2 Goriinto 1 - NEAJEEDA EESH BEA BUUNEESSEAN

¹ Baulo, was giijasoochcheanda Gristo Yeesu aba gidabwariiyda Aseetta, ea Dimotteoyda was orjeediyya. Heeda ganiiseeda Aseetta mida Goriinto, sea fuga ghaydidi sean mida jeeda ng'eanyiida sean bea Akkaaya:

² Gagasa anyasa dagheerjeandumeeda ea weayda leabu heeda Aseetta was Ghweandeanya ea heeda Ng'uttamiida was Yeesu Gristo.

Baulo gabadiischeesa Aseetta

³ Gagasa eakghambiida Aseetta, Bwaabwa Ng'uttamiideanya was Yeesu Gristo, Bwaabwa mideawa baydeayda, Aseetta geanniida salgheang'da sean,

⁴ geanniida salgheang'deanya sean ea sawanadeeda, ak abeeda geammuuschi earaseasa egeandeawana salgheang'da fukka mida jeeda sawanaduutka seaniin, aba salgheang'da geandeawaneasa Aseettean.

⁵ Gawuurji gissippareannyeatta muuchchi sawanaduutka Gristo, gwasnu aba naweeda Gristo geeppareannyi muuchchi eara geandeayda salgheang'da.

⁶ Iiduw aseasa iisisawaneasa, gweagu geandeayda ogeandeawaneasa salgheang'da, ea lealeanooda; ama sigeandeawaneasa salgheang'da, gweagu geandeayda ogeandi salgheang'da, ak ghoanalli aba damanda oamilikghtaawi nea ghoarjeang'di aba sawanaduutkiga sisawaneasa aseasaan.

⁷ Nea gitta sirarji aba heedeang'wean ea majeettumduum; aba gideaba geanalli gitta oppareannyeatti sawanaduutkaasaan, abeeda gajooppareannyeana geandeayda salgheang'deanya.

⁸ Aba gideaba aseasa meegassi adasheahiitta, fuga eaduupcheewi, appadayda sawanadeetta sinyaschi aba ng'eanyiida Asiyahiin; aba gideaba aseasa geewoschi hidaat, gearaanyi eamilikghta ak ghang'aaleasa ea ealagaana earaba eaweaga.

⁹ Ghwasaan, geaghanyi gili ninyas girgweaksiinda miyeeda; gabaysiina gideaba gayghwanung' eahuuwa fuga huumwa ak ea mii aseasa gil earaba heeda Aseetta aduuttu fuga nimeewa;

¹⁰ niny ghoaghuuhaneasa jeeda washta haw bea miyeeda, ak gaygabiikta ghoaghuheasa; nea aseasa ea sirarji niny gideaba gaygabiikta ghoaghuheasa.

¹¹ Earagooga aweadeasa aba mooshta Aseetta, ak abeeda gabadiischeesa fuga saang'a appadahuukkaasa aba badiischeesiindida ghayi sugoaneasa aseasa aba sheayda mooshcheenga saang'a aba heeda Aseettean.

Giyyamwaatta badiida Baulo

¹² Aba gideaba aseasa geaghwari geat ng'asheanji, nea gitta muuwwu fughareengaasaan gil ak ghoaw gissibeadi aba jeeda ng'eanyiida, ak gabiissa ghwaraanya muuchchi aba heedeang'wa, aba ghaydidanda ea baditta Aseetta bea huumwa, nea mii aba weaghumeeda ng'eanyiida gil geaghus aba dagheerjeandumeeda Aseetta.

¹³ Ak ea manda ng'asheanda sung'oorneegwa geaghus giikka oammuuschi oassoamwana ak ghoanalliin; ak ghaararji aniini gideaba gajanala ng'asheesu muuchchi,

¹⁴ gawuurji gitta oanaldi gilimwanang' ng'asheega mwaatkwaan, ak abeeda googwareessi appadahuukkaasa gawuurji gichche eebeaheattaneegwa aseasa aba eaweetta Ng'uttamiida was Yeesu.

¹⁵ Iiduw nea ghaanalli ng'asheanji, hean geagasayi doan heedeang'wa ammwadi, ak abeeda ghoanyaschi hooseaneega deabiyyeenya;

¹⁶ ak geegasayi dabareesseegwa nea ghaang'atti dawa Makkedoniya, amang'atta geayammu geaw doan Makkedoniya, ak geabiigu ng'eang'deang'wa ak abeeda ghaanyaschi weetta aba heedeang'wa aba bareannyeekkeasu jea dawa ng'eanyiida Yahuudi.

¹⁷ Neada aniini ghayamyamnyi geawi iyeagasayi dasin ng'asheanji? Neada geasinnyi badiideanyu aniini ak geawuurjeewi siida ng'eanyiida, ak ghwahit iyeayennyi Eah ghana Manda aba damanagi?

¹⁸ Nea aba huumwa aba gidadoabiiwaatta Aseetta, ng'asheandeanya aba heedeang'wa ea mii Eah gil ea Manda.

¹⁹ Aba gideaba Balleanda Aseetta, was Gristo Yeesuun ghayi surukku iittaannyi aba jeedeang'wa, Silwano ea Dimotteo ea aniini, mii Eahi ghana Manda; nea aba jeedeaba niny galeagasean iissa ea Eah gil.

²⁰ Aba gideaba helleesiinda sean bea Aseetta iissa ghwanyas Eah aba jeadaannyi. Nii gissurukkuuni Amin gil appadaydaannyi, aba gigheambiitta Aseetta.

²¹ Ak ea Aseetta gil dea amajeegideasa aba naweeda Gristo, ak ghoaw dea rukuneasa;

²² nea niny ea siida ghayi arooreasa gil, ak gagoaneasa Guroroodaannyi ak ghwayiin jeesinga guroruunatkaasa ak gawuurji raduutka.

²³ Iiduw geeguursi Aseetta ghoaw mushoochcheandeanyu, ak abeeda iyaawunnyi ea moanyasi sawanadeeda ak ghoaw gissitteelsiinanean hinnooda Goriinto.

²⁴ Nea mii gideaba geegasayi eeppala masaweegeagwa; geegadiyi sea agooga aba hooseaneegeagwa, aba gideaba ghoomiinaadi muuchchi aba masaweegeagwa.