2 Dimoteo 4 - NEAJEEDA EESH BEA BUUNEESSEAN

¹ Gearukuneey ng'asheesu aba madeeda Aseetta ea madeeda Gristo Yeesu ditta jea goorgweaksa fuga majeekjeew ea gea nimeewean aba gidaheachtaanyi ea aba gheambalmeadaannyi,

² rukwiida giijasta wosa hidaat (damanda miseey ea damanda mamiiseey), awoowsiina ajuursiina nea gireekusi aba milighteayda sean ea ginealshooda.

³ Aba gideaba gayghwahidu damanda jea eaheawa ginealshooda mideawa eaweega ak ghwaat geeshta naweeda gidagasiida saawa ak gwanyaksa geat gimughuscheekka ginealshoodiga aba gideaba gwandeawa idiga jea gwasikkiideawa ng'asheega.

⁴ Ak gaygoodiilda geat ea mwayiinya ng'asheega was gea huumwa ak gwayamsa geat deanghoochka ng'uyyeega,

⁵ Asi ang'iing'i mideawana gheadeenda aba haleanjeessean, milighteaysiina gea munyas sina gadiyeeda rukwiideayda giijasta miy ahiida gadiyeedaang'u nea gidoobiiw.

⁶ Aba gideaba aniini ghamneawa gajeetaydanaan doow gujaweeda ak ea nihiitta damanda jea dameawa.

⁷ Neang'uchchi ng'uchcheeda miy, neang'uucheewi, ak ea nahiichi ng'weega, ak masaweega ea neafurji,

⁸ ama ng'atta suu geegoonan shiipka aba doobiiwnatta dea iiduw eaweetta jea gagoonan Nguttamiida nea niny ea dea doobiiwaat girgweaga ak ea mii aniini gil akghwahit eara fukka sean gasa gidaheachtannyiin.

Ng'asheegaaschi

⁹ Sina badiida ak gihidu heedeanyu nea gilamwajaani.

¹⁰ Aba gideaba Dema ghabwariiy haleanjeeda munda ng'eanyiida ak ghang'eat gwanungsean heeda ak gawa Desalonikke, ak Greske gawa ng'eanyiida Galattiya, nea Diitto gawa ng'eanyiida Dalmattiya.

¹¹ Lukka geandeayeesi hiji nea gabageaw. Gasa Marko ak giideani aba gideaba ninyi gayghaweadan aba gadiyeedeanyu.

¹² Ak Digikko ea neajeakti gawa Efeeso.

¹³ Iihidu giyeadu hang'deanyu gul ng'eanyi ghayi eanungsi heeda Garpo bea ng'eanyiida Droa, ea gittaabwajeegiga ghwaraanya gikka sisna muchgean.

¹⁴ Isganda diitta was gidang'oocheandean nisinean ng'asheega munyas saang'a gayghawalda Ng'uttamiida gawuurji gidasinda niny.

¹⁵ Ak gishageadi siisi, aba gideaba ghaheawa muuchchi ng'asheegaasa.

¹⁶ Damanda ghayi sirgweaksinanean bea madeedean manda eara siyagi wea meatkweedeanyu ghaweadan, hean gwanung'sean heeda sean ak geamuschi gideaba gidinyeanji adeeyiin badahuuka nyaawa!

¹⁷ Ak ea niminaadawa Ng'uttamiida meatkweedeanyu ak gagoonan uurda aba gideaba gagasa ninyi darukwiida giijasta miy, ea ghwayiiy emoojiga sean, ak ghalalaani ghuutta ng'adiida.

¹⁸ Ak gaygwalealneani Ng'uttamiida aba ng'asheanda wassean muy, ak gayghaghamwadan ea dahitta gheambalmeedanyi bea humng'eeda. Gigheambiita daanyi gil ea ghwoaw eaweega manda mudeanooda. Amin.

Gighatta huydeanda

¹⁹ Agatta Briska ea Agila, ea fukka mida ghee Onesiforon.

²⁰ Erasto gahuydean aba ng'eanyiida Gorinto. Drofimo geanungsi Miletto aba gideaba ghamnyaan.

²¹ Sina badiida hinni damanda miighwahinna goroogeeda. Googateey geaba Eubulo ea Bude ea Liino ea Glaudiyo ea oorjooga sean.

²² Gagasa ghwoahaaghwa guroroadaang'u Ng'uttamiida. Gagasa anyasa dagheerjeandumeeda.