeendida goaneasa Aseettean, nea gideaba gajeammuusa eahinna heedeang'wa gil.

¹⁴ Nea meattaardani geat ea ghwanaawa gheadeendeanya, nea eara gwasa ghanyea miyeahinna heedeang'wa; aba gideaba geewoschi fuga madeeda asheeda ghwahidu heedeang'wa nea geeyeadu Giijasta miy bea Gristo.

¹⁵ Nea mwajeaghwara geat ea ghwanaawa deascheeda aba sawanadeeda buneessuurja gil; abeeda gendeawi rarooda gideaba gaygwaheedu masaweegeagwa gagasa gwaheedu gadiyeedeanya aba jeedeang'wa,

¹⁶ Ak abeeda gajeammuusa erukkwiida giijasta miy aba daroorakka suurja sheageewaneegwa, nea meaghwari geat aba gadiyeeda ning'atta sinooda aba jeemba madamnyeamba sii nuut.

¹⁷ “Neada siida ghwargeaw, ghaghwarageaw Ng'uttamiida.”

¹⁸ Aba gideaba mii siida gwarageawiini gil jea eamwas geaghus siitta jea ghaghwar Ng'uttamiidean.